ក្រុមឧទ្ទាមហ៊ូធី ដែលគាំទ្រដោយអ៊ីរ៉ង់ និងមានមូលដ្ឋាននៅប្រទេសយេមែន បានវាយប្រហារទៅលើប្រទេសអេមីរ៉ាត់ អារ៉ាប់រួម (UAE) ដោយប្រើប្រាស់យន្តហោះគ្មានមនុស្សបើក និងមីស៊ីល ធ្វើឱ្យមានការផ្ទុះរថយន្តដឹកប្រេងឥន្ធនៈ ១ គ្រឿង បណ្តាលឱ្យមនុស្ស៣នាក់ស្លាប់ និងបង្កអគ្គីភ័យនៅជិតអាកាសយានដ្ឋានក្រុងអាប៊ូ ដាប៊ី ដែលជារាជធានីនៃប្រទេសដែលជាមជ្ឈមណ្ឌលពាណិជ្ជកម្ម និងទេសចរណ៍នៃតំបន់។
ការវាយប្រហារទៅលើ UAE បានធ្វើឱ្យសង្គ្រាមរវាងក្រុមហ៊ូធី និងក្រុមសម្ព័ន្ធភាពយោធាដឹកនាំដោយអារ៉ាប៊ីសា អ៊ូឌីត ឈានដល់កម្រិតថ្មីមួយ ហើយអាចរារាំងដល់កិច្ចខិតខំប្រឹងប្រែងដើម្បីកាត់បន្ថយភាពតានតឹងក្នុងតំបន់ ខណៈពេលដែលអាមេរិក និងអ៊ីរ៉ង់ព្យាយាមចរចាស្ដារកិច្ចព្រមព្រៀងនុយក្លេអ៊ែរ។
«UAE ថ្កោលទោសការវាយប្រហារភេរវកម្មនេះដោយក្រុមឧទ្ទាមហ៊ូធីលើតំបន់ និង កន្លែងស៊ីវិលក្នុងដែនដីអេមីរ៉ាត វានឹងមិនចៀសផុតការដាក់ទណ្ឌកម្មទេ» ក្រសួងការបរទេស UAE បាននិយាយបែបនេះ ហើយបន្តទៀតថា៖ «UAE រក្សាសិទ្ធិក្នុងការឆ្លើយតបទៅនឹងការវាយប្រហារភេរវកម្ម និងការកើនឡើងឧក្រិដ្ឋកម្ម»។
UAE ដែលជាសមាជិកសម្ព័ន្ធភាពខាងលើ បានជួយវឹកហាត់និងផ្គត់ផ្គង់អាវុធឱ្យក្រុមប្រដាប់អាវុធ ដែលថ្មីៗនេះបានប៉ះទង្គិចជាមួយក្រុមហ៊ូទីនៅតំបន់ផលិតឥន្ធនៈនៃប្រទេសយេម៉ែន។
អ្នកនាំពាក្យក្រុមហ៊ូធី លោកយ៉ាយ៉ា សារ៉ាបាននិយាយថា ក្រុមហ៊ូធីបានបាញ់មីស៊ីលចំនួន៥ គ្រាប់ និងយន្តហោះគ្មានមនុស្សបើកជាច្រើន ដើម្បីវាយប្រហារអាកាសយានដ្ឋានក្រុងអាប៊ូ ដាប៊ី និងក្រុងឌូបៃ រោងចក្រចម្រាញ់ប្រេង និង«កន្លែងរសើបផ្សេងទៀត»៕