រដ្ឋមន្ត្រីការបរទេសអាមេរិកលោក អាន់តូនី ប៊ីនកែន និងរដ្ឋមន្ត្រីការបរទេសរុស្ស៊ី លោក សឺហ្គេ ឡាវរ៉ូវ នឹងជួបប្រជុំនៅថ្ងៃសុក្រខាងមុខនេះ ខណៈពេលដែលភាគីរដ្ឋាភិបាលទាំង ២ កំពុងស្វែងយល់ថាតើនៅតែមានផ្លូវការទូត ដើម្បីបញ្ចៀសជម្លោះនៅអឺរ៉ុបខាងកើត?
ជំនួបនេះនឹងព្យាយាមបំបែកភាពជាប់គាំងដែលលេចឡើងកាលពីសប្ដាហ៍មុន នៅពេលដែលការចរចាជាបន្តបន្ទាប់ចំនួន៣រវាងរុស្សី និងលោកខាងលិចបានបញ្ចប់ដោយការជាប់គាំង។ ចំណុចកកិតបំផុតក្នុងការចរចាជុំមុនគឺការទាមទាររបស់រុស្ស៊ីឱ្យអង្គការណាតូប្ដេជ្ញាថា ឈប់ពង្រីកសមាជិកភាពមកអឺរ៉ុបខាងកើត ដែលជាលក្ខខណ្ឌមួយអាមេរិក និងអឺរ៉ុបខាងលិចបានច្រានចោល។
សេតវិមានបាននិយាយកាលពីថ្ងៃអង្គារថាលោកប៊ី្លនកែន នឹង«ជំរុញឱ្យរុស្សីចាត់វិធានការជាបន្ទាន់ដើម្បីបន្ធូរបន្ថយភាពតានតឹង» ហើយនឹង «គូសបញ្ជាក់យ៉ាងច្បាស់ថា នៅមានផ្លូវការទូតទៅមុខ»។
កាលពីថ្ងៃអង្គារលោកប៊្លីនកែន បានធ្វើដំណើរទៅប្រទេសអ៊ុយក្រែនដើម្បីជួបជាមួយលោកប្រធានាធិបតីវ៉ុលឌីមៀរ ហ្សេលេនស្គី ដើម្បីបង្ហាញការគាំទ្ររបស់អាមេរិក។ នៅថ្ងៃព្រហស្បតិ៍លោកប្ល៊ីន កែន នឹងធ្វើដំណើរទៅក្រុងប៊ែរឡាំងប្រទេសអាល្លឺម៉ង់ មុននឹងបន្តដំណើរទៅក្រុងហ្សឺណែវប្រទេសស្វីស ដើម្បីជួបជាមួយលោកឡាវរ៉ូវនៅថ្ងៃសុក្រ។
រដ្ឋមន្ត្រីការបរទេសទាំង២ បានសន្ទនាតាមទូរស័ព្ទកាលពីអង្គារ មុនពេលលោកប៊ីនកែន ចាប់ផ្ដើមដំណើរ។ ក្នុងការសន្ទនានេះលោកឡាវរ៉ូវបានច្រានចោលការចោទប្រកាន់ថា ប្រទេសរុស្ស៊ី កំពុងត្រៀមធ្វើការឈ្លានពាន ហើយទទូចថា វាអាស្រ័យលើប្រទេសអ៊ុយក្រែនដើម្បីកាត់បន្ថយភាពតានតឹង។
ក្រសួងការបរទេសអាមេរិកមិនបានបញ្ជាក់ថា អ្នកទាំង២ នឹងពិភាក្សាអំពីអ្វីទេ ប៉ុន្តែក្រសួងការបរទេសរុស្សីរំពឹងថានឹងឆ្លើយតបនឹងការទាមទាររបស់រុស្ស៊ី។ ក្រសួងការបរទេសអាមេរិកនៅមិននិយាយថាលោកប្ល៊ីនកែន នឹងធ្វើការឆ្លើយតបដែរឬយ៉ាងណានោះទេ?