អ្នកវិទ្យាសាស្ត្រ កំពុងតាមដានយ៉ាងដិតដល់លើបំប្លែងវ៉ារ្យ៉ង់រងដែលបានរកឃើញថ្មីៗចេញពីវ៉ារ្យ៉ង់អូមីក្រុង ដើម្បីកំណត់ពីរបៀបនៃការកកើតនៃវ៉ារ្យ៉ង់នេះ ហើយចង់ដឹងថា តើការកើតរបស់វាអាចប៉ះពាល់ដល់ការរីករាលដាលនៃជំងឺរាតត្បាតនាពេលអនាគត ឬយ៉ាងណា។ នេះបើតាមឱ្យដឹងពីសារព័ត៌មាន Al Jazeera។
វ៉ារ្យ៉ង់អូមីក្រុង បានក្លាយទៅជាប្រភេទមេរោគលេចធ្លោក្នុងប៉ុន្មានខែថ្មីៗនេះ ប៉ុន្តែអាជ្ញាធរសុខាភិបាលអង់គ្លេស បានកំណត់អត្តសញ្ញាណបំប្លែងវ៉ារ្យ៉ង់រងដទៃទៀតរាប់រយករណីដែលមានឈ្មោះថា BA.2 ខណៈដែល ទិន្នន័យអន្តរជាតិបង្ហាញថា វាអាចរីករាលដាលយ៉ាងឆាប់រហ័ស។
ទីភ្នាក់ងារសន្តិសុខសុខភាពរបស់ចក្រភពអង់គ្លេស (UK- HSA) បានកំណត់ករណីច្រើនជាង ៤០០ ករណីនៅក្នុងចក្រភពអង់គ្លេសក្នុងរយៈពេល ១០ ថ្ងៃដំបូងនៃខែនេះ ហើយបានបង្ហាញពីវ៉ារ្យ៉ង់ចុងក្រោយបំផុតត្រូវបានគេរកឃើញនៅក្នុងប្រទេសចំនួន ៤០ ផ្សេង ទៀត ដែលគិតជាករណីភាគច្រើននៃករណីថ្មីៗបំផុតនៅក្នុងប្រទេសមួយចំនួន រួមទាំង ឥណ្ឌា ដាណឺម៉ាក និងស៊ុយ អែត។
ភ្នាក់ងារ UKHSA បានបង្ហាញកាលពីថ្ងៃសុក្រថា ខ្លួនបានកំណត់អម្បូរ BA.2 ជាវ៉ារ្យ៉ង់នៅក្រោមការស៊ើបអង្កេត (VUI) ដោយសារករណីរបស់វាកំពុងកើនឡើង ទោះបីជានៅក្នុងប្រទេសអង់គ្លេស អម្បូរ BA.1 បច្ចុប្បន្នកំពុងតែលេចធ្លោក៏ដោយ។
អាជ្ញាធរក៏បានគូសបញ្ជាក់ថា៖ «នៅតែមានភាពមិនច្បាស់លាស់ជុំវិញសារៈសំខាន់នៃការផ្លាស់ប្តូរហ្សែ៊ន មេរោគដែលតម្រូវឱ្យមានការឃ្លាំមើល ខណៈដែលករណីនៅក្នុងប៉ុន្មានថ្ងៃថ្មីៗនេះបានបង្ហាញពីការកើនឡើងយ៉ាងខ្លាំងនៃ ឧប្បត្តិហេតុអម្បូរ BA.2 ជាពិសេសនៅក្នុងប្រទេសឥណ្ឌា និងដាណឺម៉ាក»។
លោក Antoine Flahault អ្នកជំនាញខាងរោគរាតត្បាតជនជាតិបារាំងបានប្រាប់ទីភ្នាក់ងារព័ត៌មាន AFP ថា៖ «អ្វីដែលធ្វើឱ្យយើងភ្ញាក់ផ្អើល គឺភាពរហ័ស ដែលបម្រែបម្រួលរងនេះកំពុងចរាចរក្នុងកម្រិតដ៏ធំធេងក្នុងទ្វីបអាស៊ី ហើយបានកាន់កាប់ដល់ប្រទេសដាណឺម៉ាក»។
អ្នកវិទ្យាសាស្ត្រត្រូវតែវាយតម្លៃពីរបៀបដែលមេរោគបន្ត វិវឌ្ឍ និងផ្លាស់ប្តូរ។ ការចាប់កំណើតចុងក្រោយបំផុតរបស់វា មិនមានការផ្លាស់ប្តូរជាក់លាក់ណាមួយ ដើម្បីប្រើសម្រាប់ ការតាមដាន និងប្រៀបធៀបអម្បូរ BA.1 ជាមួយវ៉ារ្យ៉ង់ដែលតាដែលជាប្រភេទដែលលេចធ្លោពីមុននោះទេ។
អម្បូរ BA.2 មិនទាន់ត្រូវបានកំណត់ថា ជាការប្រែប្រួលនៃការព្រួយបារម្ភនៅឡើយទេ ប៉ុន្តែលោក Flahault និយាយថា ប្រទេសនានាត្រូវតែមានការប្រុងប្រយ័ត្នចំពោះការវិវឌ្ឍចុងក្រោយបំផុត ខណៈដែលអ្នកវិទ្យាសាស្ត្របង្កើនការឃ្លាំមើល។
លោកបានឱ្យដឹងថា៖ «ប្រទេសបារាំង រំពឹងថា នឹងមានការកើនឡើងនៃការចម្លងរោគនៅពាក់កណ្តាលខែមករា។ វាមិនបានកើតឡើងទេ ហើយប្រហែលជាដោយសារតែបម្រែបម្រួលវ៉ារ្យ៉ង់។
«វ៉ារ្យ៉ង់រងនេះ ដែលហាក់ដូចជាអាចឆ្លងបាន ប៉ុន្តែមិនមានមេរោគខ្លាំងជាងអម្បូរ BA.1 នេះទេ»។
ទីភ្នាក់ងារសុខភាពសាធារណៈរបស់ប្រទេសបារាំង បាននិយាយកាលពីថ្ងៃសុក្រថា៖ «អ្វីដែលយើងចាប់អារម្មណ៍គឺប្រសិនបើ [បម្រែបម្រួលវ៉ារ្យ៉ង់រង] មានលក្ខណៈខុសៗគ្នាពីអម្បូរ BA.1 ទាក់ទងនឹងការឆ្លង និងភាពធ្ងន់ធ្ងរ»។
មកទល់នឹងពេលនេះ ករណី BA.2 មួយក្តាប់តូច បានលេចឡើងនៅក្នុងប្រទេសបារាំង ប៉ុន្តែប្រទេសនេះកំពុងតាមដានការវិវឌ្ឍនៅពេលដែលពួកគេបានរីករាលដាលពាសពេញតំបន់។
លោក Flahault នាយកវិទ្យាស្ថានសុខភាពសកលនៃសាកលវិទ្យាល័យហ្សឺណែវនិយាយថា ពាក្យឃ្លាំមើលមិនភ័យស្លន់ស្លោទេ ប៉ុន្តែយើងត្រូវមានភាពប្រុងប្រយ័ត្ន ព្រោះថា សម្រាប់ពេលនេះ យើងកំពុងឃ្លាំមើលករណី BA.2 ធ្ងន់ធ្ងរ ដើម្បីធ្វើការប្រៀបធៀបទៅនឹងករណីអូមីក្រុងដើម។ យ៉ាងណាមិញ យើងនូវមានមន្ទិលច្រើនទាក់ទិននឹងវ៉ារ្យ៉ង់រងទាំងនេះ។
លោក Tom Peacock អ្នកជំនាញខាងមេរោគនៅមហាវិទ្យាល័យ Imperial College ទីក្រុងឡុងដ៍បានសរសេរថា៖ «ការសង្កេតដំបូងបំផុតពីប្រទេសឥណ្ឌា និងដាណឺម៉ាក បង្ហាញថា មិនមានភាពខុសប្លែកគ្នាយ៉ាងខ្លាំងនៅក្នុងភាពធ្ងន់ធ្ងររបស់វាទេ បើប្រៀបធៀបទៅនឹងអម្បូរ BA.1»។
លោក Peacock បានបន្តថា៖ «ទំនងជាមានភាពខុសប្លែកគ្នាតិចតួចក្នុងប្រសិទ្ធភាពវ៉ាក់សាំងប្រឆាំងនឹង BA.1 និង BA.2។ ខ្ញុំមិនប្រាកដថា អម្បូរ BA.2 នឹងមានឥទ្ធិពលខ្លាំងលើរលកអូមីក្រុងបច្ចុប្បន្ននៃជំងឺរាតត្បាតនេះទេ»៕