កាលពីថ្ងៃសៅរ៍សប្ដាហ៍មុន រដ្ឋាភិបាលចក្រភពអង់គ្លេសបានធ្វើការអះអាងថា ក្រុងមូ៉ស្គូកំពុងរៀបចំផែនការដើម្បីបង្កើតរបបគាំទ្ររុស្សុីនៅប្រទេសអ៊ុយក្រែន ដោយពួកគេបានជ្រើសរើសបេក្ខជនមេដឹកនាំរួចទៅហើយ ខណៈពេលដែលមានការព្រួយបារម្ភថា រុស្ស៊ីអាចធ្វើការឈ្លានពាន។
សេចក្ដីថ្លែងការណ៍ដ៏ប្លែករបស់ក្រសួងការបរទេសអង់គ្លេស ដែលចេញនៅពេលយប់ក្នុងទីក្រុងឡុងដ៍ បានកើតឡើងខណៈពេលដែលលោកខាងលិច និងរុស្ស៊ីធ្វើការចរចា ដើម្បីកាត់បន្ថយភាពតានតឹង។ រុស្សីបានដាក់ពង្រាយទាហានច្រើនជាង ១០០ ០០០ នាក់ នៅតំបន់ព្រំដែនជាមួយអ៊ុយក្រែនធ្វើឱ្យមានការព្រួយបារម្ភថា រុស្ស៊ីអាចធ្វើការវាយប្រហារគ្រប់ពេលវេលា។
«ព័ត៌មានដែលត្រូវបានចេញផ្សាយនៅថ្ងៃនេះ បំភ្លឺអំពីវិសាលភាពនៃសកម្មភាពរបស់រុស្ស៊ី ដែលរៀបចំឡើងដើម្បីផ្ដួលរំលំប្រទេសអ៊ុយក្រែន និងជាការបង្ហាញការយល់ដឹងអំពីការគិតរបស់វិមានក្រឹមឡាំង» រដ្ឋមន្ត្រីការបរទេសអង់គ្លេសលោកស្រី លីស ត្រាស់ បាននិយាយបែបនេះក្នុងសេចក្ដីថ្លែងការណ៍ខាងលើហើយបន្តទៀតថា៖ «រុស្ស៊ី ត្រូវតែកាត់បន្ថយភាពតានតឹង បញ្ចប់យុទ្ធនាការឈ្លានពាន និងព័ត៌មានប្រឌិត និងបន្តដំណើរទៅរកលទ្ធិប្រជាធិបតេយ្យ»។
ការប្រកាសរបស់អង់គ្លេសជាលើកទី២ ក្នុងរយៈពេលត្រឹមតែជាង ១ សប្តាហ៍ ដែលមហាអំណាចលោកខាងលិចបានចោទប្រកាន់ជាសាធារណៈថា រុស្សុីបានជ្រៀតជ្រែកក្នុងកិច្ចការផ្ទៃក្នុងរបស់អ៊ុយក្រែន។ កាលពីថ្ងៃទី ១៤ អាមេរិកបានចោទប្រកាន់រុស្ស៊ីថា បានបញ្ជូនកងទាហានពិសេសទៅកាន់ផ្នែកខាងកើតអ៊ុយក្រែន ដើម្បីបង្កើតលេសសម្រាប់ការឈ្លានពាន។
ការចោទប្រកាន់ថ្មីរបស់ចក្រភពអង់គ្លេស បានផ្ដល់ព័ត៌មានលម្អិតតិចតួចអំពីរបៀបដែលរុស្ស៊ី អាចឈានទៅរកការបង្កើតរដ្ឋាភិបាលថ្មីនៅអ៊ុយក្រែន ហើយសេចក្ដីថ្លែងការណ៍មិនបាននិយាយថា តើផែនការបែបនេះ គឺពាក់ព័ន្ធនឹងការឈ្លានពានដោយកងទ័ពរុស្ស៊ី ឬយ៉ាងណានោះទេ។ មន្ត្រីអង់គ្លេសដែលដឹងពីស្ថានភាពនេះ បាននិយាយក្នុងលក្ខខណ្ឌមិនបញ្ចេញអត្តសញ្ញាណថា ចេតនាទាំង ២ នៃសេចក្ដីថ្លែងការណ៍ គឺដើម្បីរារាំងការអនុវត្តផែនការបែបនេះ និងផ្ដល់ដំណឹងដល់រុស្ស៊ីថា ឧបាយកលនេះត្រូវបានលាតត្រដាងជាសាធារណៈ។
មន្ត្រីអាមេរិកបាននិយាយថា ចារកម្មរបស់អង់គ្លេសលើរឿងនេះគឺត្រឹមត្រូវ។ នៅក្នុងសម្ព័ន្ធភាពចារកម្ម ដែលគេស្គាល់ថា «ភ្នែក ៥» ចក្រភពអង់គ្លេសមានការទទួលខុសត្រូវចម្បងក្នុងការលួចស្ដាប់ទំនាក់ទំនងរបស់រុស្ស៊ី។
អ្នកនាំពាក្យក្រុមប្រឹក្សាសន្តិសុខជាតិអាមេរិកលោកស្រី អេមីលី ហ៊ន ថា៖ «ឧបាយកលបែបនេះ គឺគួរឱ្យព្រួយបារម្ភយ៉ាងខ្លាំង។ ប្រជាជនអ៊ុយក្រែនមានសិទ្ធិអធិបតេយ្យក្នុងការកំណត់អនាគតរបស់ពួកគេ ហើយយើងឈរជាមួយដៃគូដែលជាប់ឆ្នោតតាមលទ្ធិប្រជាធិបតេយ្យរបស់យើងនៅក្នុងអ៊ុយក្រែន»។
ប៉ុន្តែក្រសួងការបរទេសរុស្ស៊ី បានច្រានចោលការចោទប្រកាន់នេះយ៉ាងខ្លាំង។
«ការផ្សព្វផ្សាយព័ត៌មានប្រឌិតដោយក្រសួងការបរទេសអង់គ្លេស គឺជាភ័ស្តុតាងមួយបន្ថែមទៀត ដែលថាប្រទេសណាតូ ដឹកនាំដោយជនជាតិអង់គ្លូសាក់សុង គឺកំពុងបង្កើនភាពតានតឹងនៅអ៊ុយក្រែន» ក្រសួងការបរទេសរុស្សីបាននិយាយបែបនេះក្នុងសេចក្ដីថ្លែងការណ៍មួយ ហើយបន្តទៀតថា៖ «យើងអំពាវនាវឱ្យក្រសួងការបរទេសអង់គ្លេសបញ្ឈប់សកម្មភាពបង្កហេតុរបស់ខ្លួន»។
អ៊ុយក្រែនស្ថិតក្នុងស្ថានភាពនៃការព្រួយបារម្ភខ្ពស់។ ក្នុងប៉ុន្មានសប្ដាហ៍ថ្មីៗនេះ របាយការណ៍ជាច្រើនបានលេចចេញអំពីផែនការ ដែលមានបំណងធ្វើឱ្យរដ្ឋាភិបាលមានអស្ថិរភាព និងធ្វើឱ្យប្រទេសនេះធ្លាក់ក្នុងសង្គ្រាម។
បន្ថែមពីលើការចោទប្រកាន់របស់អាមេរិក និងអង់គ្លេស ទីភ្នាក់ងារចារកម្មយោធាអ៊ុយក្រែនបាននិយាយថា រុស្សុីបានបញ្ជូនទាហានស៊ីឈ្នួលទៅជួយក្រុមផ្ដាច់ខ្លួននៅខាងកើតប្រទេស ហើយកាលពីខែវិច្ឆិកា លោកប្រធានាធិបតី វ៉ុលឌីមៀរ ហ្សេលេនស្គី បាននិយាយថា ទីភ្នាក់ងារចារកម្មអ៊ុយក្រែនបានរកឃើញឧបាយកលធ្វើរដ្ឋប្រហារគាំទ្រដោយរុស្ស៊ី និងពាក់ព័ន្ធសេដ្ឋីអ៊ុយក្រែន ១ រូប។
អង់គ្លេសមិនបានផ្ដល់ភ័ស្តុតាងដើម្បីគាំទ្រការចោទប្រកាន់ របស់ពួកគេទេ។
សេចក្ដីថ្លែងការណ៍របស់អង់គ្លេសបានលើកឡើងថា រុស្ស៊ីកំពុងពិចារណាជ្រើសរើសសមាជិកសភាអ៊ុយក្រែន ១ រូប ឈ្មោះ យ៉េហ្គេននី ម៉ូរ៉ាយ៉េវ ជាមេដឹកនាំរបបគាំទ្ររុស្ស៊ី។ លោក ម៉ូរ៉ាយ៉េវ គឺជាអតីតសមាជិកនៃគណបក្សគាំទ្ររុស្សីរបស់អតីតប្រធានាធិបតី វិកទ័រ យ៉ានូកូវិច ដែលបានភៀសខ្លួនទៅរុស្ស៊ី បន្ទាប់ពីធ្លាក់ពីអំណាចនៅឆ្នាំ ២០១៤។
យ៉ាងណាមិញ សេចក្ដីថ្លែងការណ៍ដ៏ប្លែករបស់អង់គ្លេស ដែលមានកង្វះព័ត៌មានលម្អិត និងភ័ស្តុតាង បានធ្វើឱ្យអ្នករិះគន់គិតថា នាយករដ្ឋមន្ត្រីអង់គ្លេសលោក បូរីស ចនសុន កំពុងប្រើប្រាស់ភាពតានតឹងជាមួយនឹងរុស្ស៊ី ដើម្បីបង្វែរអារម្មណ៍ពីរឿងអាស្រូវនយោបាយ ដែលអាចទម្លាក់លោកពីអំណាច៕