ក្រុមហ៊ុនបច្ចេកវិទ្យារបស់ជប៉ុន Glory កំពុងសាកល្បងប្រព័ន្ធទូទាត់ប្រាក់ដោយមិនប៉ះដៃដោយសម្គាល់មុខអតិថិជន ទោះបីជាពួកគេពាក់ម៉ាស់ក្ដី។
អភិបាលក្រុង Niigata លោក Yaichi Nakahara គឺជាអ្នកដំបូងគេដែលសាកល្បងប្រព័ន្ធនេះ នៅពេលកម្មវិធីចាប់ផ្តើមបើកដំណើរការកាលពីពាក់កណ្ដាលខែមករា។ លោកនិយាយថា៖ «វាលឿនជាងអ្វីដែលខ្ញុំគិតទៅទៀត។ខ្ញុំចង់ឱ្យមនុស្សទទួលបានបទពិសោធភាពងាយស្រួលនៃបច្ចេកវិទ្យាទំនើបតាមរយៈសេវាកម្មប្រចាំថ្ងៃ»។
ជាមួយនឹងប្រព័ន្ធBioPayរបស់Glory នៅពេលដែលអ្នកប្រើប្រាស់ចុះឈ្មោះ«មុខ» និងព័ត៌មានកាតឥណទាននៅលើគេហទំព័រ ពួកគេអាចបញ្ចប់ការទិញក្នុងរយៈពេលត្រឹមតែ១វិនាទី ឬ២វិនាទី ដោយគ្រាន់តែឈរនៅពីមុខថេប្លេត។BioPayត្រូវបានដំឡើងនៅហាង និងភោជនីយដ្ឋានចំនួន១០ នៅក្រុងNiigata ក្នុងអ្វីដែលក្រុមហ៊ុនមានគោលបំណងប្រែក្លាយទៅជា«របៀបដើរទិញឥវ៉ាន់ដោយមិនប្រើដៃ»។
ក្រុមហ៊ុនGlory និយាយថា នេះគឺជាការសាកល្បងលើកដំបូងនៅក្នុងប្រទេសជប៉ុន។Glory កំពុងទាញយកអត្ថប្រយោជន៍ពីការឧបត្ថម្ភធនដែលផ្តល់ដោយក្រុងNiigata សម្រាប់កម្មវិធីសាកល្បងបច្ចេកវិទ្យានានាដូចកម្មវិធីនេះ។ ក្រុមហ៊ុន និងអាជ្ញាធរមូលដ្ឋានមានបំណងលើកទឹកចិត្តឱ្យអាជីវកម្មឆ្ពោះទៅរកឌីជីថលដើម្បីធ្វើឱ្យប្រតិបត្តិការកាន់តែរលូន និងមានប្រសិទ្ធភាពជាងមុន។
ក្រុមហ៊ុនGlory ត្រូវបានបង្កើតឡើងដំបូងក្នុងឆ្នាំ១៩១៨ដែលមានឯកទេសក្នុងការជួសជុលឧបករណ៍ផលិតអំពូលភ្លើង។ ឥឡូវនេះ ម៉ាស៊ីនទូទាត់សាច់ប្រាក់ និងសេវាកម្មទូទាត់ប្រាក់របស់ក្រុមហ៊ុនមាននៅក្នុងធនាគារ និងអាជីវករលក់រាយជាង១០០ប្រទេស៕
ហួន ឌីណា