.jpg)
កាលពីថ្ងៃអាទិត្យ ២៣ មករានេះ ក្រសួងការបរទេសអាមេរិកបានប្រកាសថា ខ្លួននឹងកាត់បន្ថយចំនួនបុគ្គលិកនៅស្ថានទូតរបស់ខ្លួនប្រចាំប្រទេសអ៊ុយក្រែន ដោយចាប់ផ្ដើមតាមរយៈការចាកចេញរបស់បុគ្គលិកមិនសូវចាំបាច់ណាមួយ និងសមាជិកគ្រួសារបុគ្គលិកស្ថានទូតជាដើម។
មន្ត្រីក្រសួងការបរទេសអាមេរិកបាននិយាយថាការសម្រេចចិត្តធ្វើឡើងដោយសារ «ការប្រុងប្រយ័តខ្ពស់» ខណៈពេលដែលការគំរាមកំហែងដល់បុគ្គលិកអាមេរិកនៅក្នុងប្រទេសនេះមិនមានការកើនឡើងទេក្នុងរយៈពេលប៉ុន្មានថ្ងៃថ្មីៗនេះ។ មន្ត្រីសំខាន់ៗរបស់ស្ថានទូតនឹងបន្តការងាររបស់ពួកគេ ប៉ុន្តែអាមេរិកមិនបានបញ្ជាក់ពីចំនួនមន្ត្រីទាំងនេះទេ។
បើទោះបីជាយ៉ាងនេះក៏ដោយ ការសម្រេចចិត្តនេះបានបង្ហាញយ៉ាងច្បាស់អំពីការព្រួយបារម្ភរបស់អាមេរិកអំពីការឈ្លានពានរបស់រុស្សីចូលអ៊ុយក្រែន។ រុស្សីបានប្រមូលផ្ដុំទាហានជាង ១០០.០០០ នាក់នៅតំបន់ព្រំដែនជាមួយអ៊ុយក្រែន ប៉ុន្តែបាននិយាយថាខ្លួនគ្មានផែនការដើម្បីធ្វើការឈ្លានពានទេ។
កាលពីថ្ងៃសុក្រសារព័ត៌មានអាមេរិក CNN បានរាយការណ៍ថាស្ថានទូតអាមេរិកប្រចាំនៅអ៊ុយក្រែន គឺជាអ្នកស្នើឱ្យមានការកាត់បន្ថយនេះ។ ក្រៅពីបុគ្គលិកមិនសូវចាំបាច់ និងក្រុមគ្រួសារបុគ្គលិកស្ថានទូត ក្រសួងការបរទេសអាមេរិកក៏បានណែនាំឱ្យពលរដ្ឋអាមេរិកនៅក្នុងអ៊ុយក្រែនធ្វើការពិចារណាចាកចេញដោយប្រើគ្រប់មធ្យោបាយធ្វើដំណើរ ដោយលើកឡើងថាប្រសិនបើមានការផ្ទុះសង្គ្រាម ការជម្លៀសអាចនឹងមានការលំបាក៕
