សមាជិកអង្គការណាតូបានចាប់ផ្ដើមបញ្ជូននាវា និងយន្តហោះចម្បាំងទៅកាន់បណ្ដាប្រទេសសម្ព័ន្ធមិត្តនៅអឺរ៉ុបខាងកើត ខណៈពេលដែលនាយករដ្ឋមន្ត្រីអង់គ្លេសលោក បូរីស ចនសុន បានព្រមានថា រុស្ស៊ីបានប្រមូលផ្ដុំទាហានគ្រប់គ្រាន់សម្រាប់ធ្វើ «សង្គ្រាមរន្ទះ» ចូលឈ្លានពានប្រទេសអ៊ុយក្រែន ដោយមានគោលបំណងចូលកាន់កាប់រដ្ឋធានីកៀវ។
ការលើកឡើងរបស់លោក ចនសុន បានកើតឡើងចំពេលដែលមានការព្រួយបារម្ភយ៉ាងខ្លាំងថា រុស្ស៊ីកំពុងត្រៀមឈ្លានពានអ៊ុយក្រែន។ អង្គការណាតូបាននិយាយថា សមាជិករបស់ខ្លួនបានត្រៀមចល័តកងទ័ព ប្រសិនបើរុស្ស៊ីបើកការវាយប្រហារ។
លោក ចនសុន បាននិយាយថា កងវរសេនាធំ និងតូចរបស់រុស្ស៊ីជាង ៦០ បានប្រមូលផ្ដុំនៅតំបន់ជិតព្រំដែនអ៊ុយក្រែន ដែលលោកនិយាយថា ជាភ័ស្តុតាងនៃ «ផែនការសម្រាប់សង្គ្រាម រន្ទះដែលអាចដណ្ដើមយកក្រុងកៀវ»។
លោកបាននិយាយថា៖ «នោះនឹងជាជំហានដ៏មហន្តរាយមួយ»។ សម្រាប់ទីក្រុងម៉ូស្គូ ការលុកលុយណាមួយ «នឹងក្លាយជារឿងដ៏ឈឺចាប់ ហិង្សា និងបង្ហូរឈាម។ ខ្ញុំគិតថា វាមានសារៈសំខាន់ខ្លាំងណាស់ដែលប្រជាជនរុស្សុីយល់ថា នេះអាចជាឆេឆេនីថ្មី»។
ប្រធានាធិបតីបេឡារុស លោក អាឡិចសាន់ឌឺ លូកាសិនកូ បាននិយាយថា លោកនឹងដាក់ពង្រាយ «កងកម្លាំងទាំងមូល» នៃកងទ័ពរបស់លោកទៅកាន់ព្រំដែនប្រទេសអ៊ុយក្រែន ដើម្បីឆ្លើយតបទៅនឹងការដាក់ពង្រាយកម្លាំងរបស់ណាតូនៅក្នុងតំបន់បាល់ទិក និងប្រមូលផ្ដុំកងទ័ពនៅក្នុងប្រទេសអ៊ុយក្រែន។
លោកនិយាយថា៖ «នេះគឺមិនពាក់ព័ន្ធនឹងការកាន់កាប់ណាមួយទេ។ យើងគ្រាន់តែចង់ការពារព្រំដែនភាគខាងត្បូងរបស់យើង»។
នៅក្នុងកិច្ចប្រជុំរវាងរដ្ឋមន្ត្រីការបរទេសសហភាពអឺរ៉ុប និងអាមេរិក ប្លុកនេះបានសង្កត់ធ្ងន់ថា រុស្ស៊ីនឹងរងផលប៉ះពាល់យ៉ាងធ្ងន់ធ្ងរ ប្រសិនបើវាយប្រហារអ៊ុយក្រែន ហើយនិយាយថា ពួកគេនឹង «ពន្លឿន» ការងាររៀបចំដាក់ទណ្ឌកម្ម។
កាលពីចុងសប្ដាហ៍មុន អង់គ្លេសបានចោទប្រកាន់រុស្ស៊ីថា កំពុងគ្រោងផ្ដួលរំលំរដ្ឋាភិបាលអ៊ុយក្រែនបច្ចុប្បន្ន ហើយតែងតាំងរដ្ឋាភិបាលថ្មីដែលគាំទ្រខ្លួន។
ខណៈពេលដែលមហាអំណាចលោកខាងលិច បានបញ្ចេញព័ត៌មានចារកម្មអំពីគោលបំណងរបស់រុស្ស៊ី ក្រុងម៉ូស្គូតែងតែបដិសេធម្ដងហើយម្ដងទៀតថា ខ្លួនមិនមានផែនការដូច្នោះទេ។ ប៉ុន្តែវិមានក្រឹមឡាំង បាននិយាយថា ហានិភ័យនៃការផ្ទុះសង្គ្រាមគឺ «ខ្ពស់ណាស់» នៅតំបន់ដុនបាស់ ដែលជាកន្លែងនៃសង្គ្រាមផ្ដាច់ខ្លួនគាំទ្រដោយរុស្ស៊ី។
អ្នកនាំពាក្យវិមានក្រឹមឡាំងលោក ឌីមីទ្រី ប៉េស្កូវ បានប្រាប់អ្នកយកព័ត៌មានថា លោកខាងលិច គឺជាអ្នកបង្កការកើនភាពតានតឹងដោយការដាក់ពង្រាយកម្លាំងបន្ថែមទៀត និងការផ្សាយការអះអាង «ក្លែងក្លាយ» អំពីផែនការផ្លាស់ប្ដូររបបនៅអ៊ុយក្រែន។
លោក ប៉េស្កូវ ថ្លែងដូច្នេះ៖ «នេះមិនមែនកើតឡើងដោយសារតែអ្វីដែលយើងរុស្ស៊ីកំពុងធ្វើនោះទេ។ ទាំងអស់នេះកើតឡើងដោយសារតែអ្វីដែលណាតូ និងសហរដ្ឋអាមេរិកកំពុងធ្វើ និងព័ត៌មានដែលពួកគេកំពុងចែកចាយ»។
បើទោះជាយ៉ាងនេះក៏ដោយលោក ប៉េស្កូវ លើកឡើងថា រុស្ស៊ីមិនចង់ជួបនឹងស្ថានភាពតានតឹងស្រដៀងគ្នានាពេលអនាគតទេ ហើយនឹងផ្ដោតលើការចរចាសន្តិសុខជាមួយអាមេរិកវិញ៕
វីដេអូ៖