កាលពីថ្ងៃចន្ទ ទី២៤ មករា ទីផ្សារភាគហ៊ុន និងមូលបត្របំណុល និងតម្លៃរូបិយប័ណ្ណរូប្លរបស់រុស្ស៊ី បានរងការធ្លាក់ចុះ ខណៈពេលដែលវិនិយោគិនមានប្រតិកម្មចំពោះការព្រួយបារម្ភអំពីការផ្ទុះសង្គ្រាមនៅប្រទេសអ៊ុយក្រែន។
សូចនាករទីផ្សារភាគហ៊ុនក្រុងមូស្គូ (MOEX) បានធ្លាក់ចុះ ៥,៥ភាគរយ បន្ទាប់អាមេរិក និងអង់គ្លេសប្រកាសកាត់បន្ថយចំនួនបុគ្គលិកស្ថានទូតប្រចាំប្រទេសអ៊ុយក្រែន ធ្វើឱ្យធ្លាក់ចុះចាប់តាំងពីដើមឆ្នាំនេះកើនដល់ ១៥%។ មូលបត្របំណុលរដ្ឋាភិបាលរុស្សីក៏ប្រឈមមុខនឹងការធ្លាក់ចុះផងដែរ ខណៈពេលដែលវិនិយោគិនព្រួយបារម្ភអំពីការដាក់ទណ្ឌកម្មពីលោកខាងលិច ហើយព្យាយាមបោះបង់ទ្រព្យសកម្មពាក់ព័ន្ធនឹងរុស្ស៊ី ។
តម្លៃរូបិយប័ណ្ណរូប្ល (Ruble) របស់រុស្សីបានធ្លាក់ ២ភាគរយ ធៀបនឹងដុល្លារអាមេរិក ដែលជាកម្រិតខ្សោយបំផុតចាប់តាំងពីខែវិច្ឆិកា ឆ្នាំ២០២០។ ការធ្លាក់ចុះនេះ បានជំរុញឱ្យធនាគារកណ្ដាលរុស្សីធ្វើការបញ្ឈប់ការទិញប្ដូររូបិយប័ណ្ណបរទេស ក្នុងអ្វីដែលពួកគេនិយាយថាជាសកម្មភាពដើម្បី «កាត់បន្ថយអស្ថិរភាពក្នុងទីផ្សារហិរញ្ញវត្ថុ»៕