នាវាចម្បាំងផ្ទុកយន្តហោះរបស់សហរដ្ឋអាមេរិកចំនួន២គ្រឿងបានចូលទៅកាន់ដែនសមុទ្រចិនខាងត្បូងកាលពីថ្ងៃអាទិត្យកន្លងទៅ ក្នុងគោលបំណងធ្វើសមយុទ្ធរួម។ នេះបើតាមការចុះផ្សាយរបស់កងនាវារបស់អាមេរិក។
បើយោងតាមប្រភពខាងលើនាវាចម្បាំងធំៗទាំង២នោះ គឺនាវា USS Carl Vinson និងនាវា USS Abraham Lincoln ដោយនាវាទាំង២នេះ សុទ្ធតែជាក្រុមប្រយុទ្ធរបស់កងទ័ពជើងទឹកអាមេរិក។នាវាទាំង ២ នេះ ធ្វើប្រតិបត្តិការរួមដោយហាត់សមលើវិញ្ញាសានានាដូចជាពង្រឹងប្រតិបត្តិការទំនាក់ទំនងផ្លូវសមុទ្រប្រតិបត្តិការប្រឆាំងនឹងនាវាមុជទឹកក៏ដូចជាប្រឆាំងនឹងការវាយប្រហារផ្លូវអាកាសជាដើម។
កងនាវាអាមេរិកបាននិយាយថា៖ «ការហ្វឹកហាត់នេះ នឹងធ្វើស្របតាមច្បាប់អន្តរជាតិនៅក្នុងដែនសមុទ្រអន្តរជាតិ»។
លោក J.T. Anderson មេបញ្ជាការនៃនាវា USS Abraham Lincoln បាននិយាយនៅក្នុងសេចក្ដីប្រកាសព័ត៌មាននោះថា៖ «ប្រតិបត្តិការដូចនេះ នឹងអាចឱ្យពួកយើងពង្រឹងភាពត្រៀមលក្ខណៈសម្រាប់ការប្រយុទ្ធឱ្យបានប្រសើរឡើងក៏ដូចជាធានាទៅដល់សម្ព័ន្ធមិត្តនិងដៃគូរបស់យើង និងបង្ហាញពីការប្ដេជ្ញាចិត្តរបស់កងទ័ពជើងទឹកអាមេរិកក្នុងការធានានូវស្ថិរភាពតំបន់និងវាយបកនៃឥទ្ធិពលអាក្រក់ៗនានា»។
ដំណឹងនៃការធ្វើសមយុទ្ធរបស់នាវាចម្បាំងទាំង២គ្រឿងនេះ បានលេចចេញឡើងបន្ទាប់ពីតៃវ៉ាន់បានប្រកាសថាយន្តហោះចម្បាំងរបស់ចិនដីគោកចំនួន៣៩គ្រឿងបានហោះចូលតំបន់ការពារដែនអាកាសរបស់ខ្លួន៕
ហ៊ីម រដ្ឋា