.jpg)
សហរដ្ឋអាមេរិកថា ខ្លួនកំពុងចរចាជាមួយប្រទេស និងក្រុមហ៊ុនផលិតថាមពលនៅជុំវិញពិភពលោក ដើម្បីធ្វើការផ្គត់ផ្គង់ថាមពលឱ្យតំបន់អឺរ៉ុប ប្រសិនបើមានការផ្ដាច់ដោយសាររុស្ស៊ី ឈ្លានពានចូលប្រទេសអ៊ុយក្រែន។
ក្នុងសន្និសីទសារព័ត៌មានតាមទូរស័ព្ទមន្ត្រីរដ្ឋបាលអាមេរិក មិនបានបញ្ជាក់អត្តសញ្ញាណនៃក្រុមហ៊ុន ឬប្រទេសដែលពួកគេកំពុងចរចាជាមួយដើម្បីធានាបាននូវលំហូរថាមពលដោយមិនមានការរំខានទៅកាន់ទ្វីបអឺរ៉ុបសម្រាប់រដូវរងារដែលនៅសល់ ប៉ុន្តែបាននិយាយការចរចាបានរួមបញ្ចូលអ្នកផ្គត់ផ្គង់យ៉ាងទូលំទូលាយ រួមទាំងអ្នកផ្គត់ផ្គងឧស្ម័នធម្មជាតិរាវ (LNG)។
សហភាពអឺរ៉ុបរំពឹងយ៉ាងខ្លាំងទៅលើឧស្ម័នធម្មជាតិនាំចូលពីប្រទេសរុស្ស៊ី ដោយជាងមួយភាគបីនៃតម្រូវការឧស្ម័នធម្មជាតិរបស់ពួកគេ គឺត្រូវបានបំពេញដោយរុស្ស៊ី។ ប្រសិនបើការផ្គត់ផ្គង់ឧស្ម័នពីរុស្ស៊ីរងភាពរអាក់រអួល ឬរងការបិទទាំងស្រុង តម្លៃថាមពលនៅអឺរ៉ុប នឹងកើនឡើងយ៉ាងខ្លាំង ហើយធ្វើឱ្យវិបត្តិកង្វះថាមពលនៅទីនោះកាន់តែពិបាក។
ផែនការរបស់សេតវិមានអាចប្រឈមមុខនឹងការលំបាកយ៉ាងខ្លាំង ដោយសារប្រទេសផលិត ឧស្ម័ន LNG កំពុងព្យាយាមបញ្ចេញឧស្ម័នដល់កម្រិតកំពូលរួចទៅហើយ រួចមិនអាចធ្វើការបង្កើនល្បឿនបន្ថែមទៀតទេ ធ្វើឱ្យមានការលំបាកក្នុងការស្វែងរកអ្វីមកជំនួសការនាំចូលឧស្ម័នពីរុស្ស៊ី៕
