ខណៈពេលដែលរុស្ស៊ី ប្រមូលផ្ដុំទាហានរាប់ម៉ឺននាក់នៅជិតព្រំដែនជាមួយប្រទេសអ៊ុយក្រែន ភាពតានតឹងក៏បានកើនឡើងនៅលើទីផ្សារថាមពលផងដែរ។ វាមិនពិបាកមើលឃើញទេឧស្ម័នធម្មជាតិរុស្ស៊ីហូរតាមបណ្ដាញបំពង់បង្ហូរទៅរោងចក្រអគ្គិសនី និងទៅកម្ដៅគេហដ្ឋាននៅទូទាំងទ្វីបអឺរ៉ុប។ រុស្ស៊ីក៏ជាប្រភពប្រេងឥន្ធនៈសំខាន់របស់អឺរ៉ុបផងដែរ។
ឥឡូវនេះ មន្ត្រីលោកខាងលិចគឺកំពុងពិចារណាថា តើនឹងមានអ្វីកើតឡើង ប្រសិនបើរុស្ស៊ីសម្រេចប្រើប្រាស់វិធានការថ្ងៃអវសាន ដោយកាត់ផ្ដាច់ការផ្គត់ផ្គង់ឧស្ម័ន និងប្រេងឥន្ធន:ទាំងនោះ នៅចំកណ្ដាលរដូវរងារបស់អឺរ៉ុប។
ការប្រឈមមុខដាក់គ្នាលើអ៊ុយក្រែនកើតឡើងនៅពេលមិនសមរម្យ។ តម្លៃថាមពលពិភពលោក បានកើនឡើងរួចហើយដោយសារការផ្គត់ផ្គង់ប្រេង និងឧស្ម័នធម្មជាតិបានយឺតយ៉ាវតាមមិនទាន់ ការងើបឡើងវិញនៃតម្រូវការពិភពលោកបន្ទាប់ពីការបិទខ្ទប់ដោយសារជំងឺកូវីដ ១៩។
នៅអឺរ៉ុបតម្លៃបានកើនឡើងដល់កម្រិតដ៏ខ្ពស់មួយដែលបានទាក់ទាញការនាំចូលឧស្ម័នពីសហរដ្ឋអាមេរិក កាតា និងប្រទេសដទៃទៀត ដែលជាធម្មតាមានតម្លៃថ្លៃជាងឧស្ម័ននៅអឺរ៉ុប។ កាលពីថ្ងៃអង្គារសេតវិមានបាននិយាយថា កិច្ចពិភាក្សាកំពុងធ្វើឡើង ដើម្បីស្វែងរកការសម្របសម្រួលផ្គត់ផ្គង់ថាមពលទៅអឺរ៉ុប ប្រសិនបើរុស្ស៊ីផ្ដាច់ការផ្គត់ផ្គង់។
ទ្វីបអឺរ៉ុបកំពុងឆ្លងកាត់រដូវរងា ជាមួយវិបត្តិថាមពលដ៏ធំមួយខណៈពេលដែលតម្លៃឧស្ម័នធម្មជាតិ និងអគ្គិសនីកើនឡើងយ៉ាងខ្លាំង។ វិបត្តិនេះបានចាប់ផ្ដើមកាលពីឆ្នាំមុននៅពេលកម្រិតស្តុកទុកឧស្ម័ននៅអឺរ៉ុបបានធ្លាក់ចុះយ៉ាងខ្លាំង។ តម្លៃឧស្ម័នធម្មជាតិបានកើនឡើងរហូតដល់ ៥ ដង ហើយបើទោះបីជាបានធ្លាក់ចុះដល់ពាក់កណ្ដាល តម្លៃឧស្ម័នធម្មជាតិនៅអឺរ៉ុប គឺនៅថ្លៃជាងទីផ្សារផ្សេងរហូតទៅដល់ ៧ ដង។ តម្លៃឧស្ម័នខ្ពស់ក៏ធ្វើឱ្យតម្លៃអគ្គិសនីកើនឡើងផងដែរ ធ្វើឱ្យអឺរ៉ុបបិទរោងចក្រដែលប្រើប្រាស់ថាមពលច្រើនដូចជារោងចក្រជី និងរោងចក្រលោហៈ ជាបណ្ដោះអាសន្ន។
រុស្សុីក៏បានធ្វើឱ្យបញ្ហានេះកាន់តែលំបាក។ នៅឆ្នាំនេះរុស្ស៊ីបាននាំចេញឧស្ម័ននៅកម្រិតទាបជាងឆ្នាំមុនៗ ហើយឃ្លាំងឧស្ម័នគ្រប់គ្រងដោយក្រុមហ៊ុនរដ្ឋរុស្ស៊ី បានរក្សាកម្រិតស្តុកទុកទាបបំផុត។
ប្រទេសរុស្ស៊ីផ្គត់ផ្គង់ប្រហែល ១ ភាគ ៣ នៃឧស្ម័នធម្មជាតិរបស់អឺរ៉ុបហើយភាពលេចធ្លោរបស់ខ្លួនជាអ្នកផ្គត់ផ្គង់បានកើនឡើងបន្ថែមទៀត ខណៈដែលទិន្នផលក្នុងស្រុករបស់ទ្វីបនេះបានធ្លាក់ចុះ។
ផលិតកម្មនៅប្រទេសហូឡង់ ដែលធ្លាប់ជាប្រទេសផលិតឧស្ម័នធំមួយនៅក្នុងសហភាពអឺរ៉ុប បានធ្លាក់ចុះយ៉ាងខ្លាំង ខណៈពេលដែលរដ្ឋាភិបាលហូឡង់បានបិទជាបណ្ដើរៗ អណ្ដូង Groningen ដ៏ធំ ដើម្បីឆ្លើយតបទៅនឹងការរញ្ជួយដីដែលបណ្ដាលមកពីការបូមឧស្ម័ន។
ការប្រើប្រាស់ឧស្ម័នធម្មជាតិក៏កំពុងកើនឡើងផងដែរ ខណៈដែលប្រទេសសហភាពអឺរ៉ុបដូចជាអាល្លឺម៉ង់ធ្វើការបិទរោងចក្រអគ្គិសនីដើរដោយថាមពលធ្យូងថ្ម និងនុយក្លេអ៊ែរដើម្បីបំពេញគោលដៅបរិស្ថានរបស់ពួកគេ។
បើទោះបីជាសហភាពអឺរ៉ុបព្យាយាមធ្វើការវិនិយោគលើប្រភពថាមពលកកើតវិញ ដូចជាខ្យល់ និងពន្លឺព្រះអាទិត្យពួកគេគឺនៅរំពឹងលើប្រភពថាមពលចាស់ដដែល ហើយឧស្ម័នធម្មជាតិគឺជាប្រភពគួរឱ្យទាក់ទាញជាងគេ។
ក្រៅពីបំពង់ក្រោមសមុទ្របំពង់បង្ហូរសំខាន់ៗមួយចំនួន គឺឆ្លងកាត់ប្រទេសអ៊ុយក្រែន។ អ្នកវិភាគមួយចំនួនបាននិយាយថា បំពង់ទាំងនេះអាចរងការខូចខាត ឬការបិទប្រសិនបើរុស្ស៊ីសម្រេចធ្វើការឈ្លានពានចូលប្រទេសអ៊ុយក្រែន។
ក្រៅពីការផ្ទុះសង្គ្រាមរុស្ស៊ី អាចកាត់ផ្ដាច់ការផ្គត់ផ្គង់ជាការឆ្លើយតបទណ្ឌកម្មសេដ្ឋកិច្ចដែលសហរដ្ឋអាមេរិក និងប្រទេសលោកខាងលិចផ្សេងទៀតបានសន្យានឹងដាក់ក្នុងករណីមានការឈ្លានពាន។
បើទោះជាយ៉ាងនេះក៏ដោយរុស្ស៊ីនឹងមានការប្រុងប្រយ័ត្នចំពោះការចាត់វិធានការយ៉ាងខ្លាំងបែបនេះប្រឆាំងនឹងអ្វីដែលជាអតិថិជនសំខាន់បំផុតរបស់ពួកគេ។ ការធ្វើដូច្នេះនឹងធ្វើឱ្យប្រភពចំណូលសំខាន់មួយប្រឈមនឹងហានិភ័យ។ អឺរ៉ុបគឺរំពឹងយ៉ាងខ្លាំងទៅលើឧស្ម័នរុស្ស៊ី ប៉ុន្តែរុស្សុីក៏រំពឹងយ៉ាងខ្លាំងទៅលើចំណូលបានពីអឺរ៉ុបដែលជាទីផ្សារមួយពិបាកស្វែងរកអ្វីមកជំនួសបាន។
ចុងក្រោយ វិបត្តិថាមពលអឺរ៉ុប និងវិបត្តិអ៊ុយក្រែនគឺនឹងប៉ះពាល់យ៉ាងខ្លាំងក្នុងទំនាក់ទំនងអ្នកប្រើប្រាស់ និងអ្នកផ្គត់ផ្គង់ របស់រុស្ស៊ី និងសហភាពអឺរ៉ុប។ វិបត្តិនេះបានធ្វើឱ្យខូចខាតរូបភាពរបស់រុស្ស៊ីជាអ្នកផ្គត់ផ្គង់ដែលអាចទុកចិត្តបាន ហើយអាចជំរុញឱ្យអឺរ៉ុបទៅស្វែងរកប្រភពថាមពលថ្មី៕