.jpg)
លោកប្រធានាធិបតី សឺជីអូ ម៉ាតារ៉េឡា ថ្លែងសុន្ទរកថា ក្រោយពីលោកជាប់ឆ្នោតជាថ្មី។ រូបថត AFP
កាលពីថ្ងៃសៅរ៍ ទី ២៩ មករា បន្ទាប់ពីការចរចាខាងក្រៅឆាកដ៏ច្របូកច្របល់មួយសមាជិកសភាបានសម្រេចជ្រើសរើសប្រធានាធិបតីបច្ចុប្បន្ន លោក សឺជីអូ ម៉ាតារ៉េឡា ឱ្យបន្តកាន់តំណែងក្នុងអាណត្តិទី២ របស់លោក ដែលការសម្រេចបែបនេះ នឹងរក្សាស្ថានភាពដដែល ចៀសវាងការបោះឆ្នោតមុនអាណត្តិ និងការអូសបន្លាយរយៈពេលនៃស្ថិរភាពបច្ចុប្បន្នរបស់អ៊ីតាលីក្រោមការដឹកនាំរបស់លោកនាយករដ្ឋមន្ត្រី ម៉ារីអូដ្រាហ្គី។
លោក ម៉ាតារ៉េឡា ដែលមានអាយុ ៨០ ឆ្នាំ និងបានបង្ហាញភាពស្ទាក់ស្ទើរក្នុងការបន្តកាន់តំណែង បានក្លាយជាបេក្ខជនឈានមុខគេ បន្ទាប់ពីការជាប់គាំងរយៈពេល ៦ ថ្ងៃក្នុងសភាអ៊ីតាលីខណៈពេលដែលគណបក្សនយោបាយក្នុងសម្ព័ន្ធ កាន់អំណាចបានបរាជ័យក្នុងការព្រមព្រៀងលើបេក្ខជនណាមួយ។ ភាពជាប់គាំងនេះបានបង្ហាញយ៉ាងច្បាស់អំពីនយោបាយប្រេះស្រាំ និងការបែកបាក់ដែលនៅពីក្រោមផ្ទៃនៃរដ្ឋាភិបាលរួបរួមជាតិរបស់អ៊ីតាលី។
ភាពបែកបាក់ក្នុងនយោបាយអ៊ីតាលី គឺមិនមែនជារឿងថ្មីទេ ប៉ុន្តែការបោះឆ្នោតត្រូវបានឃ្លាំមើលយ៉ាងដិតដល់ ពីព្រោះលទ្ធផលរបស់វាមានសក្ដានុពលក្នុងការកំណត់ថា តើលោកនាយករដ្ឋមន្ត្រី ដ្រាហ្គី អាចនឹងបន្តក្នុងអាជីពនយោបាយ ឬក្លាយជាជនរងគ្រោះក្នុងភាពចលាចលនយោបាយ។
ក្នុងជំនួបប្រជុំកាលពីព្រឹកថ្ងៃសៅរ៍ លោក ដ្រាហ្គី ដែលក៏ជាបេក្ខជនប្រធានាធិបតីផងដែរ បានធ្វើការបញ្ចុះបញ្ចូលលោក ម៉ាតារ៉េឡា ដោយផ្ទាល់ឱ្យបន្តកាន់តំណែង បន្ទាប់ពីការជាប់គាំងនយោបាយដោយសារលទ្ធផលមិនមានអ្នកឈ្នះជាច្រើនដងបានធ្វើឱ្យខូចកិត្តិយសដល់បេក្ខជនសំខាន់ៗមួយចំនួនដូចជាប្រធានព្រឹទ្ធសភាអ៊ីតាលី និងរដ្ឋមន្ត្រីក្រសួងយុត្តិធម៌។
បន្ទាប់ជំនួបជាមួយលោក ម៉ាតារ៉េឡា លោក ដ្រាហ្គី បានទំនាក់ទំនងប្រធានគណបក្សនានាក្នុងសម្ព័ន្ធភាពកាន់អំណាចរបស់លោក ដើម្បីចរចាការជ្រើសរើសប្រធានាធិបតី។ ក្នុងការបោះឆ្នោតជុំទី៨ លោក ម៉ាតារ៉េឡា បានទទួលសំឡេងគាំទ្រ ៧៥៩ លើ ១ ០០៩ លើសពីគ្រប់គ្រាន់សម្រាប់ទទួលជ័យជម្នះ។
ការជ្រើសរើសលោក ម៉ាតារ៉េឡា ឱ្យបន្តកាន់តំណែងបានបង្កើនលទ្ធភាពរបស់លោក ដ្រាហ្គី ក្នុងការបន្តកាន់តំណែងជានាយករដ្ឋមន្ត្រីរហូតដល់ការបោះឆ្នោតខែកុម្ភៈ ឆ្នាំ ២០២៣។
អ្នកគាំទ្រលោក ដ្រាហ្គី ចង់ឃើញលោកក្លាយជាប្រធានាធិបតី ទោះជាតំណែងមានអំណាចប្រចាំថ្ងៃតិចជាងតំណែងនាយករដ្ឋមន្ត្រីក៏ដោយ។ ពួកគេមើលឃើញលោក ដ្រាហ្គី ថា អ្នកបង្កើតឱ្យមានស្ថិរភាពក្នុងប្រទេសអ៊ីតាលី ហើយប្រសិនបើលោកក្លាយជាប្រធានាធិបតី លោកនឹងអាចជួយបន្តស្ថិរភាពនេះហួសការបោះឆ្នោតឆ្នាំ ២០២៣។
ការជ្រើសរើសលោក ម៉ាតារ៉េឡា គឺជាជម្រើសទី២ របស់ពួកគេ ដោយសារពួកគេមើលឃើញថា លោក ម៉ាតារ៉េឡា មានសមត្ថភាពរក្សាស្ថានភាពឱ្យនៅដដែល និងរារាំងភាពចលាចលក្នុងនយោបាយអ៊ីតាលី ហើយអាចជួយបើកទ្វារសម្រាប់លោក ដ្រាហ្គី ឱ្យស្នងតំណែងពីលោក។
អ្នកវិភាគមួយចំនួនលើកឡើងថា នៅពេលដែលនយោបាយអ៊ីតាលីកាន់តែមានស្ថិរភាព លោក ម៉ាតារ៉េឡា អាចលាលែងពីតំណែងនៅដើមអាណត្តិទី២ របស់លោក ហើយបើកផ្លូវឱ្យសភាតែងតាំងលោក ដ្រាហ្គី ជាប្រធានាធិបតី។
ខុទ្ទកាល័យលោក ដ្រាហ្គី បាននិយាយថា អ្នកទាំង ២ មិនពិភាក្សាអំពីរឿងនេះទេ។
លោក ម៉ាតារ៉េឡា បានបញ្ជាក់ជាច្រើនសាថា លោកមិនចង់បន្តកាន់តំណែងជាប្រធានាធិបតីនោះទេ ហើយបានចាប់ផ្ដើមរើគេហដ្ឋានចេញពីវិមានប្រធានាធិបតីទៅកាន់ផ្ទះថ្មីមួយនៅក្រុងរ៉ូម។ ប៉ុន្តែការបរាជ័យក្នុងការជ្រើសរើសបេក្ខជនថ្មី បានបង្ខំឱ្យលោកធ្វើបែបនេះ៕
វីដេអូ៖
