.jpg)
ការប្រមូលផ្ដុំទាហានរុស្ស៊ីជិត ១០០ ០០០ នាក់ នៅតំបន់ព្រំដែនជាមួយប្រទេសអ៊ុយក្រែន រួមមានការដាក់ពង្រាយឃ្លាំងឈាមសម្រាប់ទាហានដែលរងរបួស។ នេះបើតាមការរាយការណ៍របស់សារព័ត៌មាន Reuters ផ្អែកលើប្រភពជាមន្ត្រីអាមេរិកចំនួន៣រូប ដែលបានលើកឡើងថា ព័ត៌មានលម្អិតនេះបង្ហាញថា រុស្ស៊ីកំពុងត្រៀមវាយប្រហារប្រទេសជិតខាង។
អ្នកវិភាគនិយាយថា សូចនាករដូចជាការដាក់ពង្រាយឃ្លាំងឈាម គឺសំខាន់ណាស់សម្រាប់វិភាគថា តើរុស្សុី នឹងធ្វើការឈ្លានពានចូលប្រទេសអ៊ុយក្រែន ដែរឬទេ។ រដ្ឋាភិបាលរុស្ស៊ីនៅមិនទាន់ធ្វើការអត្ថាធិប្បាយទៅលើការអះអាងបែបនេះនៅឡើយទេ។
ការរាយការណ៍នេះ បានកើតឡើងបន្ទាប់ពីប្រធានាធិបតីរុស្សុី លោក វ្ល៉ាឌីមៀរ ពូទីន បានធ្វើការសន្ទនាតាមទូរស័ព្ទជាមួយប្រធានាធិបតីបារាំង លោក អេម៉ានុយអែល ម៉ាក្រុង ដែលក្នុងនោះលោក ពូទីន បាននិយាយថា លោកខាងលិចមិនបានដោះស្រាយការព្រួយបារម្ភសន្តិសុខរបស់ក្រុងម៉ូស្គូ ប៉ុន្តែលោកក៏និយាយថា លោកត្រៀមខ្លួនដើម្បីបន្តការចរចា។
ការទាមទារធានាសន្តិសុខរុស្ស៊ីរួមមានការបញ្ឈប់ការពង្រីកសមាជិកភាពអង្គការណាតូ ការហាមឃាត់ការដាក់ពង្រាយអាវុធធុនធំនៅជិតព្រំដែនរុស្ស៊ី និងការស្ដារស្ថានភាពអង្គការណាតូឱ្យដូចមុនការចូលរួមរបស់ប្រទេសអឺរ៉ុបខាងកើតដូចជាប៉ូឡូញ ឡេតូនី លីទុយអានី និងអេស្តូនី។ សហរដ្ឋអាមេរិក និងអង្គការណាតូបានច្រានចោលការទាមទារមួយចំនួនរបស់រុស្ស៊ី ប៉ុន្តែបើកទ្វារឱ្យមានការចរចាការទាមទារមួយចំនួន។
វិមានក្រឹមឡាំងបាននិយាយថា ពួកគេនឹងសិក្សាការឆ្លើយតបជាលាយលក្ខណ៍អក្សររបស់សហរដ្ឋអាមេរិក និងអង្គការណាតូចំពោះការទាមទាររបស់ពួកគេ មុននឹងសម្រេចចិត្តលើសកម្មភាពបន្តទៀត៕
វីដេអូ៖
