.jpg)
សហរដ្ឋអាមេរិក និងរុស្ស៊ី បានប្រឈមដាក់គ្នានៅក្រុមប្រឹក្សាសន្តិសុខអង្គការសហប្រជាជាតិជុំវិញវិបត្តិនៅប្រទេសអ៊ុយក្រែន ដោយភាគីអាមេរិកព្រមានថា នឹងមានសង្គ្រាម «គួរឱ្យរន្ធត់» ប្រសិនបើរុស្ស៊ីសម្រេចចិត្តឈ្លានពានប្រទេសជិតខាង ខណៈពេលដែលភាគីរុស្ស៊ី បានច្រានចោលថា នឹងមិនមានជម្លោះយោធាទេ។
យោធារុស្ស៊ី បានធ្វើការប្រមូលផ្ដុំទាហានជាង ១០០ ០០០ នាក់នៅតំបន់ព្រំដែនអ៊ុយក្រែន ធ្វើឱ្យមានវិបត្តិការទូត និងធ្វើឱ្យកើនឡើងការព្រួយបារម្ភក្នុងចំណោមប្រទេសលោកខាងលិចថារុស្សីគឺកំពុងត្រៀមធ្វើការឈ្លានពានចូលប្រទេសអ៊ុយក្រែន។ រុស្ស៊ី បានច្រានចោលថា ខ្លួនគ្មានផែនការបែបនេះទេ ប៉ុន្តែបានធ្វើការទាមទារការធានាសន្តិសុខមួយចំនួនពីលោកខាងលិច ដែលរួមមានការបញ្ឈប់ការពង្រីកសមាជិកភាពអង្គការណាតូមកកាន់អឺរ៉ុបខាងកើត ជាពិសេសប្រទេសអ៊ុយក្រែន។
កាលពីថ្ងៃចន្ទ ទី៣១ មករា ឯកអគ្គរដ្ឋទូតអាមេរិកប្រចាំអង្គការសហប្រជាជាតិលោកស្រីលីនដា ថូម៉ាស-ហ្គ្រីនហ្វីល បានប្រាប់សម័យប្រជុំបើកពិសេសនៃក្រុមប្រឹក្សាសន្តិសុខថា ផែនការរបស់រុស្ស៊ី ដើម្បីឈ្លានពានប្រទេសអ៊ុយក្រែន គឺនឹងគំរាមកំហែងដល់សន្តិសុខពិភពលោក។ លោកស្រីនិយាយថាសកម្មភាពរបស់រុស្ស៊ី គឺជាការ «វាយប្រហារចំបេះដូងនៃធម្មនុញ្ញអង្គការសហប្រជាជាតិ» និងជា «ការគំរាមកំហែងយ៉ាងច្បាស់» ដល់សន្តិភាព និងសន្តិសុខ។
ឯកអគ្គរដ្ឋទូតរុស្ស៊ីប្រចាំអង្គការសហប្រជាជាតិលោកវ៉ាស៊ីលី នេបេនហ្សី បានចោទប្រកាន់សហរដ្ឋអាមេរិក និងសម្ព័ន្ធមិត្តរបស់ពួកគេថាកំពុងបំផ្លើសការគំរាមកំហែងនៃការផ្ទុះសង្គ្រាម បើទោះបីជារុស្ស៊ីបានច្រានចោលម្ដងហើយម្ដងទៀតថា ខ្លួនគ្មានផែនការធ្វើការឈ្លានពានទេ។ លោកនិយាយថាការអះអាងម្ដងហើយម្ដងទៀតរបស់លោកខាងលិច គឺហាក់ដូចជាពួកគេពិតជា «ចង់វាកើតឡើង» ចង់ឱ្យ «ពាក្យពួកគេក្លាយជាការពិត»៕
