ទីក្រុងកៀវត្រូវបានប្រជាជនរស់នៅទីនោះប្រៀបធៀបទៅនឹងភ្នែកនៃខ្យល់ព្យុះ ដែលជាចំណុចនៃភាពស្ងប់ស្ងាត់ឡោមព័ទ្ធដោយភាពចលាចល។ ជីវិតនៅក្នុងរដ្ឋធានីអ៊ុយក្រែនដំណើរការដូចធម្មតា ប៉ុន្តែការព្រួយបារម្ភគឺកំពុងតែកើនឡើង។
អស់រយៈពេលជាច្រើនសប្ដាហ៍មកហើយ ដែលសហរដ្ឋអាមេរិកបានធ្វើការព្រមានអំពីការឈ្លានពានដោយកងកម្លាំងរុស្ស៊ីជាង ១០០ ០០០ នាក់ ដែលបានប្រមូលផ្ដុំនៅជិតព្រំដែនជាមួយប្រទេសអ៊ុយក្រែន។ ប៉ុន្តែបន្ទាប់ពីឆ្លងកាត់សង្គ្រាមជិត ៨ ឆ្នាំ ដែលចាប់ផ្ដើមដោយការកាត់យកឧបទ្វីបគ្រីមាដោយរុស្ស៊ី និងការផ្ទុះសង្គ្រាមផ្ដាច់ខ្លួននៅខាងកើតប្រទេស ប្រជាជនអ៊ុយក្រែនភាគច្រើន គឺមិនខ្លាច ឬមិនជឿការលើកឡើងអំពីការឈ្លានពានដោយរុស្ស៊ី។
ការព្រួយបារម្ភ បានកើតឡើងដំបូងក្នុងចំណោមប្រជាជនអ៊ុយក្រែន ដែលនិយាយភាសាអង់គ្លេស ដែលបានទទួលយកព័ត៌មានពីសារព័ត៌មានលោកខាងលិច ឬមិត្តភក្ដិ និងគ្រួសារនៅបរទេស។ សាលាអន្តរជាតិចំនួន ២ នៅក្រុងកៀវបានបិទទ្វារ។ ប៉ុន្តែឥឡូវនេះការព្រួយបារម្ភដែលត្រូវបានសង្កត់ធ្ងន់ម្ដងហើយម្ដងទៀត ដោយលោកខាងលិចបានចាប់ផ្ដើមជ្រៀតជ្រែកចូលក្នុងចំណោមប្រជាជនទូទៅនៃប្រទេសអ៊ុយក្រែន។
គេសង្កេតឃើញមានសញ្ញាតិចតួចអំពីការភ័យស្លន់ស្លោទិញស្បៀង និងផលិតផលប្រើប្រាស់នៅប្រទេសអ៊ុយក្រែន។ ប៉ុន្តែប្រជាជនអ៊ុយក្រែនមួយចំនួន បាននិយាយថា ពួកគេបានរៀបចំផែនការសម្រាប់គ្រាអាសន្ន ដូចជាការរៀបបង្វេច បំពេញធុងសាំងរបស់រថយន្ត និងរៀបចំចំណុចណាត់ជួប សម្រាប់ការជម្លៀស។ គ្រួសារមួយចំនួនគឺកំពុងពិចារណាផ្លាស់លំនៅទៅកាន់ក្រុងល្វីវ ដែលនៅភាគខាងលិចបំផុតនៃប្រទេសអ៊ុយក្រែន។
ការសម្រេចចិត្តរបស់ស្ថានទូតអាមេរិក និងអង់គ្លេសកាលពីសប្ដាហ៍មុន ដើម្បីជម្លៀសបុគ្គលិកមិនចាំបាច់ និងក្រុមគ្រួសារស្ថាន-ទូតបានបង្កើនការព្រួយបារម្ភក្នុងចំណោមប្រជាជនអ៊ុយក្រែន។ វាក៏បានធ្វើឱ្យរដ្ឋាភិបាលអ៊ុយក្រែនខឹងសម្បាផងដែរ ដោយពួកគេព្យាយាមរក្សាភាពស្ងប់ និងកាត់បន្ថយការព្រួយបារម្ភអំពីវិបត្តិនេះ។
ថ្លែងកាលពីថ្ងៃសុក្រ ប្រធានាធិបតីអ៊ុយក្រែនលោក វ៉ុលឌីមៀរ ហ្សេលេនស្គី បានព្យាយាមកាត់បន្ថយការព្រួយបារម្ភអំពីការឈ្លានពានដោយនិយាយថា «យើងយល់ពីអ្វីដែលជាហានិភ័យ»ហើយ «យើងមិនឃើញមានការកើនឡើងធំជាងនេះទេ»។
ភ្នាក់ងារទេសចរណ៍អ៊ុយក្រែន បានប្រកាន់យកពាក្យស្លោកមួយថា៖ «ធ្វើឱ្យស្ងប់ ហើយមកទស្សនាអ៊ុយក្រែន»។
ជំហរផ្លូវការរបស់រដ្ឋាភិបាលអ៊ុយក្រែន បានបង្ហាញចន្លោះក្នុងការយល់ឃើញអំពីវិបត្តិនេះរវាងពួកគេ និងលោកខាងលិច ហើយធ្វើឱ្យមានសំណួរថា៖ ហេតុអ្វីបានជាប្រទេសដែលធ្លាប់បានបាត់បង់ទឹកដីទៅកាន់រុស្សី ឥឡូវនេះមិនសូវអើពើនឹងការគំរាមកំហែង?
អ្នកវិភាគមួយចំនួនបាននិយាយថា លោក ហ្សេលេនស្គី គឺមានការព្រួយបារម្ភអំពីវិបត្តិសេដ្ឋកិច្ចច្រើនជាងការឈ្លានពានពីរុស្ស៊ី។
នៅឆ្នាំនេះអត្រាអតិផរណារបស់អ៊ុយក្រែនបានកើនដល់ ១០ ភាគរយ។ តម្លៃរូបិយប័ណ្ណរបស់អ៊ុយក្រែនបានធ្លាក់ចុះ ៦ ភាគរយធៀបនឹងដុល្លារអាមេរិក។ រោងចក្រជាច្រើនបានប្រឈមមុខនឹងកើនឡើងតម្លៃថាមពល។ កាលពីឆ្នាំមុនអ៊ុយក្រែន បានស្តុកទុកឧស្ម័នធម្មជាតិគ្រប់គ្រាន់សម្រាប់ប្រើប្រាស់មុនពេលការកើនឡើងតម្លៃ ប៉ុន្តែប្រទេសនេះនឹងត្រូវចំណាយប្រាក់រាប់ពាន់លានបន្ថែមទៀត ដើម្បីស្តុកទុកឧស្ម័នសម្រាប់រដូវរងាខាងមុខ។ វិនិយោគិនបរទេសបានមានភាពភ័យស្លន់ស្លោ ហើយបានកាត់បន្ថយការវិនិយោគរបស់ពួកគេធ្វើឱ្យអ៊ុយក្រែនស្ទើរតែបាត់បង់ទីផ្សារទុនវិនិយោគ។
អ្នកគាំទ្រលោកហ្សេលេនស្គីនិយាយថា ការខូចខាតសេដ្ឋកិច្ចគឺជាផ្នែកមួយនៃយុទ្ធនាការរបស់រុស្ស៊ី ដើម្បីធ្វើឱ្យអ៊ុយក្រែនមានអស្ថិរភាព។ ភាពលំបាកខាងសេដ្ឋកិច្ចអាចជួយក្រុងម៉ូស្គូបង្វែរជនជាតិអ៊ុយក្រែនឱ្យប្រឆាំងនឹងរដ្ឋាភិបាលរបស់ពួកគេ៕