សមាជិកព្រឹទ្ធសភាអាមេរិកមួយក្រុមដែលកំពុងចរចាលើសេចក្ដីព្រាងច្បាប់ដាក់ទណ្ឌកម្មលើរុស្ស៊ី បានឈានដល់ចំណុចខ្វែងគំនិត ខណៈពេលដែលពួកគេព្យាយាមធ្វើការបង្ហើយកិច្ចព្រមព្រៀងទ្វេបក្ស។
កាលពីថ្ងៃអង្គារ ប្រធានគណៈកម្មាធិការទំនាក់ទំនងការបរទេសនៃព្រឹទ្ធសភាអាមេរិកលោករ៉ូបឺត ម៉ានេនដេសបាននិយាយថា ចំណុចខ្វែងគំនិតធំជាងគេចំនួន២រវាងសមាជិកព្រឹទ្ធសភាគឺការដាក់ទណ្ឌកម្មលើបំពង់បង្ហូរឧស្ម័ន Nord Stream 2 ដែលអាចប៉ះពាល់ប្រទេសអាល្លឺម៉ង់ និងពេលចាប់ផ្ដើមការដាក់ទណ្ឌកម្មលើរុស្ស៊ី ដោយគណបក្សសាធារណរដ្ឋចង់ឱ្យឆាប់បំផុតដើម្បីរារាំងការវាយប្រហារណាមួយដោយរុស្ស៊ី។ បើទោះជាយ៉ាងនេះក៏ដោយលោកនិយាយថាសមាជិកព្រឹទ្ធសភាមានកាលមូលមតិគ្នាលើចំណុចជាច្រើន ហើយលោកសង្ឃឹមថា គេនឹងទទួលការសម្រេច។
កាលពីមុនលោកម៉ានេនដេស បានស្នើច្បាប់មួយដែលនឹងដាក់ទណ្ឌកម្មលើរុស្ស៊ី ប្រសិនបើមានការកើនការគំរាមកំហែងទៅលើប្រទេសអ៊ុយក្រែន។ ប៉ុន្តែសមាជិកមកពីគណបក្សសាធារណរដ្ឋចង់ឱ្យមានការដាក់ទណ្ឌកម្មភ្លាមៗ បន្ទាប់ពីច្បាប់ចូលជាធរមាន។
ស្រដៀងគ្នាផងដែរ គណបក្សសាធារណរដ្ឋចង់ដាក់ទណ្ឌកម្មភ្លាមៗលើបុគ្គល និងអាជីវកម្មពាក់ព័ន្ធគម្រោងបំពង់ឧស្ម័ន Nord Stream 2 ដែលតភ្ជាប់ពីរុស្ស៊ី ទៅកាន់អាល្លឺម៉ង់ ប៉ុន្តែគណបក្សប្រជាធិបតេយ្យគាំទ្រការដាក់ទណ្ឌកម្មប្រសិនបើមានការឈ្លានពាន៕