.jpg)
ក្រសួងការពារជាតិអាមេរិកបានប្រកាសថាលោកប្រធានាធិបតី ចូ បៃដិន បានអនុម័តការដាក់ពង្រាយទាហានអាមេរិកចំនួន ៣០០០ នាក់ទៅកាន់ប្រទេសប៉ូឡូញ អាល្លឺម៉ង់ និងរ៉ូម៉ានី ក្នុងការពង្រឹងការការពារសមាជិកអង្គការណាតូនៅអឺរ៉ុប។ AFP
កាលពីថ្ងៃពុធ ទី២ កុម្ភៈ ក្រសួងការពារជាតិអាមេរិកបានប្រកាសថាលោកប្រធានាធិបតី ចូ បៃដិន បានអនុម័តការដាក់ពង្រាយទាហានអាមេរិកចំនួន ៣០០០ នាក់ទៅកាន់ប្រទេសប៉ូឡូញ អាល្លឺម៉ង់ និងរ៉ូម៉ានី ក្នុងការពង្រឹងការការពារសមាជិកអង្គការណាតូនៅអឺរ៉ុប ខណៈពេលដែលរុស្ស៊ីប្រមូលផ្ដុំទាហានជាង ១០០ ០០០ នាក់នៅព្រំដែនជាប់ជាមួយនឹងប្រទេសអ៊ុយក្រែន។
អ្នកនាំពាក្យក្រសួងការពារជាតិអាមេរិកលោកចន ឃ័រប៊ី បាននិយាយថាការដាក់ពង្រាយនេះរួមមានការដាក់ពង្រាយទាហាន ២០០០ នាក់ទៅកាន់ប្រទេសប៉ូឡូញ និងអាល្លឺម៉ង់ ខណៈពេលដែលទាហានអាមេរិក ១០០០ នាក់ផ្សេងទៀត ដែលមានមូលដ្ឋាននៅអាល្លឺម៉ង់ នឹងធ្វើដំណើរទៅកាន់ប្រទេសរ៉ូម៉ានី។
កងកម្លាំងខាងលើនឹងសហប្រតិបត្តិការជាមួយប្រទេសម្ចាស់ផ្ទះ ក្រោមមូលដ្ឋានទ្វេភាគី ខណៈពេលដែលអង្គការណាតូមិនទាន់សម្រេចចិត្តធ្វើការចល័តទ័ព។ លោក ឃ័រប៊ី បានសង្កត់ធ្ងន់ថានេះគឺមិនជាការពង្រាយអចិន្ត្រៃយ៍ទេ ហើយកងកម្លាំងទាំងនេះនឹងមិនចូលរួមក្នុងការប្រយុទ្ធក្នុងប្រទេសអ៊ុយក្រែនទេ។
លោក បៃដិន បានអនុម័តផែនការនេះ បន្ទាប់ធ្វើកិច្ចប្រជុំកាលពីព្រឹកថ្ងៃអង្គារជាមួយរដ្ឋមន្ត្រីក្រសួងការពារជាតិអាមេរិកលោកឡូយដ៍ អូស្ទីន និងប្រធានគណៈនាយសេនាធិការចម្រុះនៃកងយោធពលសហរដ្ឋអាមេរិកលោកនាយឧត្ដមសេនីយ៍ម៉ាក មីលី។
អ្នកនាំពាក្យរដ្ឋាភិបាលរុស្ស៊ីលោកឌីមេទ្រី ប៉េស្កូវនិយាយថា «សហរដ្ឋអាមេរិក គឺពិតជាកំពុងបន្តបង្កើនភាពតានតឹងនៅអឺរ៉ុប។ លោកប៉េស្កូវបាននិយាយថាការដាក់ពង្រាយនេះគឺជា «ភ័ស្តុតាងដ៏ល្អបំផុតដែលថាយើង ក្នុងនាមជារុស្ស៊ី មានហេតុផលច្បាស់លាស់សម្រាប់ព្រួយបារម្ភ»។
យ៉ាងណាមិញ ការដាក់ពង្រាយទាហាន ៣០០០ នាក់ខាងលើ គឺផ្សេងពីទាហាន ៨៥០០ នាក់ ដែលអាមេរិកត្រៀមសម្រាប់ពេលដែលអង្គការណាតូសម្រេចធ្វើការចល័តកងកម្លាំងប្រតិកម្មពហុជាតិ ដូច្នេះមានន័យថាការដាក់ពង្រាយទាហានអាមេរិកទៅកាន់អឺរ៉ុបអាចកើនឡើងបន្ថែមទៀត៕
