កាលពីថ្ងៃសៅរ៍ ទី ៥ កុម្ភៈ ទ័ពអាមេរិកដំបូង ដែលត្រូវដាក់ពង្រាយសម្រាប់ពង្រឹងការការពារសមាជិកអង្គការណាតូនៅអឺរ៉ុបខាងកើត បានធ្វើដំណើរមកដល់មូលដ្ឋានយោធាមួយនៅភាគអាគ្នេយ៍នៃប្រទេសប៉ូឡូញ ខណៈពេលដែលភាពតានតឹង កំពុងកើនឡើងជុំវិញការប្រមូលផ្ដុំទាហានរុស្ស៊ីនៅជិតព្រំដែនប្រទេសអ៊ុយក្រែន។
យោធាប៉ូឡូញ បាននិយាយថាយន្តហោះតូច១ ដែលដឹកជញ្ជូនបុគ្គលិកបញ្ជាការដ្ឋានក្រុមកងពលតូច នៃកងពលធំឆត្រយោងលេខ ៨២ របស់សហរដ្ឋអាមេរិក បានចុះចតនៅអាកាសយានដ្ឋានRzeszow-Jasionkaដែលមានទីតាំងជិតនឹងព្រំដែនប៉ូឡូញ-អ៊ុយក្រែន។
កងទ័ពជើងគោកអាមេរិកក៏បានបញ្ជាក់ផងដែរថាមេបញ្ជាការនៃកងពលធំឆត្រយោងលេខ ៨២ លោកឧត្ដមសេនីយ៍ទោគ្រីស្តូហ្វឺរ ដូណាហ៊ូ ក៏បានធ្វើដំណើរទៅដល់ប្រទេសប៉ូឡូញផងដែរ។
កាលពីថ្ងៃពុធ ប្រធានាធិបតីសហរដ្ឋអាមេរិកលោកចូ បៃដិន បានបញ្ជាឱ្យបញ្ជូនទាហានជិត ៣០០០ នាក់ទៅកាន់ប្រទេសប៉ូឡូញ និងរ៉ូម៉ានី ដើម្បីជួយទប់ទល់នឹងការហៀរហូរពីសង្គ្រាមនៅប្រទេសអ៊ុយក្រែន។
ក្នុងរយៈពេលប៉ុន្មានថ្ងៃខាងមុខនេះ ទាហានប្រមាណ ១ ៧០០ នាក់នៃកងពលធំឆត្រយោងលេខ ៨២ នឹងធ្វើដំណើរចេញពីបន្ទាយពួកគេនៅរដ្ឋខារ៉ូលីណាខាងជើងទៅកាន់ប្រទេសប៉ូឡូញ។ បន្ថែមពីលើនេះអាមេរិកនឹងបញ្ជូនកងវរសេនាតូចរថពាសដែកមធ្យម ដែលមានទាហានប្រមាណ ១ ០០០ នាក់ ចេញពីប្រទេសអាល្លឺម៉ង់ទៅកាន់ប្រទេសរ៉ូម៉ានី។
ទាហាន ៣ ០០០ នាក់នេះគឺដាក់ពង្រាយក្រោមមូលដ្ឋានទ្វេភាគី ហើយផ្សេងពីទាហាន ៨៥០០ នាក់ដែលអាមេរិកត្រៀមដាក់ពង្រាយក្នុងករណីដែលអង្គការណាតូសម្រេចធ្វើការចល័តកងកម្លាំងឆ្លើយតបពហុជាតិ។ បណ្ដារដ្ឋមន្ត្រីក្រសួងការពារជាតិនៃសមាជិកណាតូ ត្រូវបានគេរំពឹងថានឹងពិភាក្សាអំពីការដាក់ពង្រាយថែមទៀត ក្នុងជំនួបនៅពាក់កណ្ដាលខែនេះ៕