.jpg)
លោកវ្ល៉ាឌីមៀរ ពីទីន (ឆ្វេង) និង លោកស៊ី ជីនភីង។ AFP
ក្នុងអំឡុងពេលនៃកិច្ចប្រជុំខាងក្រៅពិធីបើកការប្រកួតកីឡាអូឡាំពិកក្រុងប៉េកាំងកាលពីថ្ងៃសុក្រ ទី ៤ កុម្ភៈ ប្រធានាធិបតីរុស្ស៊ី លោក វ្ល៉ាឌីមៀរ ពូទីន និងប្រធានាធិបតីចិនលោកស៊ី ជីនភីង បានធ្វើការទាមទារឱ្យបញ្ឈប់ការពង្រីកសមាជិកភាពនៃអង្គការណាតូបន្ថែមទៀត។
ជំនួបរវាងមេដឹកនាំទាំង២ គឺជាជំហានមួយបន្ថែមទៀតក្នុងអ្វីដែលកាន់តែក្លាយជាទំនាក់ទំនងជិតស្និទ្ធកាន់តែខ្លាំងឡើងរវាងក្រុងម៉ូស្គូ និងក្រុងប៉េកាំង ខណៈពេលដែលទំនាក់ទំនងជាមួយលោកខាងលិចកាន់តែយ៉ាប់យ៉ឺនសម្រាប់ប្រទេសទាំង ២។
ក្រសួងការបរទេសចិនបាននិយាយថាមេដឹកនាំទាំង២បាន «មានការផ្លាស់ប្តូរទស្សនៈស៊ីជម្រៅ និងហ្មត់ចត់លើទំនាក់ទំនងចិន-រុស្ស៊ី និងបញ្ហាសំខាន់ៗជាបន្តបន្ទាប់ទាក់ទងនឹងសន្តិសុខ និងស្ថិរភាពជាយុទ្ធសាស្ត្រអន្តរជាតិ»
យោងតាមកំណែជាភាសាអង់គ្លេសនៃសេចក្ដីថ្លែងការណ៍រួម ដែលចេញផ្សាយដោយវិមានក្រឹមឡាំង ប្រទេសទាំង២ «ជឿថារដ្ឋមួយចំនួន សម្ព័ន្ធភាពយោធា និងនយោបាយ កំពុងស្វែងរកដើម្បីទទួលបានផលប្រយោជន៍យោធាឯកតោភាគីដោយផ្ទាល់ ឬដោយប្រយោល ដោយការបំផ្លាញសន្តិសុខរបស់អ្នកដទៃ»។
សេចក្ដីថ្លែងការណ៍នេះក៏និយាយថា ចិន និងរុស្ស៊ី ក៏ «ប្រឆាំងនឹងការពង្រីកបន្ថែមទៀតនៃអង្គការណាតូ ហើយអំពាវនាវឱ្យសម្ព័ន្ធភាពអាត្លង់ទិកខាងជើងបោះបង់វិធីសាស្ត្រតាមមនោគមន៍វិជ្ជាសង្គ្រាមត្រជាក់របស់ខ្លួន គោរពអធិបតេយ្យភាព សន្តិសុខ និងផលប្រយោជន៍របស់ប្រទេសដទៃទៀត ភាពចម្រុះនៃអរិយធម៌ វប្បធម៌ និងប្រវត្តិសាស្ត្ររបស់ពួកគេ និងដើម្បី អនុវត្តអាកប្បកិរិយាប្រកបដោយយុត្តិធម៌ និងគោលបំណងឆ្ពោះទៅរកការអភិវឌ្ឍន៍ដោយសន្តិវិធីនៃរដ្ឋដទៃទៀត»។
កិច្ចប្រជុំកំពូលកាលពីថ្ងៃសុក្រ គឺជាជំនួបផ្ទាល់លើកដំបូងរវាងលោកស៊ី និងលោកពូទីន ក្នុងរយៈពេលជាង២ឆ្នាំ ដោយបន្ថែមសារៈសំខាន់លើកិច្ចប្រជុំនេះ៕
