.jpg)
លោកអធិការបតីលោក អូឡាហ្វ សូល ថ្លែងក្នុងសន្និសីទកាសែតក្រោយ ពីជំនួបបិទទ្វារនៃរដ្ឋាភិបាលអាល្លឺម៉ង់។ រូបថត AFP
ចំណងជើងមួយសួរថា «តើលោក អូឡាហ្វ សូល នៅឯណា?» ទស្សនាវដ្ដីដ៏ពេញនិយមមួយបានចំអក «សិល្បៈបំបាំងកាយ» របស់អធិការបតីរូបនេះ។ នៅក្នុងកំណត់ត្រាមួយដែលត្រូវបានបែកធ្លាយ ឯកអគ្គរដ្ឋទូតរបស់លោកប្រចាំក្រុងវ៉ាស៊ីនតោន បានបញ្ជូនសារទៅមាតុភូមិវិញថា ប្រទេសអាល្លឺម៉ង់ ត្រូវបានគេមើលឃើញកាន់តែខ្លាំងឡើងថា ជាសម្ព័ន្ធមិត្តដែលមិនអាចពឹងផ្អែកបាន។
ជាមួយនឹងការគំរាមកំហែងនៃការផ្ទុះសង្គ្រាមនៅអឺរ៉ុប ដោយសារការកើនឡើងភាពតានតឹងក្នុងការប្រឈមមុខដាក់គ្នាជាមួយរុស្ស៊ីលើអ៊ុយក្រែន លោក សូល កាលពីថ្ងៃចន្ទ ទី ៧ កុម្ភៈនេះ បានចេញដំណើរទៅក្រុងវ៉ាស៊ីនតោន សម្រាប់ជំនួបលើកដំបូងជាមួយប្រធានាធិបតីអាមេរិក ចូ បៃដិន ចាប់តាំងពីលោកចូលកាន់តំណែងអធិការបតីអាល្លឺម៉ង់កាលពីខែធ្នូ។ ចំណុចសំខាន់បំផុតសម្រាប់ទស្សនកិច្ចនេះ គឺការបង្ហាញពិភពលោកថា ក្រុងប៊ែរឡាំងនៅតែប្តេជ្ញាចិត្តចំពោះសម្ព័ន្ធភាពលោកខាងលិច ហើយជាការបង្ហាញមុខរបស់លោក។
តិចជាង ២ ខែបន្ទាប់ពីឡើងស្នងតំណែងពីលោកស្រី អេនជេឡា មឺរកែល លោក សូល គឺកំពុងទាក់ទាញការរិះគន់យ៉ាងមុត ចំពោះអ្វីដែលគេមើលឃើញជាកង្វះភាពជាអ្នកដឹកនាំរបស់លោកនៅក្នុងវិបត្តិសន្តិសុខដ៏ធ្ងន់ធ្ងរបំផុតនៅអឺរ៉ុប ចាប់តាំងពីការបញ្ចប់សង្គ្រាមត្រជាក់មក។
រដ្ឋាភិបាលចម្រុះបីគណបក្សរបស់លោកដែលមិនធ្លាប់ពីមុនមកបានបដិសេធមិនបញ្ជូនអាវុធទៅប្រទេសអ៊ុយក្រែន ហើយថ្មីៗនេះបញ្ជូនមួកទាហានចំនួន ៥ ០០០ ទៅជំនួសវិញ។ បន្ថែមពីលើនេះទៅទៀតរដ្ឋាភិបាលនេះក៏មាន ភាពស្ទាក់ស្ទើរក្នុងការបង្ហាញថា ខ្លួននឹងឆ្លើយតបបែបណាប្រសិនបើរុស្ស៊ី ធ្វើការវាយប្រហារប្រទេសអ៊ុយក្រែន។
រីឯលោកអធិការបតីសូលវិញ ក្នុងរយៈពេលប៉ុន្មានសប្ដាហ៍ចុងក្រោយនេះ បានបាត់មុខពីសាធារណ បាត់មុខដល់កម្រិតមួយដែលធ្វើកាសែត Der Spiegle ពិពណ៌នាថាលោកសូល «ស្ទើរតែមើលគេមិនឃើញ គេមិនអាចស្ដាប់ឮ»។
ខណៈពេលដែលប្រធានាធិបតីបារាំងលោក អេម៉ានុយអែល ម៉ាក្រុង និងនាយករដ្ឋមន្ត្រីអ៊ីតាលីលោក ម៉ារីអូ ដាហ្គ្រី មានការមមាញឹកក្នុងការសន្ទនាតាមទូរស័ព្ទជាមួយប្រធានាធិបតីរុស្ស៊ីលោក វ្ល៉ាឌីមៀរ ពូទីន ដើម្បីកាត់បន្ថយភាពតានតឹង មកដល់ពេលនេះលោកសូលនៅមិនទាន់បានលើកទូរស័ព្ទតេទៅក្រុងម៉ូស្គូ ឬធ្វើដំណើរទស្សនកិច្ចនៅឡើយទេ។ លោកក៏មិនបានធ្វើដំណើរទៅក្រុងកៀវប្រទេសអ៊ុយក្រែន ហើយដំណើរទស្សនកិច្ចរបស់លោកទៅក្រុងវ៉ាស៊ីនតោន គឺចំណាយពេលអស់ជិត ២ ខែ ដើម្បីរៀបចំ។
កាលពីសប្ដាហ៍មុន ឯកអគ្គរដ្ឋទូតអាល្លឺម៉ង់ប្រចាំសហរដ្ឋអាមេរិក លោកស្រី អេមីលី ហាប៊ឺ បានបញ្ជូនសារទៅកាន់ក្រុងប៊ែរឡាំង ដើម្បីព្រមានអំពីការខូចខាត «ដ៏ធំ» ដល់កេរ្តិ៍ឈ្មោះរបស់ប្រទេសអាល្លឺម៉ង់។ អ្នកស្រីរាយការណ៍ថា មិនត្រឹមតែស្ថាប័នសារព័ត៌មានទេ សមាជិកសភាអាមេរិកមួយចំនួនក៏បានរិះគន់អាល្លឺម៉ង់ផងដែរ។ លោកស្រីសរសេរថា សមាជិកសភាអាមេរិក ជាពិសេសសមាជិកនៃគណបក្សសាធារណរដ្ឋមានទស្សនៈថា ក្រុងប៊ែរឡាំង គឺកំពុងធ្វើអ្វីគ្រប់យ៉ាងដើម្បីបំពេញចិត្តលោក ពូទីន ដើម្បីធានាការបន្តលំហូរនៃឧស្ម័នធម្មជាតិ។
បន្ទាប់ពីប្រឈមមុខនឹងការរិះគន់កាន់តែខ្លាំងពីក្រុងកៀវ និងរដ្ឋធានីដទៃទៀតនៅអឺរ៉ុបខាងកើត ភាពជាអ្នកដឹកនាំរបស់លោក សូល ក៏កំពុងត្រូវបានគេចោទសួរកាន់តែខ្លាំងឡើងនៅក្នុងស្រុកផងដែរ។
ក្នុងការស្ទង់មតិសាធារណជននាពេលថ្មីៗនេះ ការវាយតម្លៃការគាំទ្ររបស់លោក សូល បានធ្លាក់ចុះ ១៧ ភាគរយ ពី ៦០ ភាគរយដល់ ៤៣ ភាគរយនៅដើមខែមករា ដែលជាការធ្លាក់ចុះខ្លាំងបំផុតសម្រាប់អធិការបតីក្នុងប្រវត្តិសាស្ត្រក្រោយសង្គ្រាម។ ការគាំទ្រសម្រាប់គណបក្សប្រជាធិបតេយ្យសង្គមរបស់លោកក៏បានធ្លាក់ចុះទៅដល់ ២២ ភាគរយ ដែលធ្វើឱ្យពួកគេនៅពីក្រោយគណបក្សអភិរក្សនិយម ជាលើកដំបូងចាប់តាំងពីជ័យជម្នះការបោះឆ្នោតដ៏គួរឱ្យភ្ញាក់ផ្អើលកាលពីចុងឆ្នាំមុន។
ក្រុមការងាររបស់លោក សូល បានប្រកាសថា បន្ទាប់ពីត្រឡប់មកពីទីក្រុងវ៉ាស៊ីនតោន អធិការបតីនឹងផ្ដោតលើកាលវិភាគពេញលេញ ដែលលោកសង្ឃឹមថា នឹងផ្លាស់ប្ដូរជំហរការទូតអាល្លឺម៉ង់ឱ្យលឿនជាងមុន។ បន្ទាប់ពីជំនួបជាមួយលោក បៃដិន លោកសូលនឹងជួបជាមួយលោក ម៉ាក្រុង ប្រធានាធិបតីប៉ូឡូញ អង់ទ្រេ ដូដា និងមេដឹកនាំនៃប្រទេសលីទុយអានី ឡេតូនី និង អេស្តូនី។ ១ សប្ដាហ៍ក្រោយមក លោកនឹងធ្វើដំណើរទៅកាន់ទីក្រុងកៀវ និងម៉ូស្គូ តាមលំដាប់នោះ។
លោក សូល មានសម្ព័ន្ធមិត្តឆ្វេងកណ្តាលនិយមមួយនៅក្នុងលោក បៃដិន ដែលរហូតមកដល់ពេលនេះបានបដិសេធមិនរិះគន់ទីក្រុងប៊ែរឡាំងជាសាធារណៈ។ នេះ គឺជាសម្ព័ន្ធភាពឆ្វេងកណ្ដាលនិយមដំបូងចាប់តាំងពីអាណត្តិទី២ របស់ប្រធានាធិបតី ប៊ីល គ្លីនតុន ដោយកាលនោះទាំងសេតវិមាន និងអធិការបតីអាល្លឺម៉ង់ស្ថិតនៅក្នុងដៃរបស់មេដឹកនាំឆ្វេងកណ្ដាលនិយម ហើយសម្រាប់ភាពរអាក់រអួលទាំងអស់នៅខាងអាល្លឺម៉ង់ រដ្ឋបាលទាំង ២ បានទាក់ទងគ្នាយ៉ាងជិតស្និទ្ធ។
ប៉ុន្តែការអត់ធ្មត់កំពុងជិតអស់ ហើយលោក សូល នឹងត្រូវនាំយកអ្វីមួយមកតុមូល។
នៅក្នុងបទសម្ភាសតាមទូរទស្សន៍ មុនពេលចាកចេញទៅកាន់សហរដ្ឋអាមេរិកលោក សូល បានបង្ហើបថា អាល្លឺម៉ង់អាចនឹងបង្កើនវត្តមានកងទ័ពរបស់ខ្លួននៅក្នុងប្រទេសលីទុយអានី។ លោកក៏បានលើកឡើងពីលទ្ធភាពនៃការល្បាតតាមអាកាសបន្ថែមនៅអឺរ៉ុបខាងកើត និងកណ្ដាល៕
វីដេអូ៖
