កាលពីថ្ងៃអាទិត្យ ទី ៦ កុម្ភៈ អភិបាលរដ្ឋធានីអូតាវ៉ា ប្រទេសកាណាដាលោក ជីម វ៉ាតសុន បានប្រកាសដាក់ទីក្រុងក្នុងគ្រាអាសន្ន ដើម្បីទប់ទល់នឹងបាតុកម្មមិនធ្លាប់មានពីមុនមករយៈពេល ១០ ថ្ងៃ ដែលបានធ្វើឱ្យជាប់គាំងផ្នែកជាច្រើននៃក្រុងនេះ។
បាតុកម្ម «ក្បួនដង្ហែដើម្បីសេរីភាព» ដែលរៀបចំដោយសមាគមតៃកុងរថយន្តដឹកទំនិញ បានផ្ទុះឡើងដើម្បីប្រឆាំងវិធានការរបស់រដ្ឋាភិបាលកាណាដា តម្រូវឱ្យតៃកុងរថយន្តដឹកទំនិញឆ្លងព្រំដែនខេត្តធ្វើការចាក់វ៉ាក់សាំងជំងឺកូវីដ១៩ឱ្យបានពេញលេញ។ ប៉ុន្តែបាតុកម្ម បានប្រែប្រួលយ៉ាងឆាប់រហ័សទៅជាចលនាប្រឆាំងគោលនយោបាយសុខភាពសាធារណៈ និងរដ្ឋាភិបាលលោកនាយករដ្ឋមន្ត្រីចាស្ទីន ទ្រូដូ។
ក្នុងរយៈពេល ៩ ថ្ងៃចុងក្រោយនេះ បាតុករបានធ្វើឱ្យទីក្រុងអូតាវ៉ាជាប់គាំង ដោយការចតរថយន្តដឹកទំនិញធំៗជាជួរ ដើម្បីបិទផ្លូវសំខាន់ៗ។ អ្នករៀបចំបាតុកម្មនេះ បាននិយាយថាពួកគេនឹងមិនចាកចេញលុះត្រាតែរដ្ឋាភិបាលលុបចោលតម្រូវការឱ្យចាក់វ៉ាក់សាំងខាងលើ។ រដ្ឋមន្ត្រីក្រសួងសន្តិសុខសាធារណ:កាណាដាលោកម៉ាកូ មេនឌីស៊ីណូ បាននិយាយថារដ្ឋាភិ បាលនឹងមិនដកថយក្នុងបញ្ហានេះទេ។
យ៉ាងណាមិញលោកអភិបាលវ៉ាតសុននិយាយថាក្រុមបាតុករមានចំនួនច្រើនជាងប៉ូលិស ហើយបានគ្រប់គ្រងស្ថានការណ៍។
ប៉ូលិសក្រុងអូតាវ៉ាលើកឡើងថាពួកគេ កំពុងប្រមូលភ័ស្តុតាងដែលនឹងត្រូវប្រើនៅក្នុងការកាត់ទោសព្រហ្មទណ្ឌណាមួយ។ ប៉ូលិសបាននិយាយថា ការបិទផ្លូវដែលមានការរៀបចំបានល្អ គឺពឹងផ្អែកមួយផ្នែកលើជំនួយហិរញ្ញវត្ថុពីបុគ្គលនៅក្នុងសហរដ្ឋអាមេរិក។ គេហទំព័ររៃអង្គាសប្រាក់ GoFundMe បានលុបចោលទំព័ររៃអង្គាសរបស់អ្នករៀបចំបាតុកម្មនេះ ធ្វើឱ្យសមាជិកសភាអាមេរិកមួយចំនួនមកគណបក្សសាធារណរដ្ឋខឹងសម្បាហើយប្ដេជ្ញាធ្វើការស៊ើបអង្កេតលើគេហទំព័រនេះ៕