.jpg)
អតីតនាយករដ្ឋមន្ត្រីអ៊ីស្រាអែលលោកបេនយ៉ាមីន ណេតាន់យ៉ាហ៊ូ មកតុលាការកាលពីថ្ងៃទី២២ វិច្ឆិកា ឆ្នាំ២០១១។ AFP
ការជំនុំជម្រះរឿងក្ដីពុករលួយរបស់អតីតនាយករដ្ឋមន្ត្រីអ៊ីស្រាអែលលោក បេនយ៉ាមីន ណេតាន់យ៉ាហ៊ូ បានជួបឧបសគ្គ បន្ទាប់ពីកាសែតមួយបាន អះអាងថា នៅក្នុងដំណើរការស៊ើបអង្កេត ប៉ូលិសអ៊ីស្រាអែលបានធ្វើការឃ្លាំមើលទូរស័ព្ទរបស់ជំនួយការ និងកូនប្រុសរបស់លោកណេតាន់យ៉ាហ៊ូ ដោយមិនមានដីកាស្របច្បាប់។
កាសែត Calcalist បានធ្វើការរាយការណ៍ដោយមិនផ្អែកលើប្រភពណាមួយថា ប៉ូលិសអ៊ីស្រាអែលបានប្រើប្រាស់អាវុធចារកម្មអ៊ីនធឺណិត Pegasus ដែលមានសមត្ថភាពជ្រៀតជ្រែក និងឃ្លាំមើលទូរស័ព្ទដៃ ដើម្បីធ្វើការឃ្លាំមើលមនុស្សពាក់ព័ន្ធនឹងសំណុំរឿងនេះ ដោយមិនមានដីកាស្របច្បាប់។ ប្រសិនបើការរាយការណ៍នេះពិត នោះនឹងក្លាយជាករណីដំបូងដែល Pegasus ត្រូវបានប្រើលើពលរដ្ឋអ៊ីស្រាអែល។ បើទោះជាយ៉ាងនេះក៏ដោយការរាយការណ៍នេះ គឺនៅមិនទាន់បានបញ្ជាក់ដោយឯករាជ្យ ដោយសារព័ត៌មានដទៃទេ។
កាលពីថ្ងៃចន្ទ ទី៧ កុម្ភៈ ចៅក្រមជំនុំជម្រះរឿងក្ដីលោកណេតាន់យ៉ាហ៊ូ បានពន្យារសវនាការ រហូតដល់ពេលដែលអង្គអយ្យការធ្វើការឆ្លើយតបនឹងការចោទប្រកាន់នេះ។ លោកនាយករដ្ឋមន្ត្រីណាហ្វាតាលី បេននិត បានប្រកាសបង្កើតគណៈកម្មការស៊ើបអង្កេតលើការចោទប្រកាន់នេះ។
យ៉ាងណាមិញ លោកណេតាន់យ៉ាហ៊ូគឺកំពុងប្រឈមនឹងការជំនុំជម្រះរឿងក្ដីពុករលួយចំនួន៣ផ្សេងគ្នាក្នុងពេលតែមួយ។ លោកបានឆ្លៀតឱកាសនៃការផ្សព្វផ្សាយការអះអាងនេះ ដើម្បីធ្វើការចោទប្រកាន់ថារឿងក្ដីប្រឆាំងលោក គឺជាឧបាយកលជំរុញដោយនយោបាយ ដែលប្រើ «ឧបករណ៍ឈ្លានពានបំផុតនៅក្នុងពិភពលោក»៕
