ក្នុងកិច្ចសម្ភាសន៍ជាមួយទូរទស្សន៍អាមេរិក CNN អធិការបតីអាល្លឺម៉ង់លោក អូឡាហ្វ សូល លើកឡើងថា ក្រុងវ៉ាស៊ីនតោន ក្រុងប៊ែរឡាំង និងអង្គការណាតូ គឺមានភាពរួបរួមគ្នាលើវិបត្តិអ៊ុយក្រែន-រុស្ស៊ី ប៉ុន្តែលោកបានបដិសេធការពិភាក្សាបំពង់បង្ហូរឧស្ម័ន Nord Stream 2 ដែលតភ្ជាប់ពីរុស្ស៊ីមកអាល្លឺម៉ង់នោះទេ។
នៅពេលដែលត្រូវបានគេសួរថា ហេតុអ្វីបានជាលោកមិននិយាយអំពី Nord Stream 2 លោក សូល បាននិយាយថា៖ «គ្រប់ជំហានដែលយើងនឹងធ្វើ យើងនឹងធ្វើរួមគ្នា»។ លោកបានបន្តទៀតថា៖ «ដូចដែលលោកប្រធានាធិបតីបាននិយាយ យើងកំពុងត្រៀមខ្លួនសម្រាប់រឿងនេះ។ អ្នកអាចយល់បាន ហើយអ្នកអាចប្រាកដបានថា អាល្លឺម៉ង់នឹងនៅជាមួយសម្ព័ន្ធមិត្តទាំងអស់របស់ខ្លួន និងជាពិសេសសហរដ្ឋអាមេរិក ដែលពួកយើងចាត់វិធានការដូចគ្នា។ វានឹងមិនមានភាពខុសប្លែកគ្នានៅក្នុងស្ថានភាពនោះទេ»។
បើទោះបីជាមានការធានាពីលោក សូល ក៏ដោយ បំពង់តម្លៃ ១១ ពាន់លានដុល្លារ ដែលគ្រោងបញ្ជូនឧស្ម័នធម្មជាតិពីប្រទេសរុស្ស៊ី ទៅកាន់ប្រទេសអាល្លឺម៉ង់ បានធ្វើឱ្យមានស្រមោលលើទស្សនកិច្ចរបស់លោកទៅកាន់ក្រុងវ៉ាស៊ីនតោន។ នៅក្នុងសន្និសីទរួមកាលពីថ្ងៃចន្ទ ប្រធានាធិបតី ចូ បៃដិន បាននិយាយថាបំពង់នេះនឹងត្រូវបញ្ឈប់ភ្លាមៗ ប្រសិនបើរុស្ស៊ីធ្វើការឈ្លានពានលើអ៊ុយក្រែន។ រីឯលោក សូល វិញ បានចៀសវាងសំណួរទាក់ទងនឹង Nord Stream 2៕