ដោយមានសមាជិកសភារាប់សិបនាក់មកពីគណបក្សរបស់លោកផ្ទាល់ ធ្វើការទាមទារឱ្យលោកលាលែងពីតំណែងនាយករដ្ឋមន្ត្រីអង់គ្លេសលោក បូរីស ចនសុន កាលពីថ្ងៃអង្គារ ទី ៨ កុម្ភៈ បានធ្វើការរុះរើគណៈរដ្ឋមន្ត្រី និងថ្នាក់ដឹកនាំគណបក្ស រួមទាំងតែងតាំងមន្ត្រីវិន័យគណបក្សថ្មី ដើម្បីទប់ទល់នឹងការបះបោរផ្ទៃក្នុង ជុំវិញរឿងអាស្រូវពិធីជប់លៀងក្នុងអំឡុងពេលបិទខ្ទប់ប្រទេស។
លោក ចនសុន បន្តការកាន់តំណែងដល់កម្រិតមួយ ដែលក្នុងកិច្ចប្រជុំមួយនាពេលថ្មីៗនេះលោកបានច្រៀងបទ «I Will Survive (ខ្ញុំនឹងនៅរស់)» ទៅកាន់លោក ហ្គូតូ ហារី អ្នកនាំពាក្យថ្មី ដែលលោកទើបតែតែងតាំង បន្ទាប់ពីអ្នកកាន់តំណែងនេះមុន បានលាលែងដោយសាររឿងអាស្រូវខាងលើ។
បើទោះបីជាលោក ចនសុន បានបង្ហាញការប្ដេជ្ញាចិត្តយ៉ាងម៉ឺងម៉ាត់បែបនេះ និងបានចាត់វិធានការទាំងនេះ អ្នកវិភាគមួយចំនួនបានគិតថា វិធានការទាំងនេះអាចយឺតពេលពេកហើយដើម្បីជួយសង្គ្រោះលោក ចនសុន បន្ទាប់ពីប៉ូលិសអង់គ្លេសបានបើកការស៊ើបអង្កេតការចោទប្រកាន់ថា លោកបានរំលោភច្បាប់បិទខ្ទប់ប្រទេសដែលខ្លួនលោកបានអនុម័ត។
លោក ចនសុន បានប្រឈមមុខការធ្លាក់ការគាំទ្រក្នុងការស្ទង់មតិសាធារណ: ហើយបេក្ខជនអាចស្នងតំណែងមួយចំនួនដូចជាអធិការបតីក្រសួងរតនាគារអង់គ្លេសលោក រីស៊ី សូណាក់ ត្រូវបានគេសង្កេតឃើញថា គឺកំពុងត្រៀមខ្លួនប្រជែងយកតំណែងប្រមុខរដ្ឋាភិបាល។
នៅពេលដែលនាយករដ្ឋមន្ត្រីណាមួយប្រឈមមុខនឹងការទម្លាក់ពីតំណែង វិន័យក្នុងចំណោមសមាជិកសភាតែងតែមានការបែកបាក់ មន្ត្រីរាជការបានបាត់បង់ការគោរពរបស់ពួកគេចំពោះរដ្ឋាភិបាល ហើយបេក្ខជនឈានមុខគេធ្វើការបដិសេធមិនទទួលមុខងារក្នុងរដ្ឋាភិបាល។ បន្ថែមពីលើនេះសារព័ត៌មានបានចាប់ផ្ដើមបង្ហាញអរិភាពចំពោះរដ្ឋាភិបាល ការប្រកាសគោលនយោបាយថ្មី គឺត្រូវបានលុបពីលើដោយការពិភាក្សាអំពីមេដឹកនាំថ្មី។ លោក ចនសុន កំពុងប្រឈមមុខនឹងកត្តាទាំងអស់នេះ។
កំហុសថ្មីបំផុតរបស់លោក ចនសុន គឺនៅពេលលោកធ្វើការចោទប្រកាន់ដោយគ្មានមេដឹកនាំគណបក្សប្រឆាំងលោក កៀ ស្តាមឺរ ដែលជាអតីតអយ្យការជាន់ខ្ពស់ ១ រូបថា បានបរាជ័យក្នុងការកាត់ទោសជនល្មើសផ្លូវភេទដ៏ល្បី ១ រូប ឈ្មោះ ជីមមី សាវីល។ លោក ស្តាមឺរ មិនពាក់ព័ន្ធនឹងរឿងក្ដីនេះទេ ហើយលោក ចនសុន ក្រោយមកបានប្រកែកថា លោកកំពុងនិយាយអំពីការទទួលខុសត្រូវចំពោះទង្វើរបស់បុគ្គលិកក្រោមឱវាទរបស់លោក ស្តាមឺរ។
«ការបំភ្លឺ» នេះមិនបានបំពេញចិត្តទីប្រឹក្សាដ៏ជិតស្និទ្ធ ១ រូប របស់លោក ចនសុន គឺលោកស្រី មូនីរ៉ា មីរហ្សា ដែលកាលពីសប្ដាហ៍មុនបានធ្វើការលាលែង បន្ទាប់ពីបានរិះគន់នាយករដ្ឋមន្ត្រីរូបនេះថា «ការចោទប្រកាន់បង្កការប្រមាថ»។ លោកសូណាក់ ក៏បានបង្ហាញការមិនពេញចិត្តចំពោះការលើកឡើងរបស់លោក ចនសុន ផងដែរ ដោយលោកបានប្រាប់អ្នកសារព័ត៌មានថា ខ្លួនលោកមិនហ៊ាននិយាយពាក្យទាំងនេះទេ។
សមាជិកសភាមួយចំនួនមកពីគណបក្សអភិរក្សនិយមរបស់លោក ចនសុន បានទាមទារឱ្យនាយករដ្ឋមន្ត្រីរូបនេះធ្វើការសុំអភ័យទោសចំពោះការលើកឡើងបែបនេះ ប៉ុន្តែខុទ្ទកាល័យលោកចនសុន បានបដិសេធធ្វើបែបនេះ ខណៈពេលដែលពួកគេធ្វើការរុះរើបុគ្គលិកផ្ទៃក្នុង។
លោក គ្រីស ហ៊ីតុន ហ៊ារីស ជាសមាជិកសភាម្នាក់ដែលគេគោរពឱ្យតម្លៃ និងជារដ្ឋមន្ត្រីកិច្ចការអឺរ៉ុប ត្រូវបានលោក ចនសុន តែងតាំងជាមន្ត្រីតម្រួតវិន័យ ដែលទទួលខុសត្រូវរក្សាវិន័យក្នុងចំណោមសមាជិកបក្ស ហើយមេដឹកនាំសំឡេងភាគច្រើនក្នុងសភាលោក យ៉ាកុប រីសម៉ុក ត្រូវបានលោក ចនសុន តែងតាំងជា «រដ្ឋមន្ត្រីឱកាស Brexit» ដែលជាតំណែងទើបតែបង្កើតក្នុងការរុះរើនេះ។
ក្នុងការជួយលោកបន្តកាន់តំណែងលោក ចនសុន បានព្យាយាមផ្លាស់ប្ដូរចំណាប់អារម្មណ៍ពីរឿងអាស្រូវរបស់លោកទៅព្រឹត្តិការណ៍អន្តរជាតិ។ ក្នុងរយៈពេលប៉ុន្មានសប្ដាហ៍ចុងក្រោយនេះលោក ចនសុន បានចេញមុខជាអ្នកគាំទ្រប្រទេសអ៊ុយក្រែន យ៉ាងខ្លាំង ដោយបញ្ជាការបញ្ជូនអាវុធទំនើបៗទៅកាន់ប្រទេសអ៊ុយក្រែន បង្កើនការដាក់ពង្រាយទាហានទៅកាន់សមាជិកណាតូ ដែលមានព្រំដែនជាមួយរុស្ស៊ី ហើយធ្វើដំណើរទស្សនកិច្ចទៅកាន់ក្រុងកៀវផងដែរ។
យ៉ាងណាមិញ ដើម្បីចាប់ផ្ដើមដំណើរការទម្លាក់លោក ចនសុន ចេញពីតំណែងនាយករដ្ឋមន្ត្រី សមាជិកបក្សអភិរក្សនិយមចំនួន ៥៤ ត្រូវតែធ្វើការស្នើឱ្យបោះឆ្នោតបាត់បង់ទំនុកចិត្ត។ សមាជិកបក្សជាង ១០ នាក់បាននិយាយថា ពួកគេបានដាក់សំណើនេះ ប៉ុន្តែចំនួននេះអាចខ្ពស់ជាងនេះដោយសារការដាក់សំណើជាដំណើរការសម្ងាត់។ ប្រសិនបើសំឡេងច្រើនជាង ៥០ភាគរយនៃសមាជិកអភិរក្សនិយមទាំង ៣៦០ បោះឆ្នោតថា ពួកគេបានបាត់ទំនុកចិត្តលើលោក ចនសុន នោះលោកនឹងធ្លាក់ពីតំណែងនាយករដ្ឋមន្ត្រី៕