.jpg)
កម្មវិធីចារកម្ម Pegasus ផលិតដោយក្រុមហ៊ុនបច្ចេកវិទ្យាអ៊ីស្រាអែល NSO Group បានបង្កភាពចម្រូងចម្រាសជាថ្មីម្ដងទៀត បន្ទាប់ពីមានការរាយការណ៍ថា ប៉ូលិសអ៊ីស្រាអែលបានប្រើប្រាស់វា ដើម្បីធ្វើការឃ្លាំមើលប្រជាពលរដ្ឋរបស់ខ្លួនរាប់សិបនាក់ ដែលរួមមានមន្ត្រីជាន់ខ្ពស់ និងអ្នករៀបចំបាតុកម្ម។
ការរាយការណ៍នេះ គឺជាការវិវឌ្ឍចុងក្រោយបំផុតក្នុងរឿងអាស្រូវនៃការប្រើប្រាស់ Pegasus ដោយរដ្ឋាភិបាលនៅជុំវិញពិភពលោកដើម្បីឃ្លាំមើលសកម្មជន អ្នកសារព័ត៌មាន និងសូម្បីតែប្រមុខរដ្ឋ និងរដ្ឋាភិបាល។
NSO Group ត្រូវបានស្ថាបនានៅឆ្នាំ ២០១០ ហើយបានពិពណ៌នាថា ខ្លួនជាអ្នកបង្កើត «បច្ចេកវិទ្យា ដែលជួយភ្នាក់ងាររដ្ឋាភិបាលទប់ស្កាត់ និងស៊ើបអង្កេតអំពើភេរវកម្ម និងឧក្រិដ្ឋកម្ម ដើម្បីជួយសង្គ្រោះជីវិតមនុស្សរាប់ពាន់នាក់ជុំវិញពិភពលោក»។
Pegasus គឺជាកម្មវិធីចារកម្មដែលអាចជ្រៀតជ្រែកចូលទៅក្នុងទូរស័ព្ទដៃ និងប្រមូលទិន្នន័យផ្ទាល់ខ្លួន និងទីតាំង ហើយអាចគ្រប់គ្រងមីក្រូហ្វូន និងកាមេរ៉ារបស់ទូរស័ព្ទដោយមិនចាំបាច់មានចំណេះដឹង ឬការអនុញ្ញាតពីម្ចាស់ទូរស័ព្ទ។ ព័ត៌មានមួយចំនួនដែល Pegasus អាចចាប់យករួមមាន រូបថត កំណត់ ហេតុគេហទំព័រ ពាក្យសម្ងាត់ កំណត់ហេតុការហៅទូរស័ព្ទ ការទាក់ទងនិងការបង្ហោះទៅកាន់បណ្ដាញសង្គម។ Pegasus មានសមត្ថភាពលាក់ខ្លួន និងបិទបាំងសកម្មភាពរបស់វា។
កាលពីខែកក្កដា ឆ្នាំមុន ការស៊ើបអង្កេតចេញផ្សាយដោយអង្គការសារព័ត៌មាន Forbidden Stories និងអង្គការ Amnesty International បានរកឃើញថា ចាប់ពីឆ្នាំ ២០១៦ មកមនុស្សជាង ១០០០ នាក់នៅប្រទេសជាង ៥០ ត្រូវបានរងការឃ្លាំមើលដោយអតិថិជនរបស់ក្រុមហ៊ុន NSO។ ក្នុងនោះរួមមានអ្នកសារព័ត៌មាន ១៨៩ នាក់ អ្នកនយោបាយ និងមន្ត្រីរដ្ឋាភិបាលជាង ៦០០ នាក់ និងប្រមុខរដ្ឋ និងរដ្ឋាភិបាលជាច្រើននាក់ដែលរួមមានប្រធានាធិបតីបារាំងអេម៉ានុយអែល ម៉ាក្រុង ប្រធានាធិបតីអាហ្វ្រិកខាងត្បូងលោកស៊ីរីល រ៉ាម៉ាផូសា និងនាយករដ្ឋមន្ត្រីប៉ាគីស្ថានលោកអ៊ីមរ៉ាន ខាន។
កាលពីខែវិច្ឆិកា ក្រសួងពាណិជ្ជកម្មអាមេរិកបានសម្រេចដាក់ក្រុមហ៊ុន NSO ក្នុងបញ្ជីខ្មៅអាមេរិក។ក្រុមហ៊ុនទូរស័ព្ទ Apple បានប្ដឹង NSO ចំពោះការជ្រៀតជ្រែកចូលទូរស័ព្ទផលិតដោយពួកគេ ហើយក្រុមហ៊ុន Facebook ក៏បានដាក់ពាក្យបណ្ដឹងចំពោះការឃ្លាំមើលអ្នកប្រើប្រាស់កម្មវិធី WhatsAppផងដែរ៕
