លោកប្រធានាធិបតី វ្ល៉ាឌីមៀរ ពូទីន កំពុងបង្ហាញសក្ដានុពលយោធា និងការទូតរបស់រុស្ស៊ី ក្នុងការប្រឈមមុខដាក់គ្នាយ៉ាងតានតឹងជាមួយលោកខាងលិច និងជាការបញ្ចាំងអំណាចក្នុងដំណើរការស្វែងរកឥទ្ធិពលនៅលើពិភពលោក។ ប៉ុន្តែករណីការចាប់ខ្លួនស្ត្រីជនជាតិឆេឆិនមានវ័យ ៥២ ឆ្នាំ ១ រូប នៅចំកណ្ដាលប្រទេសរុស្ស៊ី បានបង្ហាញអំពីបញ្ហាផ្ទៃក្នុងដ៏គួរឈឺក្បាលមួយរបស់លោក ពូទីន។
ស្ត្រីរូបនោះឈ្មោះ ហ្សារេម៉ា មូសាយ៉េវ៉ា ត្រូវបានអូសចេញពីគេហដ្ឋានរបស់អ្នកស្រី ហើយដាក់ក្នុងរថយន្ត SUV ពណ៌ខ្មៅ ១ គ្រឿង បន្ទាប់ពីបុរស ១ ក្រុម ដែលបានអះអាងថា ពួកគេជាប៉ូលិសបានចូលគេហដ្ឋានរបស់អ្នកស្រី ហើយវាយប្ដីរបស់អ្នកស្រី មានឈ្មោះ សេយដា យ៉ាំងហ្គូលបាយ៉េវ ដែលជាអតីតចៅក្រមនៅខេត្តឆេឆនីផងដែរ។
ក្រុមខាងលើបាននិយាយថា ពួកគេត្រូវតែនាំខ្លួនប្ដីប្រពន្ធនេះទៅខេត្តឆេឆនី ចម្ងាយប្រមាណ ១ ១០០ គីឡូម៉ែត្រពីគេហដ្ឋាននោះ ដើម្បីធ្វើការបំភ្លឺជាសាក្សីក្នុងសំណុំរឿងឆបោកមួយ។ ប៉ុន្តែការចាប់ខ្លួនរបស់អ្នកស្រីមូសាយ៉េវ៉ា ត្រូវបានមើលឃើញថា ជានុយដើម្បីចាប់ខ្លួនកូនប្រុស២នាក់របស់អ្នកស្រីដែលជាសកម្មជនរិះគន់រដ្ឋាភិបាលរដ្ឋឆេឆនី ដឹកនាំដោយលោក រ៉ាមហ្សាន កាឌីរ៉ូវ។
ឥឡូវនេះប្រមាណជាង ៣ សប្ដាហ៍បន្ទាប់រឿងនេះបានកើតឡើង លោក យ៉ាំងហ្គូលបាយ៉េវ និងកូនស្រី ១ រូបបានភៀសខ្លួនចេញពីប្រទេសរុស្សុី ហើយអ្នកស្រី មូសាយ៉េវ៉ា បានរងការចោទប្រកាន់ពីបទវាយប៉ូលិស ប៉ុន្តែមេធាវីតំណាងអ្នកស្រីបាននិយាយដោយសារជំងឺទឹកនោមផ្អែមរ៉ាំរ៉ៃ អ្នកស្រីមិនអាចសូម្បីតែដើរ។ លោកកាឌីរ៉ូវបានប្ដេជ្ញាថា នឹង «ចាត់ការ» គ្រួសារនេះ ដោយនិយាយថា «មានកន្លែងរង់ចាំគ្រួសារយ៉ាំងហ្គូល បាយ៉េវ មិនថានៅក្នុងគុក ឬនៅក្រោមដី»។
ករណីចុងក្រោយនេះបង្ហាញអំពីផលអវិជ្ជមាននៃកិច្ចព្រមព្រៀងរវាងលោក ពូទីន និងគ្រួសារកាឌីរ៉ូវ បានអនុវត្តការគ្រប់គ្រងដោយផ្ដាច់ការ លើតំបន់ដ៏ចលាចលមួយ ដែលប្រជាជនភាគច្រើនជាសាសនិកមូស្លីម និងមានប្រវត្តិចង់ផ្ដាច់ខ្លួនពីរុស្សុី។
លោក កាឌីរ៉ូវ ផ្ដល់ការគាំទ្របោះឆ្នោតយ៉ាងខ្លាំងដល់លោក ពូទីន ខណៈពេលដែលលោកធ្វើការលុបបំបាត់និន្នាការផ្ដាច់ខ្លួន និងប្រឆាំងចេញពីប្រជាជនក្នុងតំបន់ក្រោមការគ្រប់គ្រងរបស់លោក។ ជាការតបស្នងមកវិញលោកកាឌីរ៉ូវទទួលរង្វាន់ជាកញ្ចប់ថវិកាដ៏ធំសន្ធឹកសន្ធាប់មួយសម្រាប់រដ្ឋាភិបាលរបស់លោក និងទទួលខេត្តឆេឆនី ជាដែនដីសក្ដិភូមិផ្ទាល់ខ្លួនរបស់លោក។
ប៉ុន្តែការចាប់ខ្លួនជាសាធារណៈបែបនេះ និងភាពស្ងាត់ស្ងៀមរបស់ក្រុងម៉ូស្គូបង្កផលប៉ះពាល់ដល់តុល្យភាពនៃកិច្ចព្រមព្រៀងនេះ។ សមាជិកគ្រួសារយ៉ាំងហ្គូល-បាយ៉េវ បានថតការចាប់ខ្លួននេះ ហើយបង្ហោះវាស្ទើរតែភ្លាមៗនៅលើបណ្ដាញសង្គមធ្វើឱ្យប្រជាជនរុស្សុីមួយចំនួនមានការរន្ធត់ ហើយរិះគន់លោក ពូទីន ចំពោះការអនុញ្ញាតឱ្យលោក កាឌីរ៉ូវ ធ្វើអ្វីៗតាមអំពើចិត្ត។ ក្នុងប៉ុន្មានសប្ដាហ៍ថ្មីៗនេះ សកម្មភាពរបស់មេដឹកនាំឆេឆេនរូបនេះបានក្លាយជារឿងក្ដៅជាងគេក្នុងបណ្ដាញសារព័ត៌មានរបស់រុស្ស៊ី។
រឿងនេះទំនងនឹងមិនបានរារាំងគោលនយោបាយការបរទេសលោក ពូទីន ទាំងស្រុងទេ ប៉ុន្តែវាអាចជារឿងបន្ថែមពីលើបញ្ហាក្នុងស្រុកដ៏លំបាកៗជាច្រើនផ្សេងទៀតផងដែរ។ នេះមិនមែនជាលើកទី១ ទេ ដែលកងកម្លាំងឆេឆិន បានធ្វើប្រតិបត្តិការនៅខាងក្រៅតំបន់របស់ពួកគេ ភ្នាក់ងាររបស់លោក កាឌីរ៉ូវ ត្រូវបានគេសង្ស័យថាបានធ្វើឃាតកម្មនៅតំបន់ដទៃទៀតនៃប្រទេសរុស្ស៊ី និងសូម្បីតែអឺរ៉ុបខាងលិចផងដែរ។ ប៉ុន្តែការចាប់ខ្លួនរបស់អ្នកស្រីមូសាយ៉េវ៉ា នៅក្រុងនីហ្សីនីនូវហ្គោរូដ ដែលមានចម្ងាយត្រឹមតែ ៤២០ គីឡូម៉ែត្រពីក្រុងម៉ូស្គូ បានបង្ហាញថា ភ្នាក់ងារលោកកាឌីរ៉ូវ គឺកំពុងពង្រីកប្រតិបត្តិការរបស់ពួកគេ។
យ៉ាងណាមិញអ្នកស្រី មូសាយ៉េវ៉ា បានធ្វើការស្នើសុំនៅក្រៅឃុំទៅកាន់តុលាការកំពូលឆេឆនី ដោយនិយាយថា «ខ្ញុំកំពុងស្លាប់ដោយស្ងប់ស្ងាត់»។ តែសំណើនេះត្រូវបានច្រានចោលទៅវិញ។ អ្នកស្រីប្រឈមមុខការផ្ដន្ទាទោសអតិបរមាឱ្យជាប់ពន្ធនាគាររយៈពេល ១០ ឆ្នាំ៕