.jpg)
លោក ស៊ើហ្គេយ៍ ឡាវរ៉ូវ (ស្តាំ) លោកស្រីរដ្ឋមន្ត្រីការបរទេសអង់គ្លេស Liz Truss ធ្វើសន្និសីទកាសែតរួមគ្នា។ AFP
ស្នូរនៃវិបត្តិអ៊ុយក្រែនបានប្រែប្រួលកាលពីថ្ងៃចន្ទ ទី ១៤ កុម្ភៈ បន្ទាប់ពីរដ្ឋមន្ត្រីក្រសួងការបរទេសរុស្ស៊ីបាននិយាយថា លោកគាំទ្រការចរចាបន្ថែមទៀត ដើម្បីដោះស្រាយការប្រឈមមុខដាក់គ្នាជាមួយលោកខាងលិច ហើយប្រធានាធិបតីអ៊ុយក្រែន បានបង្ហាញតម្រុយថា ពួកគេអាចធ្វើការលះបង់ ដើម្បីចៀសវាងសង្គ្រាម នេះបើទោះបីជារុស្ស៊ីបន្តការប្រមូលផ្ដុំនាវាចម្បាំងនៅសមុទ្រ ខ្មៅជិតឆ្នេររបស់ប្រទេសអ៊ុយក្រែន។
នៅក្នុងកិច្ចប្រជុំចាក់ផ្សាយលើទូរទស្សន៍រដ្ឋ វិមានក្រឹមឡាំងបានបញ្ជូនសញ្ញាខ្លាំងបំផុតរបស់ខ្លួនថា ខ្លួននឹងស្វែងរកការចរចាបន្ថែមទៀតជាមួយលោកខាងលិច ជាជាងចាប់ផ្តើមសកម្មភាពយោធាភ្លាមៗ។ ក្នុងកិច្ចប្រជុំមួយរដ្ឋមន្ត្រីការបរទេសរុស្សីលោក ស៊ើហ្គេយ៍ ឡាវរ៉ូវ បានប្រាប់លោកប្រធានាធិបតី វ្ល៉ាឌីមៀរ ពូទីន ថា ឥឡូវនៅតែមានផ្លូវការទូតនៅខាងមុខ។
ប៉ុន្មាននាទីក្រោយមករដ្ឋមន្ត្រីក្រសួងការពារជាតិរុស្ស៊ី លោក ស៊ើហ្គេយ៍ ស៊ូហ្គូ បានប្រាប់លោក ពូទីន ថា៖ «ការធ្វើសមយុទ្ធខ្នាតធំ» នៅជិតព្រំដែនអ៊ុយក្រែនគឺកំពុងជិតចប់ហើយ។
«ខ្ញុំជឿថា លទ្ធភាពរបស់យើង គឺនៅឆ្ងាយណាស់ពីការអស់ជម្រើស» លោក ឡាវរ៉ូវ និយាយបែបនេះអំពីការចរចាជាមួយលោកខាងលិច ហើយបន្តទៀតថា៖ «ខ្ញុំនឹងស្នើឱ្យបន្ត និងពង្រឹងពួកវា»។ លោក ពូទីន បានឆ្លើយដោយខ្លីថា៖ «ល្អ»។
នេះគឺសញ្ញាមួយដែលបង្ហាញថា វិមានក្រឹមឡាំង គឺនៅមានការរំពឹងទុកថា ការប្រមូលផ្ដុំទាហាន ដាក់សម្ពាធគ្រប់គ្រាន់សម្រាប់សម្រេចបាននៅគោលដៅសំខាន់ៗរបស់ខ្លួន ដោយមិនចាំបាច់ធ្វើសកម្មភាពយោធា។
សេណារីយោនេះត្រូវបានពង្រឹងនៅពេលដែលប្រធានាធិបតីអ៊ុយក្រែនលោក វ៉ុលូឌីមៀរ ហ្សេលេនស្គី បានឱ្យតម្រុយថា ប្រទេសអ៊ុយក្រែន អាចបោះបង់គោលបំណងរបស់ពួកគេក្នុងការចូលរួមជាសមាជិកក្នុងសម្ព័ន្ធភាពយោធាលោកខាងលិចណាតូ ដែលនេះនឹងបំពេញការទាមទារដ៏សំខាន់មួយរបស់រុស្ស៊ី។
ក្នុងសន្និសីទសារព័ត៌មានមួយ លោក ហ្សេលេនស្គី បាននិយាយថា ការសង្កត់ធ្ងន់លើការចូលរួមជាសមាជិកនៃអង្គការណាតូ គឺដើម្បីសន្តិសុខរបស់ប្រទេសអ៊ុយក្រែន ដោយគោលដៅនេះត្រូវបានចារក្នុងរដ្ឋធម្មនុញ្ញរបស់ប្រទេស។ ប៉ុន្តែលោកបានទទួលស្គាល់ស្ថានភាពដ៏លំបាកដែលប្រទេសអ៊ុយក្រែន កំពុងប្រឈម ដោយមានទាហានរុស្ស៊ីជាង ១០០ ០០០ នាក់នៅខាងកើតប្រទេស ហើយដៃគូដូចជាអាមេរិកបដិសេធមិនបញ្ជូនទាហាន ដើម្បីទប់ទល់នឹងការឈ្លានពាន។
«តើអ៊ុយក្រែនគួរដើរលើផ្លូវនោះប៉ុន្មានទៀត?» លោក ហ្សេលេនស្គី និយាយអំពីដំណើរការសមាជិកភាពរបស់អ៊ុយក្រែន ហើយបន្ថែមទៀតថា «តើនរណានឹងគាំទ្រយើង?»។ លោកលើកឡើងថា ការរំពឹងរបស់អ៊ុយក្រែនក្នុងការចូលរួមអង្គការណាតូគឺ «ដូចជាសុបិន»។
ការលើកឡើងរបស់ ហ្សេលេនស្គី បានបង្ហាញថា យុទ្ធសាស្ត្រផ្គួបការចរចាជាមួយនឹងសម្ពាធយោធាកំពុងមានប្រសិទ្ធភាព។ លោក ឡាវរ៉ូវ បានប្រាប់លោក ពូទីន ថា៖ «គំនិតផ្ដួចផ្ដើមរបស់យើង បានអង្រួនសហសេវិកលោកខាងលិចរបស់យើង ហើយបានក្លាយជាហេតុផលដែលពួកគេមិនអាចព្រងើយកន្តើយនឹងការទាមទារពីមុនរបស់យើងបានទៀតទេ»។
យ៉ាងណាមិញ សហរដ្ឋអាមេរិក បានព្យាយាមបន្ទាបការរំពឹងទុកលើដំណោះស្រាយការទូតបន្ទាប់ពីការលើកឡើងរបស់លោក ឡាវរ៉ូវ។ អ្នកនាំពាក្យក្រសួងការបរទេសអាមេរិកលោក ណេដ ប្រាយស៍ បាននិយាយថា សម្តីរបស់លោក ឡាវរ៉ូវ គឺផ្ទុយពីសកម្មភាពរបស់យោធារុស្ស៊ី។
លោក ប្រាយស៍ និយាយថា៖ «យើងបានកត់សម្គាល់ពីយោបល់របស់គាត់។ អ្វីដែលយើងមិនបានកត់សម្គាល់នោះ គឺជាការបង្ហាញពីការបន្ថយការកើនឡើង។ យើងមិនបានឃើញសញ្ញាជាក់ស្តែងណាមួយនៃការបន្ថយការកើនឡើងនោះទេ»៕
វីដេអូ៖
