.jpg)
សភាដូម៉ារបស់រុស្ស៊ីកំពុងគ្រោងបោះឆ្នោតលើសេចក្ដីសម្រេច ដែលនឹងស្នើឱ្យលោកប្រធានាធិបតី វ្ល៉ាឌីមៀរ ពូទីន ទទួលស្គាល់ឯករាជភាពរបស់រដ្ឋផ្ដាច់ខ្លួនចំនួន២នៅតំបន់ដុនបាស នៅខាងកើតនៃប្រទេសអ៊ុយក្រែន។ នេះបើតាមការលើកឡើងរបស់ប្រធានសភាដូម៉ា។
លោកវីយ៉ាឆេស្លាវ វ៉ុលូឌីន បាននិយាយថាសមាជិកសភានឹងធ្វើការពិចារណាលើសេចក្ដីសម្រេចព្រាងចំនួន២ ដើម្បីទទួលស្គាល់ឯករាជភាពនៃរដ្ឋផ្ដាច់ខ្លួនដូណេតស្ក៍ និងលូហានស្ក ដែលបានប្រកាសខ្លួនជាសាធារណរដ្ឋប្រជាមានិត។ សេចក្ដីសម្រេចព្រាង១គឺនឹងស្នើលោកពូទីនដោយផ្ទាល់ឱ្យធ្វើបែបនេះ ហើយមួយទៀត គឺនឹងស្នើយោបល់របស់រដ្ឋមន្ត្រីការបរទេសរុស្ស៊ី និងរដ្ឋមន្ត្រីដទៃទៀតលើបញ្ហានេះមុនធ្វើការស្នើទៅកាន់លោកពូទីន។
តំបន់ដុនបាស បានឆ្លងកាត់សង្គ្រាមផ្ដាច់ខ្លួនចាប់តាំងពីឆ្នាំ ២០១៤ មកម្ល៉េះ ដែលបានធ្វើឱ្យមានមនុស្សជាង ១៤ ០០០ នាក់ស្លាប់។ ការទទួលស្គាល់រដ្ឋផ្ដាច់ខ្លួនទាំង២នេះ និងបំផ្លាញដំណើរសន្តិភាពក្រោមកិច្ចព្រមព្រៀងទីក្រុងមីនស្ក៍ ដែលរដ្ឋាភិបាលលោកពូទីន បានប្ដេជ្ញាគោរព។ បន្ថែមពីលើនេះ វានឹងបន្ថែមលើភាពតានតឹងដែលមានស្រាប់ជុំវិញការប្រមូលផ្ដុំទាហានរុស្សីជាង ១០០ ០០០ នាក់នៅជិតព្រំដែនអ៊ុយក្រែន។
ហេតុនេះហើយ ទើបអ្នកវិភាគមួយចំនួនគិតថាលោកពូទីន នឹងទំនងមិនចាត់វិធានការតាមសំណើរបស់សភាដូម៉ាទេ។ ផ្លូវទី២ ដែលត្រូវស្នើយោបល់រដ្ឋមន្ត្រីការបរទេស ត្រូវបានគេមើលថា ជាការពន្យារពេលកុំឱ្យបញ្ហានេះកើតឡើងនៅចំពេលដែលភាពតានតឹងកើនឡើងដ៏ដល់កម្រិតខ្ពស់បំផុត។
គំនិតនៃការទទួលស្គាល់រដ្ឋផ្ដាច់ខ្លួនទាំង២នេះ ត្រូវបានលើកឡើងជាលើកដំបូងនៅសភាដូម៉ាតាំងពីថ្ងៃទី១៩មករាម្ល៉េះ។ វិមានក្រឹមឡាំង បានបដិសេធមិនអត្ថាធិប្បាយថា ខ្លួននឹងគាំទ្រសេចក្ដីសម្រេចទាំងនេះដែរ ឬទេ៕
