ខណៈការព្រួយបារម្ភអំពីការផ្ទុះសង្គ្រាមរវាងរុស្ស៊ី និងអ៊ុយក្រែនកំពុងកើនឡើង ប្រធានាធិបតីអាមេរិកលោក ចូ បៃដិន បាននិយាយសហរដ្ឋអាមេរិកអាចប្រឈមផលវិបាកសេដ្ឋកិច្ចជាពិសេសលើវិស័យថាមពល ប្រសិនបើសង្គ្រាមបែបនេះកើតឡើង។
លោក បៃដិន និយាយថា៖ «ខ្ញុំនឹងមិនធ្វើពុតថា វាគ្មានការឈឺចាប់ទេ យើងកំពុងរៀបចំប្រើប្រាស់ឧបករណ៍ និងសិទ្ធិអំណាចទាំងអស់ដែលយើងមាន ដើម្បីផ្ដល់ការបន្ធូរនៅស្នប់ប្រេងសាំង»។
កាលពីថ្ងៃពុធ តម្លៃប្រេងសាំងជាមធ្យមនៅអាមេរិកបានកើនដល់ ៣,៥១ ដុល្លារ ក្នុង ១ ប៊ីដុង (ស្មើនឹង ៣,៧៨៥ លីត្រ) ដែលកើនឡើងប្រមាណ ១ ដុល្លារ ធៀបនឹងកាលពី ១ ឆ្នាំមុន និងជាតម្លៃខ្ពស់បំផុតចាប់តាំងពីឆ្នាំ ២០១៤។
រុស្ស៊ី គឺជាប្រទេសផលិតប្រេងធំជាងគេទី២ ក្នុងពិភពលោក ហើយប្រសិនបើអាមេរិកដាក់ទណ្ឌកម្មហាមឃាត់ប្រេងរុស្ស៊ីពីទីផ្សារពិភពលោកក្នុងករណីផ្ទុះសង្គ្រាម អ្នកវិភាគជាច្រើននិយាយថាតម្លៃសាំងនឹងកើនឡើងយ៉ាងខ្លាំង។
ការស្ទង់មតិបានបង្ហាញថា ប្រជាជនអាមេរិកជាច្រើន កំពុងស្ដីបន្ទោសលោក បៃដិន អំពីការឡើងតម្លៃប្រេងសាំង ដែលជាផ្នែកមួយនៃអត្រាអតិផរណាខ្ពស់បំផុតក្នុងប្រវត្តិសាស្ត្រ ៤០ ឆ្នាំចុងក្រោយរបស់អាមេរិក។ អត្រាអតិផរណាច្រើនជាង ៧ ភាគរយ បានក្លាយជាបញ្ហានយោ បាយសម្រាប់លោក បៃដិន និងគណបក្សប្រជាធិបតេយ្យក្នុងការបោះឆ្នោតសភាខាងមុខនេះ។
សមាជិកព្រឹទ្ធសភានៃគណបក្សប្រជាធិបតេយ្យបានស្នើឱ្យផ្អាកពន្ធលើប្រេងសាំងសម្រាប់ឆ្នាំនេះ ដើម្បីជួយកាត់បន្ថយតម្លៃសម្រាប់អ្នកប្រើប្រាស់។ ប៉ុន្តែសមាជិកគណបក្សសាធារណរដ្ឋបាននិយាយថា វិធានការនេះគឺ «គ្រាន់តែល្អមើល» ប៉ុណ្ណោះ ហើយបានរិះគន់គោលនយោ បាយ ថាមពលរបស់លោកបៃដិនថាបង្កការលំបាកសម្រាប់អ្នកផលិតក្នុងស្រុក ហើយបង្កើនការរំពឹងលើការនាំចូលពីបរទេស៕