ទ្វីបអឺរ៉ុបរំពឹងយ៉ាងខ្លាំងលើការនាំចូលឧស្ម័នធម្មជាតិពីរុស្ស៊ី ដើម្បីផ្ដល់កម្ដៅទៅគេហដ្ឋានរាប់លាននៅរដូវរងា ដើម្បីផលិតអគ្គិសនី និងដើម្បីផ្គត់ផ្គង់ថាមពលឱ្យរោងចក្រ។ ការរំពឹងយ៉ាងខ្លាំងបែបនេះបានបន្សល់ជម្រើសការទូតតិចតួចសម្រាប់អឺរ៉ុប ហើយគំរាមកំហែងបង្កភាពចលាចលក្នុងវិស័យថាមពលរបស់ទ្វីបនេះ ប្រសិនបើសង្គ្រាមផ្ទុះឡើង។
ប្រសិនបើមានការរអាក់រអួលនៃលំហូរឧស្ម័នទៅអឺរ៉ុប មិនថាដោយសារការខូចខាតបំពង់ដោយសង្គ្រាម ឬដោយសារការបិទជាយុទ្ធសាស្ត្រចរចា អ្នកជំនាញនិយាយថា តម្លៃឧស្ម័នដែលខ្ពស់ស្រាប់ នឹងកើនឡើងបន្ថែមទៀត ហើយប្រសិនបើការផ្ដាច់ត្រូវបានអូសបន្លាយយូរ អាជីវកម្មជាច្រើននឹងត្រូវបង្ខំឱ្យបិទទ្វារ។ បន្ថែមពីលើក្រុមគ្រួសារដែលប្រឈមនឹងការកើនឡើងការចំណាយ ខណៈចំណូលធ្លាក់ចុះ នឹងកាន់តែរងការឈឺចាប់។
ម្ចាស់ឧស្សាហកម្មធំមិនជឿថា លោក វ្ល៉ាឌីមៀរ ពូទីន នឹងធ្វើការកាត់ផ្ដាច់ដោយចេតនាទេដោយសារសារៈសំខាន់ដ៏ធំនៃការនាំចេញឧស្ម័នទៅអឺរ៉ុបសម្រាប់សេដ្ឋកិច្ចប្រទេសរបស់លោក។ ប៉ុន្តែភាពតានតឹងទាំងនេះ គឺកំពុងកើតឡើង ចំពេលដែលប្រទេសអឺរ៉ុបកំពុងបង្កើនការប្រើប្រាស់ឧស្ម័នធម្មជាតិជាស្ពានក្នុងការផ្លាស់ប្ដូរពីឥន្ធនៈផូស៊ីល ទៅប្រភពថាមពលកកើតឡើងវិញដូចជាថាមពលព្រះអាទិត្យ និងខ្យល់។
សំណើមធ្យោបាយការទូត ដើម្បីទប់ទល់នឹងការប្រមូលផ្ដុំទាហានរុស្ស៊ីនៅព្រំដែនអ៊ុយក្រែន ភាគច្រើនគឺផ្ដោតលើការដាក់ទណ្ឌកម្ម ដែលនឹងដាក់កំណត់យ៉ាងខ្លាំងលើពាណិជ្ជកម្មថាមពល។ នេះអាចប៉ះពាល់យ៉ាងខ្លាំងលើការវិនិយោគគម្រោងថាមពលរាប់ពាន់លានដុល្លារ ជាពិសេសសម្រាប់ប្រទេសអាល្លឺម៉ង់ និងអ៊ីតាលី ដែលរំពឹងលើការនាំចូលឧស្ម័នធម្មជាតិពីរុស្ស៊ីច្រើនជាងអ្នកដទៃទៀត។
នៅឆ្នាំ ២០២១ ៣៨ ភាគរយ នៃឧស្ម័នប្រើប្រាស់នៅអឺរ៉ុប គឺមកពីប្រទេសរុស្ស៊ី។ ប្រទេសនៅអឺរ៉ុបខាងកើតដូចជាប៉ូឡូញ និងលីទុយអានី បានកាត់បន្ថយការរំពឹងលើការនាំចូលពីរុស្ស៊ី ប៉ុន្តែប្រទេសដទៃទៀតមានតែបង្កើន។
ប្រទេសអាល្លឺម៉ង់ គឺជាអតិថិជនសំខាន់បំផុតរបស់រុស្សី។ ភាគច្រើននៃឧស្ម័នទៅកាន់ប្រទេសអាឡឺម៉ង់គឺហូរដោយផ្ទាល់ពីប្រទេសរុស្ស៊ី តាមរយៈបំពង់បង្ហូរដ៏ធំមួយនៅបាតសមុទ្របាល់ទិកមានឈ្មោះថា Nord Stream។ បំពង់បង្ហូរទី២ ស្របគ្នា Nord Stream 2 ត្រូវបានបញ្ចប់ការសាងសង់នៅពេលថ្មីៗនេះក្នុងតម្លៃ ១១ ពាន់លានដុល្លារ។
ឧស្ម័ននៅមិនទាន់ចាប់ផ្ដើមហូរកាត់បំពង់នេះនៅឡើយទេ។ សមាជិកសភាអាមេរិក បានគំរាមចាត់វិធានការរារាំងមិនឱ្យ Nord Stream 2 ដំណើរការបាន ខណៈពេលដែលអ្នករិះគន់និយាយថា បំពង់នេះនឹងបង្កើនឥទ្ធិពលរបស់រុស្ស៊ីលើទ្វីបនេះ ហើយនឹងធ្វើឱ្យប្រទេសអ៊ុយក្រែនបាត់បង់ចំណូលឆ្លងកាត់។ ប្រធានាធិបតីអាមេរិកលោកចូ បៃដិន និយាយថា Nord Stream 2 នឹងមិនអាចដំណើរការបានប្រសិនបើរុស្ស៊ីធ្វើការវាយប្រហារចូលអ៊ុយក្រែន។
បំពង់បង្ហូរឧស្ម័នធំៗជាច្រើនផ្សេងទៀតនាំឧស្ម័នរុស្ស៊ីចូលទៅក្នុងទ្វីបអឺរ៉ុប តាមរយៈបណ្ដាញតភ្ជាប់គ្នាដ៏ធំទូលាយមួយ។ បរិមាណឧស្ម័នឆ្លងកាត់អ៊ុយក្រែនបានធ្លាក់ចុះយ៉ាងខ្លាំងក្នុងរយៈពេល ១ ទសវត្សរ៍ចុងក្រោយនេះ ប៉ុន្តែវានៅតែជាផ្លូវដ៏សំខាន់មួយ។ បំពង់សំខាន់ៗដទៃទៀតគឺឆ្លងកាត់ប្រទេសប៉ូឡូញ និងប្រទេសតួកគី។
ប្រសិនបើឧស្ម័នឈប់ហូរពីរុស្ស៊ី ប្រទេសនាំចូលនឹងត្រូវស្វែងរកប្រភពផ្សេងទៀត។ កង្វះមួយចំនួនទំនងជានឹងបំពេញដោយការនាំចូលឧស្ម័នធម្មជាតិរាវ (LNG) កាន់តែច្រើនពីប្រភពជុំវិញពិភពលោក។
LNG គឺផលិតដោយពង្រាវឧស្ម័នធម្មជាតិនៅសីតុណ្ហភាពត្រជាក់ -១៦០ អង្សាសេ។ វាមានភាពងាយស្រួលសម្រាប់ការដឹកជញ្ជូនចម្ងាយឆ្ងាយតាមនាវា ដូចជាមកពីអាមេរិក អូស្ត្រាលី និងមជ្ឈិមបូព៌ា ដែលផ្ដល់ជម្រើសអ្នកផ្គត់ផ្គង់ថ្មីជាច្រើន។
ក្នុងរយៈពេលប៉ុន្មានខែចុងក្រោយនេះ អឺរ៉ុបគឺហាក់ដូចជាកំពុងហាត់សមសម្រាប់សេណារីយោដែលរុស្ស៊ីនឹងកាត់ផ្ដាច់ដោយរុស្ស៊ី។ យោងតាមទីភ្នាក់ងារថាមពលអន្តរជាតិ ប្រទេសរុស្ស៊ី បានកាត់បន្ថយការនាំចេញឧស្ម័នរបស់ខ្លួនតាមបំពង់ទៅកាន់អឺរ៉ុបរហូតទៅដល់ ២៣ ភាគរយនៅក្នុងត្រីមាសចុងក្រោយនៃឆ្នាំ ២០២១ បើធៀបនឹងរយៈពេលដូចគ្នាកាលពីឆ្នាំមុន។ ទន្ទឹមនឹងនេះ ការនាំចូលឧស្ម័នរាវនៅអឺរ៉ុបបានកើនឡើង៕