ក្រសួងសុខាភិបាលរបស់ប្រទេសម៉ាឡេស៊ីបាននិយាយថា ខ្លួនរកឃើញករណីប្រចាំថ្ងៃខ្ពស់បំផុតពោលគឺ ២៧ ៨៣១ ករណី កាលពីថ្ងៃទី ១៦ ខែកុម្ភៈ។ នេះបើតាមការឱ្យដឹងពីសារព័ត៌មាន Reuter។
អគ្គនាយកសុខភាព លោកវេជ្ជបណ្ឌិត Noor Hisham Abdullah បាននិយាយថា ៩៩,៦៥ ភាគរយនៃករណីថ្មីគឺ ស្ថិតក្នុងប្រភេទទី១ និង ២ ហើយមិនមានរោគសញ្ញា ឬមានរោគសញ្ញាស្រាល។
គួរបញ្ជាក់ផងដែរ ចំនួនករណីឆ្លងប្រចាំថ្ងៃខ្ពស់បំផុតកន្លងមកមានចំនួន ២៤ ៥៩៩ ករណី នៅថ្ងៃទី ២៦ ខែ សីហា ឆ្នាំ ២០២១។
យោងតាមលោកវេជ្ជបណ្ឌិត Noor Hisham ករណីលើកនេះ បានធ្វើឱ្យករណីឆ្លងសរុបក្នុងស្រុកឡើងដល់ ៣ ១១១ ៥១៤ ករណី បើគិតចាប់តាំងពីជំងឺរាតត្បាតបានចាប់ផ្តើម៕