ក្នុងការថ្លែងទៅកាន់ក្រុមប្រឹក្សាសន្តិសុខអង្គការសហប្រជាជាតិ រដ្ឋមន្ត្រីការបរទេស លោក អានតូនី ប្ល៊ីនកែន បានបង្ហាញការព្រមានរបស់ក្រុងវ៉ាស៊ីនតោន អំពីផែនការរបស់រុស្ស៊ីចំពោះប្រទេសអ៊ុយក្រែន ដែលខ្លួន និងសម្ព័ន្ធមិត្តរបស់ខ្លួនកំពុងព្រួយបារម្ភថា នឹងកើតឡើងក្នុងរយៈពេលប៉ុន្មានថ្ងៃខាងមុខ។
រដ្ឋមន្ត្រីរូបនេះបានរៀបរាប់អំពីអ្វីដែលលោកនិយាយថា ជាផែនការរបស់ប្រធានាធិបតីរុស្ស៊ី វ្ល៉ាឌីមៀរ ពូទីន ដែលរួមមានការបំភាន់ថា ដកទាហាន លេសមិនពិតដើម្បីចាប់ផ្ដើមសង្គ្រាម និងវិធីនៃការវាយប្រហារ ដោយប្រើប្រាស់រថក្រោះ ទាហានថ្មើរជើង មីស៊ីល និងការវាយប្រហារតាមអ៊ីនធឺណិត។
ប៉ុន្តែលោក ប្ល៊ីនកែន ដឹងថា ដើម្បីធ្វើការចោទប្រកាន់បែបនេះ លោកត្រូវការភ័ស្តុតាងជាអំណះអំណាង ប្រសិនបើលោកមិនចង់ប្រឈមមុខនឹងរឿងអាស្រូវស្រដៀងនឹងកាលពីការឈ្លានពានប្រទេសអ៊ីរ៉ាក់។ កាលពីឆ្នាំ ២០០៣ លោក ខូលីន ប៉ូវែល រដ្ឋមន្ត្រីការបរទេសរបស់លោកប្រធានាធិបតី ចច ដាប៊លយូ ប៊ូស បានធ្វើការអះអាងនៅកិច្ចប្រជុំក្រុមប្រឹក្សាសន្តិសុខថាប្រទេសអ៊ីរ៉ាក់ បានផលិត និងរក្សាទុកអាវុធប្រល័យលោក។ បន្ទាប់ពីអាមេរិកឈ្លានពានប្រទេសអ៊ីរ៉ាក់ ការលើកឡើងរបស់លោក ប៉ូវែល គឺត្រូវបានបញ្ជាក់ថា ជាការអះអាងមិនពិត។
«ខ្ញុំដឹងថា មានអ្នកខ្លះ បានមិនទុកចិត្តព័ត៌មានរបស់យើងដោយរំឭកពីករណីមុនៗ ដែលទីបំផុតព័ត៌មានចារកម្មមិនមានលទ្ធផលអ្វី» លោក ប៊ី្លន កែន បាននិយាយបែបនេះកាលពីថ្ងៃព្រហស្បតិ៍ ហើយបន្តទៀតថា៖ «ប៉ុន្តែខ្ញុំបញ្ជាក់ឱ្យច្បាស់ ខ្ញុំមកនេះថ្ងៃនេះមិនមែន ដើម្បីចាប់ផ្ដើមសង្គ្រាមទេ ប៉ុន្តែដើម្បីរារាំង»។
សម្ដីរបស់លោក ប្ល៊ីនកែន គឺជាការបាញ់ផ្លោងចុងក្រោយក្នុងសង្គ្រាមពាក្យសម្តីរវាងក្រុងវ៉ាស៊ីនតោន និងក្រុងម៉ូស្គូ ជុំវិញប្រទេសអ៊ុយក្រែន។ សហរដ្ឋអាមេរិកមានការភ្ញាក់ផ្អើលយ៉ាងខ្លាំងនៅពេលរុស្ស៊ី កាត់យកឧបទ្វីបគ្រីមា កាលពីឆ្នាំ ២០១៤ និងធ្វើអន្តរាគមន៍ក្នុងសង្គ្រាមស៊ីវិលស៊ីរី កាលពីឆ្នាំ ២០១៥ ដូច្នេះលើកនេះក្រុងវ៉ាស៊ីនតោនចង់គ្រប់គ្រងស្ថានភាព មុនការប៉ះទង្គិចណាមួយកើតឡើង។
កិច្ចខិតខំប្រឹងប្រែងរបស់អាមេរិក រួមមានមធ្យោបាយមិនធ្លាប់មានពីមុនមក គឺការចេញផ្សាយព័ត៌មានចារកម្មរសើបៗជាសាធារណ: ដោយក្នុងករណីមួយចំនួន ជាកិច្ចសហប្រតិបត្តិការចេញផ្សាយជាមួយសម្ព័ន្ធមិត្ត។
ការចេញផ្សាយទាំងនេះរួមមាន ចំនួនទាហានរុស្ស៊ី នៅព្រំដែនអ៊ុយក្រែន បេសកកម្មវាយប្រហារលើខ្លួនឯងដើម្បីបង្កើតលេសសម្រាប់សង្គ្រាម ផែនការបង្កើតរដ្ឋាភិបាលអាយ៉ងនៅក្រុងកៀវ និងរបៀបវាយប្រហារដែលរុស្ស៊ីអាចប្រើប្រាស់។ រដ្ឋបាលអាមេរិកបាននិយាយថា ការធ្វើបែបនេះ នឹងធ្វើឱ្យផែនការរបស់រុស្ស៊ី កាន់តែពិបាកអនុវត្ត ហើយនឹងបង្ខំឱ្យពួកគេស្វែងរកផែនការថ្មី។
ប្រសិនបើព័ត៌មានទាំងនេះ គឺជាការពិត នោះមានន័យថា ភ្នាក់ងារចារកម្មលោកខាងលិចបានជ្រៀតជ្រែកចូលក្នុងការគិត និងរបៀបពិចារណារបស់លោក ពូទីន។
ប៉ុន្តែប្រទេសមួយចំនួននៅអឺរ៉ុប បានព្រួយបារម្ភថា វិធីសាស្ត្ររបស់ក្រុងវ៉ាស៊ីនតោន គឺកំពុងបង្កើនភាពតានតឹង ដោយសារវាបានធ្វើឱ្យមធ្យោបាយការទូតកាន់តែស្មុគស្មាញ។ សហរដ្ឋអាមេរិកប្រឈមមុខនឹងការមិនទុកចិត្តយ៉ាងខ្លាំង ដោយសារការរំពឹងលើព័ត៌មានចារកម្មមិនត្រូវបានបញ្ជាក់ដូចកាលពីសង្គ្រាមអ៊ីរ៉ាក់ឆ្នាំ ២០០៣។
ការអះអាងរបស់លោកខាងលិច បានរងការចំអកពីក្រុងមូ៉ស្គូ ដែលបាននិយាយថា ការអះអាងទាំងនេះមិនត្រឹមត្រូវ ស្រមើស្រមៃ និងកាន់តែបង្ករឿង។ ក្រុងមូ៉ស្គូបានរិះគន់ក្រុងវ៉ាស៊ីនតោនថា កំពុងបង្កឱ្យមានភាពតានតឹង និងធ្វើឱ្យប៉ះពាល់ដល់ការស្វែងរកដំណោះស្រាយការទូត។ រុស្ស៊ីបានច្រានចោលថា ខ្លួនគ្មានផែនការធ្វើការឈ្លានពានអ៊ុយក្រែនទេ៕
វីដេអូ៖