.jpg)
កាលពីថ្ងៃសៅរ៍ ទី ១៩ កុម្ភៈ កងកម្លាំងនុយក្លេអ៊ែរបានធ្វើសមយុទ្ធកងកម្លាំងនុយក្លេអ៊ែរក្រោមអធិបតីភាពរបស់លោកប្រធានាធិបតីវ្ល៉ាឌីមៀរ ពូទីន ខណៈពេលដែលសហរដ្ឋ អាមេរិកធ្វើការចោទប្រកាន់ថា ទាហានរុស្ស៊ីប្រមូលផ្ដុំនៅព្រំដែនជាមួយប្រទេសអ៊ុយក្រែនគឺកំពុងរុលទៅមុខ និង «ត្រៀមវាយប្រហារ»។
វិមានក្រឹមឡាំង បានប្រកាសថាក្នុងសមយុទ្ធខាងលើ រុស្ស៊ី បានសាកល្បងមីស៊ីលជំនាន់ថ្មីនៅសមុទ្រដោយជោគជ័យ។ លោកពូទីន បានឃ្លាំមើលសមយុទ្ធជាមួយប្រធានាធិបតីបេឡារុសលោកអាឡិចសាន់ឌឺ លូកាសិនកូ។
ការសមយុទ្ធខាងលើនេះធ្វើឡើង បន្ទាប់កងកម្លាំងយោធារុស្ស៊ីធ្វើការប្រមូលផ្ដុំទាហានជាង ១០០ ០០០ នាក់ក្នុងរយៈពេល៤ខែចុងក្រោយនេះ នៅខាងជើង ខាងត្បូង និងខាងកើតនៃប្រទេសអ៊ុយក្រែន។
ខណៈពេលដែលមានការកើនឡើងការព្រួយបារម្ភអំពីការផ្ទុះសង្គ្រាម សេតវិមានបាននិយាយថាក្រុមការងារគោលនយោបាយសន្តិសុខរបស់លោកប្រធានាធិបតីចូ បៃដិននៅជឿថារុស្ស៊ី អាចបើកការវាយប្រហារនៅអ៊ុយក្រែន «នៅពេលណាក៏បាន» ហើយលោកបៃដិនគ្រោងបើកកិច្ចប្រជុំជាមួយទីប្រឹក្សាសំខាន់ៗដើម្បីពិភាក្សាអំពីវិបត្តិនេះ។
បណ្ដារដ្ឋមន្ត្រីការបរទេសនៃក្រុមប្រទេសអ្នកមាន G7 បាននិយាយថាពួកគេមិនឃើញសញ្ញាបង្ហាញថា រុស្ស៊ី កំពុងដកទ័ពទេ ហើយនៅតែមាន «ការព្រួយបារម្ភយ៉ាងខ្លាំង» អំពីស្ថានភាពបច្ចុប្បន្ន។
មេដឹកនាំក្រុមផ្ដាច់ខ្លួននៅតំបន់ខាងកើតនៃប្រទេសអ៊ុយក្រែនការចល័តយោធាពេញលេញ ហើយបានបញ្ជាឱ្យកុមារ និងស្ត្រីភៀសខ្លួនទៅប្រទេសរុស្ស៊ី ដោយអះអាងថា អ៊ុយក្រែននឹងធ្វើការវាយប្រហារឆាប់ៗនេះ។ ភ្នាក់ចារកម្ម FSB រុស្សីបាននិយាយថា គ្រាប់ផ្លោងចំនួន២ គ្រាប់បានធ្លាក់ក្នុងដែនដីរុស្ស៊ី ប៉ុន្តែអ៊ុយក្រែន បាននិយាយថា រុស្ស៊ី បានក្លែងបន្លំរូបភាពដើម្បីធ្វើការចោទប្រកាន់បែបនេះ៕
