.jpg)
លោក វ្លា៉ឌីមៀរ ពូទីន (ឆ្វេង) និងលោក ស៊ី ជីនភីង ថតក្នុងអំឡុងជំនួប ១ នៅក្រុងបេ៉កាំង។ AFP
កាលពីថ្ងៃសៅរ៍ ទី ១៩ កុម្ភៈ រដ្ឋមន្ត្រីការបរទេសចិនលោក វ៉ាង យី បានជំរុញឱ្យមានការចរចា ដើម្បីស្វែងរកដំណោះស្រាយជម្លោះនៅទ្វីបអឺរ៉ុបហើយនិយាយថា អធិបតេយ្យភាពអ៊ុយក្រែន គឺគួរតែត្រូវបាន «គោរព និងការពារ» ប៉ុន្តែស្របពេលជាមួយគ្នានេះលោកក៏បានបង្ហាញការគាំទ្រចំពោះរុស្ស៊ីដោយនិយាយថា ការពង្រីកសមាជិកភាពរបស់អង្គការកំពុងបង្កអស្ថិរភាពនៅលើទ្វីបនេះ។
ក្នុងការថ្លែងសុន្ទរកថាតាមវីដេអូទៅកាន់សន្និសីទសន្តិសុខក្រុងមុយនិក លោក វ៉ាង បាននិយាយថា៖ «ប្រសិនបើណាតូបន្តពង្រីកទៅទិសខាងកើត តើវាអំណោយផលដល់ការរក្សាសន្តិភាព និងស្ថិរភាពនៅអឺរ៉ុបដែរ ឬទេ?»។
មន្ត្រីលោកខាងលិចជាច្រើនបាននិយាយថា ពួកគេមានភាពភ្ញាក់ផ្អើលចំពោះអ្វីដែលពួកគេមើលឃើញថា ជារីកលូតលាស់ចំណងទាក់ទងមួយ ដែលនឹងធ្វើឱ្យមានការប្រែប្រួលតុល្យភាពអំណាចពិភពលោក។
អ្នកនាំពាក្យក្រសួងការពារជាតិអាមេរិកលោក ចន ឃឺប៊ី រដ្ឋាភិបាលសហរដ្ឋអាមេរិកកំពុងឃ្លាំមើល «ទំនាក់ទំនងដែលកំពុងរីកចម្រើន» រវាងចិន និងរុស្ស៊ី។ លោកបាននិយាយថា សេចក្តីថ្លែងការណ៍រួមចេញផ្សាយដោយប្រទេសទាំង ២ កាលពីដើមខែកុម្ភៈ នៅពេលដែលប្រធានាធិបតី វ្ល៉ាឌីមៀរ ពូទីន នៃប្រទេសរុស្ស៊ី និងលោក ស៊ី ជីនភីង នៃប្រទេសចិន បានជួបប្រជុំគ្នានៅទីក្រុងប៉េកាំងបានបង្ហាញថា ប្រទេសចិន កំពុងឈរនៅពីក្រោយការប្រមូលផ្ដុំយោធារបស់លោក ពូទីន នៅជុំវិញអ៊ុយក្រែន។
ក្នុងប៉ុន្មានសប្ដាហ៍ថ្មីៗនេះ ប្រទេសទាំង ២ បានចរចាលើកិច្ចសន្យារយៈពេល ៣០ ឆ្នាំ សម្រាប់រុស្ស៊ីក្នុងការផ្គត់ផ្គង់ឧស្ម័នដល់ប្រទេសចិន តាមរយៈបំពង់បង្ហូរថ្មី។ ពួកគេបានរារាំងការទាមទារពីទីក្រុងវ៉ាស៊ីនតោនឱ្យអង្គការសហប្រជាជាតិដាក់ទណ្ឌកម្មបន្ថែមលើកូរ៉េខាងជើង ជុំវិញការសាកល្បងមីស៊ីលថ្មី បើទោះបីជាប្រទេសទាំង ២ បានយល់ព្រមលើការដាក់ទណ្ឌកម្មស្រដៀងគ្នាពីមុនមកក៏ដោយ ហើយរុស្សីបានចល័តទាហានជាច្រើនពីស៊ីបេរីនៅភាគខាងកើតទៅកាន់ភាគខាងលិចរបស់ខ្លួនវិញ ដែលជាសញ្ញាមួយបង្ហាញថា ទីក្រុងម៉ូស្គូ មានភាពជឿជាក់លើប្រទេសចិន តាមព្រំដែនរួមគ្នារបស់ពួកគេនៅភាគខាងកើត។
ចំណងទាក់ទងរុស្ស៊ី-ចិន ឈានដល់កម្រិតកំពូលដោយការចេញផ្សាយសេចក្តីថ្លែងការណ៍រួមខាងលើដែលនិយាយថា ភាពជាដៃគូរបស់ពួកគេ គឺ «មិនមានដែនកំណត់ទេ»។ សេចក្ដីថ្លែងការណ៍នេះត្រូវបានគេមើលឃើញថា ជាចំណុចរបត់នៃទំនាក់ទំនងរុស្ស៊ី-ចិន ហើយគឺជាលើកដំបូងដែលចិនបានចូលរួមមួយរុស្សីក្នុងការប្រឆាំងការពង្រីករបស់អង្គការណាតូ។ ប្រទេសទាំង ២ ក៏បានរិះគន់យុទ្ធសាស្ត្រឥណ្ឌូ-ប៉ាស៊ីហ្វិករបស់ទីក្រុងវ៉ាស៊ីនតោន និងភាពជាដៃគូសន្តិសុខថ្មី AUKUS ដែលរួមមានអង់គ្លេស និងអូស្ត្រាលី។ រុស្ស៊ីក៏បានទទួលស្គាល់ថា កោះតៃវ៉ាន់ គឺជា «ផ្នែកមួយ ដែលមិនអាចកាត់ផ្ដាច់បានរបស់ប្រទេសចិន»។
ចិន និងរុស្ស៊ី ក៏បានប្រកាសថា ពួកគេនឹងធ្វើការជាមួយប្រទេសផ្សេងទៀត ដើម្បី «លើកកម្ពស់លទ្ធិប្រជាធិបតេយ្យពិតប្រាកដ» និងប្រឆាំងនឹងមនោគមន៍វិជ្ជា និងស្ថាប័នដែលដឹកនាំដោយអាមេរិក ពោលគឺការកសាងសណ្ដាប់ធ្នាប់ពិភពលោកថ្មីមួយ។
ការពង្រឹងទំនាក់ទំនងចិន-រុស្ស៊ី អាចបង្ហាញពីការកំណត់រចនាសម្ព័ន្ធឡើងវិញនៃអំណាចត្រីកោណ ដែលកំណត់សង្គ្រាមត្រជាក់ និងដែលប្រធានាធិបតីអាមេរិករីឆាត នីកសុន បានកេងប្រវ័ញ្ចកាលពី ៥០ ឆ្នាំមុន នៅពេលដែលលោកធ្វើដំណើរទៅកាន់ក្រុងប៉េកាំង ដើម្បីបង្កើតទំនាក់ទំនង ដើម្បីទប់ទល់នឹងសហភាពសូវៀត។ កាលនោះទំនាក់ទំនងរវាងក្រុងប៉េកាំង និងក្រុងម៉ូស្គូ បានធ្លាក់ដល់ចំណុចទាបបំផុត ជុំវិញជម្លោះមនោគមន៍វិជ្ជាកុម្មុយនីស្ត និងគោលនយោបាយការបរទេស។
ប៉ុន្តែត្រឡប់មកសព្វថ្ងៃវិញ អ្វីផ្ទុយពីនេះ កំពុងកើតឡើង។
បើទោះបីជាទំនាក់ទំនងក្រុងប៉េកាំង និងក្រុងមូ៉ស្គូបានប្រសើរឡើងក៏ដោយ ការរីកចម្រើននេះគឺដោយសារពួកគេមានសត្រូវរួម គឺអាមេរិក ហើយជម្លោះមនោគមន៍វិជ្ជា និងគោលនយោបាយរវាងប្រទេសទាំង ២ គឺនៅមិនទាន់ដោះស្រាយទាំងស្រុងឡើយ។ អ្នកវិភាគមួយចំនួនបាននិយាយថា ដើម្បីប្រឆាំងរុស្ស៊ីលោក បៃដិន អាចធ្វើការផ្គាប់ចិត្តលោក ស៊ី ដើម្បីរារាំងការរីកចម្រើនបន្ថែមជាមួយរុស្ស៊ី៕
វីដេអូ៖
