.jpg)
កាលពីថ្ងៃអង្គារ ទី ២១ កុម្ភៈ ប្រទេសអាល្លឺម៉ង់ បានប្រកាសបញ្ឈប់គម្រោងបំពង់បង្ហូរឧស្ម័នក្រោមបាតសមុទ្រ Nord Stream 2 បន្ទាប់ពីរុស្ស៊ីបានប្រកាសទទួលស្គាល់ឯករាជភាពតំបន់ផ្ដាច់ខ្លួនចំនួន ២ នៅផ្នែកខាងកើតនៃប្រទេសអ៊ុយក្រែន ហើយដាក់ពង្រាយទាហានទៅទីនោះ។
បំពង់តម្លៃ ១១ ពាន់លានដុល្លារ ជាគម្រោងថាមពលចម្រូងចម្រាសបំផុតនៅទ្វីបអឺរ៉ុប បានសាងសង់រួចរាល់តាំងពីខែកញ្ញាមកម្ល៉េះ ប៉ុន្តែនៅមិនទាន់បានចាប់ផ្ដើមប្រតិបត្តិការ ខណៈពេលដែលរង់ចាំការអនុញ្ញាតពីអាល្លឺម៉ង់ និងសហភាពអឺរ៉ុប។
ដើមឡើយបំពង់នេះត្រូវបានគេរំពឹងថា នឹងជួយកាត់បន្ថយសម្ពាធនៃការឡើងតម្លៃថាមពលនៅអឺរ៉ុបក្រោយវិបត្តិនៃជំងឺកូវីដ ១៩។ ប្រទេសអាល្លឺម៉ង់ រំពឹងយ៉ាងខ្លាំងលើការនាំចូលឧស្ម័នហើយនិយាយថា បំពង់ Nord Stream 2 គឺជាគម្រោងពាណិជ្ជកម្មដែលនឹងពង្រីកប្រភពថាមពលរបស់អឺរ៉ុប។ បើទោះបីជាមានផលប្រយោជន៍បែបនេះក៏ដោយ ប្រទេសអឺរ៉ុបមួយចំនួន និងអាមេរិក បានរិះគន់គម្រោងនេះថា នឹងបង្កើនការរំពឹងលើរុស្ស៊ី ការកាត់ផ្ដាច់ចំណូលសម្រាប់ប្រទេសអ៊ុយក្រែន និងធ្វើឱ្យកាន់តែងាយរងគ្រោះសម្រាប់ការកាត់ផ្ដាច់ការផ្គត់ផ្គង់៕
វីដេអូ៖
