ក្រុមហ៊ុន Facebook កាលពីថ្ងៃ សុក្រ បានរឹតបន្តឹងសមត្ថភាពប្រព័ន្ធផ្សព្វផ្សាយរដ្ឋរបស់រុស្ស៊ីក្នុងការរកប្រាក់នៅលើវេទិកាប្រព័ន្ធផ្សព្វផ្សាយសង្គម ខណៈដែលការលុកលុយរបស់ទីក្រុងម៉ូស្គូទៅលើប្រទេសជិតខាងអ៊ុយក្រែនបានឈានដល់ផ្លូវនៃទីក្រុងកៀវ។
លោក Nathaniel Gleicher ប្រធានគោលនយោបាយសន្តិសុខរបស់ប្រព័ន្ធផ្សព្វផ្សាយសង្គមយក្ស បាននិយាយនៅលើ Twitter ថា៖ «ឥឡូវនេះ យើងកំពុងហាមឃាត់ប្រព័ន្ធផ្សព្វផ្សាយរដ្ឋរបស់រុស្ស៊ីពីការផ្សាយពាណិជ្ជកម្ម ឬរកប្រាក់នៅលើវេទិការបស់យើងគ្រប់ទីកន្លែងក្នុងពិភពលោក»។
លោកបានបន្ថែមថា ក្រុមហ៊ុន Facebookនឹងបន្តដាក់វិធានការបន្តបន្ទាប់ទៀតទៅប្រព័ន្ធផ្សព្វផ្សាយរដ្ឋរុស្ស៊ី។
ក្រុមហ៊ុនមេរបស់ Facebook ឈ្មោះ Meta បាននិយាយកាលពីថ្ងៃ សុក្រ ថា ប្រទេសរុស្ស៊ី នឹងវាយលុក សេវាកម្មរបស់ខ្លួនជាមួយនឹងការរឹតបន្តឹង បន្ទាប់ពីខ្លួន បានបដិសេធបញ្ជារបស់អាជ្ញាធរឱ្យបញ្ឈប់ការប្រើប្រាស់ឧបករណ៍ពិនិត្យការពិត និងស្លាកសញ្ញាព្រមានមាតិកានៅលើវេទិការបស់ខ្លួន។
បណ្តាញប្រព័ន្ធផ្សព្វផ្សាយសង្គម បានក្លាយទៅជារណសិរ្សមួយក្នុងការលុកលុយរបស់រុស្ស៊ីលើអ៊ុយក្រែន ដែលជាកន្លែងផ្តល់ព័ត៌មានបំភ័ន្ត ប៉ុន្តែក៏មានការត្រួតពិនិត្យតាមពេលវេលាជាក់ស្តែងនៃជម្លោះដែល កំពុងវិវឌ្ឍន៍យ៉ាងឆាប់រហ័ស ដែលសម្គាល់វិបត្តិភូមិសាស្ត្រនយោបាយដ៏ធំបំផុតរបស់អឺរ៉ុបក្នុងរយៈពេលជាច្រើនទសវត្សរ៍។
លោក Nick Clegg បាននិយាយនៅក្នុងសេចក្តីថ្លែងការណ៍ក្រុមហ៊ុន Meta ថា៖ «កាលពីម្សិលមិញអាជ្ញាធររុស្ស៊ី បានបញ្ជាឱ្យយើងបញ្ឈប់ការត្រួតពិនិត្យការពិតឯករាជ្យ និងការដាក់ស្លាកមាតិកា ដែលបានបង្ហោះនៅលើ Facebook ដោយស្ថាប័នប្រព័ន្ធផ្សព្វផ្សាយរដ្ឋចំនួន៤។ យើងបានបដិសេធ»។
សេចក្តីថ្លែងការណ៍របស់លោក ធ្វើឡើងប៉ុន្មានម៉ោង បន្ទាប់ពីនិយតករប្រព័ន្ធផ្សព្វផ្សាយរបស់រុស្ស៊ី បាននិយាយថា ខ្លួនកំពុងកំណត់ការចូលប្រើប្រាស់ Facebook ដោយចោទប្រកាន់ក្រុមហ៊ុនបច្ចេកវិទ្យាយក្សរបស់សហរដ្ឋអាមេរិកពីបទចាប់ពិរុទ្ធ និងរំលោភសិទ្ធិពលរដ្ឋរុស្ស៊ី។
កាលពីថ្ងៃ ពុធ ក្រុមហ៊ុន Facebook ក៏បានបញ្ចេញមុខងារមួយនៅក្នុងប្រទេសអ៊ុយក្រែន ដែលអនុញ្ញាតឱ្យមនុស្សចាក់សោគណនីពួកគេ ដើម្បីបង្កើនសុវត្ថិភាព ដោយប្រើឧបករណ៍ ដែលក្រុមហ៊ុនក៏បានធ្លាប់បានដាក់ បន្ទាប់ពីអាហ្វហ្គានីស្ថានបានធ្លាក់ទៅក្រុមតាលីបង់កាលពីឆ្នាំមុន។
លោក Gleicher បាននិយាយថា Facebook បានបង្កើតមជ្ឈមណ្ឌលប្រតិបត្តិការពិសេសមួយ ដើម្បីតាមដានស្ថានការណ៍ក្នុងប្រទេសអ៊ុយក្រែន ជាការឆ្លើយតបទៅនឹងជម្លោះយោធា ដែលកំពុងកើតឡើង៕