កាលពីថ្ងៃសុក្រ ទី ២៥ កុម្ភៈ ក្រសួងការបរទេសរុស្ស៊ី បានព្រមានប្រទេសស៊ុយអែត និងហ្វាំងឡង់ថាពួកគេនឹងបង្ក «ផលប៉ះពាល់យោធា និងនយោបាយយ៉ាងធ្ងន់ធ្ងរ» ប្រសិនបើពួកគេចូលជាសមាជិកនៃសម្ព័ន្ធភាពយោធាលោកខាងលិចណាតូ។
ក្នុងអំឡុងពេលនៃសន្និសីទសារព័ត៌មានមួយ អ្នកនាំពាក្យក្រសួងការបរទេសរុស្ស៊ី លោកស្រីម៉ារីយ៉ា ហ្សាការ៉ូវ៉ា បាននិយាយថា៖ «ហ្វាំងឡង់ និងស៊ុយអែត មិនគួររៀបចំគោលនយោ បាយ សន្តិសុខរបស់ពួកគេដោយផ្អែកលើការបំផ្លាញសន្តិសុខរបស់ប្រទេសដទៃទេ ហើយការចូលជាសមាជិកអង្គការណាតូអាចបង្កឱ្យមានផលវិបាកយ៉ាងធ្ងន់ធ្ងរ ហើយនឹងប្រឈមមុខនឹងផលវិបាកផ្នែកយោធា និងនយោបាយមួយចំនួន»។ លោកស្រី បានលើកឡើងបែបនេះ ខណៈពេលកងយោធារុស្សីបន្តការវាយប្រហារចូលក្នុងប្រទេសអ៊ុយក្រែន ជុំវិញការលម្អៀងទៅលោកខាងលិច។
ក្រោយមក ក្រសួងការបរទេសរុស្ស៊ី បានធ្វើការព្រមាននេះម្ដងទៀតនៅលើបណ្ដាញសង្គម Twitter ដោយសរសេរថា៖ «យើងចាត់ទុកការប្ដេជ្ញាចិត្តរបស់រដ្ឋាភិបាលហ្វាំងឡង់ចំពោះគោលនយោបាយមិនចូលបក្សសម្ព័ន្ធយោធា ជាកត្តាដ៏សំខាន់ក្នុងការធានាសន្តិសុខ និងស្ថិរភាពនៅអឺរ៉ុបខាងជើង។ ការចូលជាសមាជិករបស់ហ្វាំងឡង់ទៅ NATO នឹងមានផលប៉ះពាល់យោធា និងនយោបាយយ៉ាងធ្ងន់ធ្ងរ»។
ឯកអគ្គរដ្ឋទូតហ្វាំងឡង់ប្រចាំសហរដ្ឋអាមេរិកលោកមីកកូ ហាតាឡា បានសរសេរលើ Twitter ថា៖ «ភាពជាដៃគូជាមួយសម្ព័ន្ធភាពនេះគឺមានសារៈសំខាន់ណាស់សម្រាប់យើង។ ខណៈពេលដែលការរក្សាការពារជាតិដ៏រឹងមាំ យើងរក្សាឱកាសដាក់ពាក្យចូលជាសមាជិក។ វាជាសិទ្ធិអធិបតេយ្យភាពរបស់ប្រទេសនីមួយៗក្នុងការសម្រេចចិត្តលើគោលនយោបាយសន្តិសុខរបស់ខ្លួន»។
ប្រទេសអ៊ុយក្រែនបានបង្ហាញគោលបំណងចង់ចូលជាសមាជិកអង្គការណាតូ ប៉ុន្តែរុស្ស៊ីបានប្រឆាំងចំពោះការពង្រីករបស់អង្គការនេះមកជិតព្រំដែនរបស់ខ្លួន ដោយនិយាយថា វាជាការគំរាមកំហែងដល់សន្តិសុខរបស់ខ្លួន៕