កាលពីថ្ងៃអាទិត្យ ទី ២៨ កុម្ភៈ ក្រុមប្រឹក្សាសន្តិសុខអង្គការសហប្រជាជាតិបានកោះហៅសម័យប្រជុំអាសន្ននៃមហាសន្និបាតនៃប្រទេសទាំង ១៩៣ ដើម្បីពិភាក្សាការឈ្លានពានរបស់រុស្ស៊ីចូលទៅអ៊ុយក្រែន។
ការបោះឆ្នោតដោយក្រុមប្រឹក្សាដែលមានសមាជិកទាំង ១៥ គឺជាការបោះឆ្នោតនីតិវិធី ដូច្នេះរុស្ស៊ីមិនអាចប្រើអំណាចវេតូរបស់ខ្លួនបានទេ។ សេចក្ដីសម្រេចមួយដែលបើកសម័យប្រជុំមហាសន្និបាតត្រូវបានអនុម័តដោយសំឡេងគាំទ្រចំនួន ១១។ រុស្ស៊ីបានបោះឆ្នោតប្រឆាំង ខណៈចិន ឥណ្ឌា និងអេមីរ៉ាត់អារ៉ាប់រួមបានអនុប្បវាទមិនបោះឆ្នោត។
នេះគឺជាផ្នែកមួយនៃសកម្មភាពដ៏មមាញឹកនៅទីស្នាក់ការអង្គការសហប្រជាជាតិនៅក្រុងញូវយក។ វាបានកើតឡើងបន្ទាប់ពីរុស្ស៊ី បានវេតូសេចក្ដីសម្រេចមួយកាលពីថ្ងៃសុក្រ ដែលនឹងថ្កោលទោសសកម្មភាពរបស់រុស្ស៊ី និងទាមទារឱ្យរុស្ស៊ីដកទ័ពចេញពីអ៊ុយក្រែន។
ឯកអគ្គរដ្ឋទូតអាមេរិកប្រចាំអង្គការសហប្រជាជាតិលោក ស្រីលីនដា ថូម៉ាស់-ហ្គ្រីនហ្វីលបាននិយាយថាមហាសន្និបាតអង្គការសហប្រជាជាតិអាចបោះឆ្នោតលើសេចក្ដីសម្រេចស្រដៀងនឹងសេចក្ដីសម្រេចខាងលើនេះ។ គ្មានប្រទេសណាមួយមានអំណាចវេតូនៅមហាសន្និបាតទេ ប៉ុន្តែសេចក្ដីសម្រេចអនុម័តដោយមហាសន្និបាតគឺមិនមានទម្ងន់ផ្លូវច្បាប់ទេ។
បើទោះបីជាមិនមានទម្ងន់ផ្លូវច្បាប់ក៏ដោយ សេចក្ដីសម្រេចទាំងនេះមានទម្ងន់នយោបាយ។ សហរដ្ឋអាមេរិក និងសម្ព័ន្ធមិត្តរបស់ពួកគេមើលសកម្មភាពនៅអង្គការសហប្រជាជាតិជាឱកាសសម្រាប់បង្ហាញថារុស្ស៊ីនៅតែឯងលើឆាកពិភពលោក បន្ទាប់ពីការឈ្លានពានប្រទេសអ៊ុយក្រែន៕