ប្រជាជនសេណេហ្គាល់រាប់ពាន់នាក់ បានប្រមូលផ្តុំគ្នាកាលពីសប្ដាហ៍មុន ដើម្បីអបអរការបើកសម្ពោធកីឡដ្ឋានដ៏ធំសម្បើមមួយ ក្នុងគោលបំណងធ្វើឱ្យប្រទេសអាហ្វ្រិកក្លាយជាកន្លែងសម្រាប់ព្រឹត្តិការណ៍អន្តរជាតិ។
កីឡដ្ឋាននេះ ស្ថិតនៅក្នុងក្រុង Diamniadio ដែលជាទីក្រុងកំពុងសាងសង់ចម្ងាយប្រហែល ៣០ គីឡូម៉ែត្រ ពីរដ្ឋធានី Dakar ដែលផ្លូវរថភ្លើងល្បឿនលឿន បានបើកក្នុងខែធ្នូ។ កីឡដ្ឋានថ្មីនេះមានឈ្មោះថា Stade de Senegal នឹងក្លាយជាកន្លែងតែមួយគត់ក្នុងប្រទេសសេណេហ្គាល់ ដែលនឹងត្រូវប្រើប្រាស់សម្រាប់បាល់ទាត់អន្តរជាតិ។
កីឡដ្ឋាន ដែលមានសមត្ថភាពផ្ទុកអ្នកទស្សនា ៥ ម៉ឺនកៅអី ត្រូវបានសាទរដោយការលេងបាល់មិត្តភាពរវាងប្រធានាធិបតីសេណេហ្គាល់ លោក Macky Sall និងលោក Recep Tayyip Erdogan ប្រធានាធិបតីប្រទេសតួកគី។
ការបង្ហាញពីភាពរួសរាយរាក់ទាក់នេះ ធ្វើឡើងក្នុងអំឡុងពេលពិធីបើកកីឡដ្ឋានស្តង់ដា FIFA ដែលសាងសង់ ដោយអ្នកម៉ៅការតួកគី Summa។ ក្រុមហ៊ុននេះ ក៏បាន សាងសង់សាលសន្និសីទសណ្ឋាគារ សាកលវិទ្យាល័យ អាកាសយានដ្ឋាន និងស្ថានីយរថភ្លើងនៅទូទាំងទ្វីប ហើយនេះគឺជាគម្រោងទី២២ ដែលបានបញ្ចប់នៅអនុតំបន់សាហារ៉ាអាហ្វ្រិក។
ទោះបីជាកីឡដ្ឋាន មិនមែនជាអំណោយ ដូចអ្វីដែលចិនបានផ្តល់ដល់បណ្តាប្រទេសអាហ្វ្រិកក៏ដោយ វាបានបង្ហាញពីឱកាសមាសសម្រាប់ប្រទេសតួកគី ក្នុងការផ្សព្វផ្សាយអ្នកម៉ៅការតួកគីនៅចំពោះមុខមេដឹកនាំអាហ្វ្រិកជាច្រើននាក់ និងទស្សនិកជនក្នុងស្រុកដែលពោរពេញ ដោយភាពរំភើបអ្វី ដែលសេណេហ្គាល់ដែលកំពុងតែទទួលបាន ក្រោយយកជ័យជម្នះនៅក្នុងការប្រកួត Africa Cup of Nations នៅដើមខែនេះ។
១ ថ្ងៃមុននេះ លោក Sall បានសរសើរអ្នកម៉ៅការនៅក្នុងសន្និសីទកាសែតជាមួយលោក Erdogan ដោយនិយាយថា អ្នកម៉ៅការ Summa បានបញ្ចប់គម្រោងក្នុងរយៈពេល ១៧ ខែជំនួសឱ្យ ២៤ ខែ ដែលបានគ្រោងទុកដំបូង។
លោកបានបន្តថា៖ «នេះគឺជាឧទាហរណ៍ដ៏អស្ចារ្យមួយទៀតនៃរបៀប ដែលក្រុមហ៊ុនតួកគីមានបំពេញការងារល្អ»។ នាថ្ងៃដដែល កិច្ចព្រមព្រៀងចំនួន ៥ ត្រូវបានចុះហត្ថលេខារវាងប្រទេសទាំង ២ រួមទាំងកិច្ចព្រមព្រៀងសហប្រតិបត្តិការសន្តិសុខផងដែរ។
ការសរសើររបស់លោក Sall បានពង្រីកដល់ក្រុមហ៊ុនផលិតរោងចក្រថាមពលអណ្តែតទឹករបស់តួកគី Karpowership ដែលផ្គត់ផ្គង់អគ្គិសនីដល់ទៅ ១៥ ភាគរយ ដល់ប្រទេសសេណេហ្គាល់។ ក្រុមហ៊ុន Calik Holding ក៏កំពុងសាងសង់រោងចក្រថាមពលឧស្ម័នចម្រុះ ៣០០ មេហ្គាវ៉ាត់ និង Summa ក៏ដូចជាអ្នកម៉ៅការដូចគ្នា Limak សម្រាប់ការបញ្ចប់ព្រលានយន្តហោះអន្តរជាតិ Dakar Blaise Diagne ផងដែរ។
អាកាសយានដ្ឋាននោះ ត្រូវបាន ចុះកិច្ចសន្យាដំបូងជាមួយក្រុមហ៊ុន Saudi Binladin Group ប៉ុន្តែក្រុមហ៊ុនអាចសាងសង់បានត្រឹមតែ ៧០ ភាគរយនៃគម្រោង ដោយចំណាយពេល ៩ ឆ្នាំ ប៉ុន្តែក្រោយសម្ព័ន្ធតួកគី បានកាន់កាប់បន្តក៏បានបញ្ចប់ក្នុងរយៈពេល ៨ ខែ។
លោក Erdogan កាលពីថ្ងៃអង្គារ បានធ្វើឱ្យប្រាកដថា នឹងបង្ហាញពីការរួមចំណែករបស់សមភាគីអាហ្វ្រិករបស់ខ្លួន។ គាត់បាននិយាយថា ខណៈពេលដែលកំពុងអភិវឌ្ឍទំនាក់ទំនង យើងរៀបចំផែនការយ៉ាងប្រុងប្រយ័ត្ន ដើម្បីឱ្យយើងប្រើប្រាស់ធនធានមនុស្សរបស់សេណេហ្គាល់។
ការសាងសង់កីឡដ្ឋាននេះ បានផ្ដល់ការងារដល់កម្មករ ១ ៥០០ នាក់ ដោយក្នុងនោះ បានផ្ដល់ការងារដល់ប្រជាជនសេណេហ្គាល់ ១ ០០០ នាក់។ លោក Summa បាននិយាយថា គម្រោងនេះក៏បានប្រើប្រាស់អ្នកផ្គត់ផ្គង់ក្នុងស្រុកចំនួន ១៥៥ ក្រុមហ៊ុនផងដែរ។
ការពិពណ៌នានេះ គឺផ្ទុយស្រឡះពីគម្រោងរបស់ចិន ដែលជារឿយៗត្រូវបានរិះគន់ថា ពឹងផ្អែកខ្លាំងលើកម្មករចិន និងសម្ភាររបស់ចិន។
នៅក្នុងកិច្ចប្រជុំកំពូលភាពជាដៃគូតួកគី-អាហ្វ្រិកនាពេលថ្មីៗនេះ នៅទីក្រុងអ៊ីស្តង់ប៊ុល សារព័ត៌មាន Nikkei Asia បានសង្កេតឃើញ លោក Erdogan ប្រមូលផ្តុំអ្នកម៉ៅការតួកគី និងមេដឹកនាំអាហ្វ្រិករួមគ្នានៅគ្រប់ឱកាសសម្រាប់ការជជែករហ័សរវាងកិច្ចប្រជុំទ្វេភាគីរបស់គាត់ ដោយចាប់យក ឱកាសមិនថាតូច ឬធំក៏ដោយ។
ដោយមានប្រមុខរដ្ឋចំនួន ១៦ និងរដ្ឋមន្ត្រីជាង ១០០ នាក់ មកពីទ្វីបអាហ្វ្រិកចូលរួម កិច្ចប្រជុំកំពូល និងកិច្ចខិតខំប្រឹងប្រែងរបស់មេដឹកនាំតួកគី បានផ្តល់នូវលទ្ធផលនៃកិច្ចព្រមព្រៀង។
លោក Federico Donelli អ្នកស្រាវជ្រាវនៅសាកលវិទ្យាល័យ Genoa ក្នុងប្រទេសអ៊ីតាលី និងជាអ្នកឯកទេសគោលនយោបាយអាហ្វ្រិករបស់ប្រទេសតួកគី បានប្រាប់ Nikkei ថា ប្រទេសតួកគី កំពុងបង្ហាញខ្លួនឯងថា ជា «មធ្យោបាយទី៣» ដែលជាជម្រើសមួយសម្រាប់គំរូអភិវឌ្ឍន៍សេដ្ឋកិច្ច និងស្ថាប័នសម្រាប់ទ្វីបអាហ្វ្រិក ដែលផ្តល់ដោយទីក្រុងប៉េកាំង ឬប្រទេសលោកខាងលិច។
លោក Donelli ដែលកាលពីឆ្នាំមុនបានចេញផ្សាយសៀវភៅ «តួកគីក្នុងទ្វីបអាហ្វ្រិក» បាននិយាយថា ទាំងការវិនិយោគរបស់លោកខាងលិច និងចិន បានមកជាមួយនឹងសំណុំនៃលក្ខខណ្ឌផ្សេងគ្នា ដោយគំរូលោកខាងលិចសម្រាប់ទ្វីបអាហ្វ្រិក គឺដាក់លក្ខខណ្ឌសេរីនិយម មូលធននិយម សេដ្ឋកិច្ចនិងនយោបាយ ដើម្បីទទួលបានការវិនិយោគ។
ផ្ទុយទៅវិញ ប្រទេសតួកគី កំពុង «ព្យាយាមនៅកណ្តាល» ដោយមិនភ្ជាប់លក្ខខណ្ឌផ្សេងៗ នៅពេលបង្កើតទំនាក់ទំនងជាមួយបណ្តាប្រទេសអាហ្វ្រិក៕