.jpg)
សហរដ្ឋអាមេរិក និងសម្ព័ន្ធមិត្តលោកខាងលិចរបស់ខ្លួនបានប្រកាសដាក់ទណ្ឌកម្មប្រភេទខ្លាំងបំផុតទៅលើរុស្សុី ដែលក្នុងចំណោមទណ្ឌកម្មជាច្រើនទៀតដែលត្រូវបានដាក់ក្នុងការឆ្លើយតបនឹងការលុកលុយទៅលើប្រទេសអ៊ុយក្រែន។
វិធានការប្រកាសកាលពីថ្ងៃសៅរ៍ គឺផ្ដោតគោលដៅដោយផ្ទាល់ទៅលើធនាគារកណ្ដាលរបស់រុស្ស៊ី និងរួមជាមួយការកាត់ធនាគាររុស្ស៊ីមួយចំនួនពីបណ្ដាញទូទាត់ប្រាក់អន្តរជាតិ SWIFT ក្នុងគោលបំណងកាត់ផ្ដាច់ទំនាក់ទំនងប្រទេសនេះ ពីបណ្ដាញស្ថាប័នហិរញ្ញវត្ថុពិភពលោក។ វិធានការនេះ មានបំណងបង្កអស្ថិរភាពក្នុងសេដ្ឋកិច្ចរុស្ស៊ី និងជួយបង្កើនផលប៉ះពាល់នៃទណ្ឌកម្មផ្សេងទៀត ដែលដាក់ទៅលើសេដ្ឋី និងក្រុមហ៊ុនរុស្ស៊ីមួយចំនួន។
មន្ត្រីអាមេរិក ១ រូប បាននិយាយថា វិធានការនេះ គឺមានន័យថា ប្រទេសរុស្ស៊ី «ត្រូវបានទាត់ចេញពីប្រព័ន្ធហិរញ្ញវត្ថុអន្តរជាតិ» ហើយក្លាយជា «ជនគេបន្សាត់ចោលពីបណ្ដាញសេដ្ឋកិច្ច និងហិរញ្ញវត្ថុពិភពលោក»។
សហរដ្ឋអាមេរិក ចក្រភពអង់គ្លេស កាណាដា បារាំង អាល្លឺម៉ង់ អ៊ីតាលី និងគណៈកម្មការអឺរ៉ុប បាននិយាយថា វិធានការរបស់ពួកគេ នឹងរារាំងធនាគារកណ្ដាលរបស់រុស្ស៊ី កុំឱ្យប្រើប្រាស់មូលនិធិរូបិយប័ណ្ណបរទេសប្រមាណជាង ៦៣០ ពាន់លានដុល្លាររបស់ពួកគេ ដើម្បីទប់ទល់នឹងផលវិបាកនៃទណ្ឌកម្មដទៃទៀត។ ក្រុមប្រទេសនេះមិនបានបញ្ជាក់ថា វិធានការប្រឆាំងនឹងធនាគារកណ្ដាលរុស្ស៊ី នឹងអនុវត្តដោយបែបណាទេ ប៉ុន្តែអ្នកវិភាគមួយចំនួន បាននិយាយថា វិធី ១ គឺការដាក់ចូល «បញ្ជីកំណត់ពិសេស» របស់អាមេរិក ដែលនឹងហាមឃាត់មិនឱ្យមានការជួញដូរជាមួយនឹងបុគ្គល ឬស្ថាប័នអាមេរិក។
មូលនិធិរូបិយប័ណ្ណបរទេស គឺជាសសរទ្រូងសំខាន់មួយសម្រាប់កម្លាំងសេដ្ឋកិច្ចរបស់រុស្ស៊ី ហើយសម្ព័ន្ធភាពលោកខាងលិច កំពុងព្យាយាមរារាំងការប្រើប្រាស់វា។ ខណៈរុស្ស៊ីព្យាយាមកាត់បន្ថយការស្តុកទុកដុល្លារអាមេរិក ផ្នែកដ៏ធំមួយនៃមូលនិធិនេះ គឺត្រូវបានផ្ញើនៅសហរដ្ឋអាមេរិក អាល្លឺម៉ង់ បារាំង អង់គ្លេស អូទ្រីស និងជប៉ុន។
ប្រសិនបើរុស្ស៊ី មិនអាចដោះដូររូបិយប័ណ្ណបរទេសមករូបិយប័ណ្ណរបស់ខ្លួនវិញនោះទេ គេព្យាករថា រុស្សុីនឹងរងផលប៉ះពាល់យ៉ាងខ្លាំង។ កាលពីថ្ងៃចន្ទតម្លៃរូបិយប័ណ្ណរូប្លិ៍របស់រុស្ស៊ី បានធ្លាក់អស់៣០ ភាគរយដល់កម្រិតទាបបំផុតក្នុងប្រវត្តិសាស្ត្របច្ចុប្បន្ន។ អ្នកវិភាគជាច្រើននិយាយថា ទណ្ឌកម្មបែបនេះ នឹងបង្កភាពស្លន់ស្លោក្នុងចំណោមប្រជាជនរុស្ស៊ី។ ប្រជាជនជាច្រើនបានចាប់ផ្ដើមដកប្រាក់ពីធនាគាររួចទៅហើយ ដោយព្រួយបារម្ភថា ប្រព័ន្ធហិរញ្ញវត្ថុរុស្ស៊ី អាចជាប់គាំង។
រុស្ស៊ីនៅសល់ចំណូលបានមកពីការនាំចេញប្រេង និងឧស្ម័នជាង ១៩ ពាន់លានដុល្លារ ដើម្បីជួយទប់ទល់នឹងផលប៉ះពាល់មួយចំនួន។ រុស្ស៊ីនៅតែបន្តទទួលចំណូលជារូបិយប័ណ្ណបរទេសពីវិស័យនេះ ដែលអាចនឹងជួយទ្រទ្រង់សេដ្ឋកិច្ច ហើយចំណាយលើការនាំចូលផលិតផល។ សម្រាប់ឥឡូវនេះ ធនាគារកណ្ដាលរុស្ស៊ី បានផ្ដល់ប្រាក់កម្ចីទៅឱ្យធនាគារនានា ដើម្បីទ្រទ្រង់ពួកគេកុំឱ្យដួលរលំ ដោយសារការដកប្រាក់ដោយអតិថិជន។
ប្រសិនបើធនាគារកណ្ដាលរុស្ស៊ី មិនអាចប្រើប្រាស់មូលនិធិរូបិយប័ណ្ណបរទេស ពួកគេនៅមានជម្រើស ២ គឺការបង្កើនការប្រាក់ និងការគ្រប់គ្រងរំហូររូបិយប័ណ្ណចេញចូលប្រទេស។
ធនាគារនេះអាចស្វែងរកជំនួយពីប្រទេសចិន ដែលជាទីកន្លែងខ្លួន បានផ្ញើជាង ១៤ ភាគរយនៃមូលនិធិរូបិយប័ណ្ណរបស់ខ្លួន ដែលបំណែកធំបំផុតដែលរុស្ស៊ីផ្ញើនៅបរទេស។ ប៉ុន្តែអ្នកវិភាគមួយចំនួន បាននិយាយថា វានៅមិនទាន់ច្បាស់ទេថា ចិននឹងផ្ដល់ជំនួយដែរ ឬទេ ខណៈពេលដែលធនាគារចិនជាច្រើននៅមានការព្រួយបារម្ភអំពីការរងទណ្ឌកម្ម ដោយសារការផ្ដល់ជំនួយទៅឱ្យ ដែលនឹងកាត់ផ្ដាច់ពួកគេពីទីផ្សារដុល្លារ និងអឺរ៉ូ។ ធនាគារចិនមួយចំនួនបានរារាំងការទូទាត់ប្រាក់ក្នុងការជួញដូរប្រេងរុស្ស៊ីទៅហើយ។
ធនាគារកណ្ដាលរុស្សុី អាចព្យាយាមលក់មាសចំនួន ២ ២៩៩ តោន ដែលខ្លួននិយាយថា ស្តុកនៅទឹកដីរុស្ស៊ី ទៅកាន់រដ្ឋាភិបាលដទៃទៀត ប៉ុន្តែអាចមានការលំបាកដោយសារហេតុផលដដែល។
បន្ថែមពីលើនេះ ការកាត់ផ្ដាច់ធនាគាររុស្ស៊ី ចេញពីបណ្តាញ SWIFT នឹងបង្កឱ្យមានការរំខានយ៉ាងធ្ងន់ធ្ងរដល់សេដ្ឋកិច្ចរបស់ប្រទេសនេះ ព្រោះវានឹងរឹតត្បិតយ៉ាងខ្លាំងដល់ការចូលទៅកាន់ទីផ្សារហិរញ្ញវត្ថុពិភពលោករបស់ប្រទេសនេះ។
ការហាមប្រាមនេះ នឹងធ្វើឱ្យមានការលំបាកសម្រាប់ក្រុមហ៊ុន និងបុគ្គលរុស្ស៊ីក្នុងការទូទាត់សម្រាប់ទំនិញនាំចូល ឬទទួលបានការទូទាត់សម្រាប់ការនាំចេញរបស់ពួកគេ ដែលបង្កផលប៉ះពាល់យ៉ាងធ្ងន់ធ្ងរដល់វិស័យប្រេង និងឧស្ម័នដ៏សំខាន់របស់ប្រទេសនេះ ដែលពឹងផ្អែកខ្លាំងលើ SWIFT សម្រាប់ចលនាទុន។ វាក៏នឹងរឹតត្បិតសមត្ថភាពរបស់ប្រជាជនរុស្ស៊ីក្នុងការវិនិយោគ ឬខ្ចីប្រាក់ពីបរទេសផងដែរ។
ការកាត់ធនាគារអ៊ីរ៉ង់ពីបណ្ដាញនេះ គឺជាផ្នែកមួយដែលបង្កការធ្លាក់ចុះយ៉ាងខ្លាំងនៃការនាំចេញប្រេងរបស់ប្រទេសនេះ។
សម្រាប់ការកាត់ផ្ដាច់ លោកខាងលិចក៏នៅមិនទាន់បញ្ជាក់ព័ត៌មានលម្អិតផងដែរ។ អ្វីដែលគេដឹងនោះ គឺថា វិធានការនេះ នឹងមានផលប៉ះពាល់យ៉ាងខ្លាំងដល់ការផ្គត់ផ្គង់ថាមពលទៅកាន់ទ្វីបអឺរ៉ុបដូច្នេះគេព្យាករថា វិធានការខាងលើនឹងមានការលើកលែងសម្រាប់ការទូទាត់ប្រាក់ក្នុងវិស័យថាមពល។
ក្រៅពី SWIFT ស្ថាប័នហិរញ្ញវត្ថុរុស្ស៊ីអាចប្រើប្រាស់បណ្ដាញផ្សេងទៀតដូចជាទូរស័ព្ទ កម្មវិធីផ្ញើសារ ឬអ៊ីមែល និងការធ្វើការទូទាត់តាមរយៈធនាគារនៅក្នុងប្រទេសដែលមិនដាក់ទណ្ឌកម្ម។ ប៉ុន្តែជម្រើសទាំងនេះ នឹងមិនមានប្រសិទ្ធភាព និងសុវត្ថិភាពដូច SWIFT ទេ ហើយអាចនាំឱ្យមានការចំណាយខ្ពស់ និងការធ្លាក់ចុះនៃបរិមាណប្រតិបត្តិការ៕
