.jpg)
លោកប្រធានាធិបតីវ្ល៉ាឌីមៀរ ពូទីន។ AFP
កាលពីថ្ងៃអាទិត្យ ទី ២៧ កុម្ភៈ ប្រធានាធិបតីរុស្ស៊ី លោក វ្ល៉ាឌីមៀរ ពូទីន បានបញ្ជាឱ្យកងកម្លាំងនុយក្លេអ៊ែរត្រៀមខ្លួនកម្រិតខ្ពស់បំផុត ខណៈពេលដែលលោកខាងលិចគាបសង្កត់សេដ្ឋកិច្ចប្រទេសនេះ ជុំវិញការសម្រេចចិត្តរបស់ខ្លួនក្នុងការឈ្លានពានចូលប្រទេសអ៊ុយក្រែន។
លោក ពូទីន ដែលបានហៅការឈ្លានពានរបស់លោកថា «ប្រតិបត្តិការពិសេស» បានលើកឡើងថា សំដីអរិភាពរបស់មេដឹកនាំអង្គការណាតូ និងការដាក់ទណ្ឌកម្មសេដ្ឋកិច្ចដោយលោកខាងលិច គឺជាហេតុផលដែលសម្រេចបញ្ជាឱ្យកងកម្លាំងប្រដាប់អាវុធនុយក្លេអ៊ែរត្រៀមខ្លួនបែបនេះ។
លោក ពូទីន បាននិយាយនៅលើទូរទស្សន៍រុស្ស៊ីថា៖ «មិនត្រឹមតែបណ្តាប្រទេសលោកខាងលិចចាត់វិធានការអរិភាពប្រឆាំងនឹងប្រទេសរបស់យើងក្នុងផ្នែកសេដ្ឋកិច្ចនោះទេ - ខ្ញុំមានន័យថា ទណ្ឌកម្មខុសច្បាប់ដែលមនុស្សគ្រប់គ្នាដឹងយ៉ាងច្បាស់ - ប៉ុន្តែក៏មានមន្ត្រីកំពូលនៃប្រទេសនាំមុខគេណាតូអនុញ្ញាតឱ្យខ្លួនគេធ្វើសេចក្ដីថ្លែងការណ៍ទាក់ទងនឹងប្រទេសរបស់យើង»។
ប្រមុខការទូតសហភាពអឺរ៉ុបលោក យ៉ូសែប បូរេល បាននិយាយថាលោកពូទីន កំពុងគំរាមកំហែងយ៉ាងច្បាស់អំពីការវាយប្រហារនុយក្លេអ៊ែរទៅលើប្រទេសដែលគាំទ្រប្រទេសអ៊ុយក្រែន។ លោកនិយាយថា៖ «យើងខ្លាចថារុស្ស៊ី នឹងមិនឈប់នៅត្រឹមអ៊ុយក្រែន»។
រយ់ៈពេលមិនដល់ ៤ ថ្ងៃ បន្ទាប់ការឈ្លានពានបានចាប់ផ្ដើម លោកខាងលិចបានអនុម័តទណ្ឌកម្មយ៉ាងទូលំទូលាយលើសេដ្ឋកិច្ចរបស់ប្រទេសរុស្ស៊ី។ កាលពីថ្ងៃចន្ទ តម្លៃរូបិយប័ណ្ណរូបរបស់រុស្ស៊ី បានធ្លាក់អស់ ៣០ ភាគរយ ធៀបនឹងដុល្លារអាមេរិក ដែលជាកម្រិតទាបបំផុតក្នុងប្រវត្តិសាស្ត្ររុស្ស៊ី បន្ទាប់ពីបណ្ដាប្រទេសលោកខាងលិចអនុវត្តវិធានការកាត់ផ្ដាច់ធនាគាររុស្ស៊ីមួយចំនួនពីបណ្ដាញទូទាត់ប្រាក់អន្តរជាតិ SWIFT។ កាលពីអាទិត្យ ប្រធានាធិបតីប្រទេសស្វ៊ីស ដែលមានប្រវត្តិប្រកាន់គោលនយោបាយអព្យាក្រឹត បានប្រកាសថា រដ្ឋាភិបាលរបស់លោក គ្រោងនឹងចាត់វិធានការតាមសហភាពអឺរ៉ុប ក្នុងការដាក់ទណ្ឌកម្មលើសេដ្ឋកិច្ចរុស្ស៊ី និងបង្កកទ្រព្យសម្បត្តិសេដ្ឋីរុស្ស៊ី៕
