យោងតាមមន្ត្រីអ៊ុយក្រែន យន្តហោះដ៏ធំបំផុតរបស់ពិភពលោកម៉ូដែល Antonov AN-225 ត្រូវបានបំផ្លាញអំឡុងពេលការលុកលុយរបស់រុស្ស៊ីមកលើអ៊ុយក្រែន ដែលបង្កើតឱ្យមានការភ្ញាក់ផ្អើល និងសោកសៅក្នុងយ៉ាងខ្លាំងក្នុងចំណោមពិភពអាកាសចរណ៍។
យន្តហោះដ៏ធំសម្បើម ដែលមានឈ្មោះថា "Mriya" ឬ "Dream" ជាភាសាអ៊ុយក្រែន ត្រូវបានចតនៅអាកាសយានដ្ឋានក្បែរទីក្រុង Kyiv នៅពេល ដែលវាត្រូវបានវាយប្រហារដោយទាហានរុស្ស៊ី ដែលពង្រាយនៅទីនោះ។ អាជ្ញាធរអ៊ុយក្រែនបាននិយាយថា ពួកគេ នឹងសាងសង់យន្តហោះឡើងវិញ។
ប្រភពដដែលបានបន្តថា៖ «រុស្ស៊ីប្រហែលជាបានបំផ្លាញ ''Mriya" របស់យើង។ ប៉ុន្តែពួកគេនឹងមិនអាចបំផ្លាញក្តីសុបិនរបស់យើងអំពីរដ្ឋអឺរ៉ុបដ៏រឹងមាំ សេរី និងប្រជាធិបតេយ្យនោះទេ។ យើងនឹងឈ្នះ!»។ នេះបើតាមឱ្យដឹងពីរដ្ឋមន្ត្រីការបរទេសអ៊ុយក្រែន លោក Dmytro Kuleba នៅលើសារ Twitter។
យ៉ាងណាមិញ នៅមិនទាន់មានការបញ្ជាក់ឯករាជ្យពីការបំផ្លាញរបស់យន្តហោះនេះទេ។ សារនៅលើ Tweet ពីក្រុមហ៊ុន Antonov បាននិយាយថា ខ្លួនមិនអាចផ្ទៀងផ្ទាត់ "ស្ថានភាពបច្ចេកទេស" របស់យន្តហោះបានទេ រហូតដល់វាត្រូវបានត្រួតពិនិត្យដោយអ្នកជំនាញ។
ក្រុមហ៊ុនការពារជាតិអ៊ុយក្រែន Ukroboronprom ដែលគ្រប់គ្រងដោយលោក Antonovកាលពីថ្ងៃអាទិត្យបានចេញសេចក្តីថ្លែងការណ៍មួយដោយនិយាយថា យន្តហោះនេះត្រូវបានបំផ្លាញ ប៉ុន្តែនឹងត្រូវសាងសង់ឡើងវិញដោយការចំណាយរបស់រុស្ស៊ី ដោយវាមានតម្លៃ ៣ពាន់លានដុល្លារ។
សេចក្តីថ្លែងការណ៍បាននិយាយថា៖ «ការស្តារឡើងវិញត្រូវបានគេប៉ាន់ប្រមាណថា នឹងចំណាយប្រាក់ជាង៣ ពាន់លានដុល្លារអាមេរិក និងចំណាយពេលលើសពី ៥ ឆ្នាំ។ ភារកិច្ចរបស់យើងគឺដើម្បីធានាថាការចំណាយទាំងនេះ ត្រូវបានរ៉ាប់រង ដោយសហព័ន្ធរុស្ស៊ីដែលបានបណ្តាលឱ្យមានការខូចខាតដោយចេតនាដល់វិស័យអាកាសចរណ៍ និងការដឹកជញ្ជូនតាមផ្លូវអាកាសរបស់អ៊ុយក្រែន»។
ក្នុងសេចក្តីថ្លែងការណ៍ក្រោយមក ក្រុមហ៊ុនដដែល បាននិយាយថា យន្តហោះបានចុះចតនៅលើដីក្បែរក្រុង Kyiv កាលពីថ្ងៃទី ២៤ ខែកុម្ភៈ កំពុងស្ថិតក្រោមការថែទាំ។
យោងតាមនាយកក្រុមហ៊ុន Antonov Airlines ម៉ាស៊ីនមួយក្នុងចំណោមម៉ាស៊ីនទាំងអស់ ត្រូវបានរុះរើដើម្បីជួសជុល ហើយយន្តហោះមិនអាចហោះចេញនៅថ្ងៃនោះបានទេ បើទោះបីជាមានបញ្ជាសមរម្យក៏ដោយ។
កងកម្លាំងរុស្ស៊ីបានអះអាងថា ខ្លួនបានដណ្តើមយកអាកាសយានដ្ឋាន Hostomel ជាកន្លែង ដែលយន្តហោះ AN-225 តាំងទីកាលពីថ្ងៃសុក្រ។ ក្រុមសារព័ត៌មាន CNN នៅទីតាំង បានឃើញទាហានជើងអាកាសរុស្ស៊ីចូលកាន់កាប់ទីតាំង។រូបភាពផ្កាយរណបពី Maxar Technologies បង្ហាញពីការខូចខាតយ៉ាងសំខាន់ចំពោះផ្នែកមួយ ដែលមានផ្ទៃ (ឬហៅថា hangar)ដែលយន្តហោះAN-225 តាំងទី។
ទន្ទឹមនឹងនោះ ប្រព័ន្ធគ្រប់គ្រងធនធានរបស់ NASA បានរកឃើញភ្លើងឆេះជាច្រើនកន្លែងនៅព្រលានយន្តហោះរួមទាំងនៅឃ្លាំងដែលយន្តហោះ ត្រូវបានរក្សាទុក។ យោងតាមទិន្នន័យរបស់NASA ដែលទទួលបានពីផ្កាយរណប NOAA និង NASA បានឱ្យដឹងថា អគ្គិភ័យនៅឃ្លាំងត្រូវបានគេរកឃើញនៅម៉ោង ១១:១៣ ព្រឹកថ្ងៃអាទិត្យ។
យ៉ាងណាមិញ គេនៅមិនទាន់ច្បាស់ទេថា តើភ្លើងឆេះនៅអាកាសយានដ្ឋាននេះ គឺជាលទ្ធផលនៃអគ្គិភ័យពិតប្រាកដ ឬការផ្ទុះពីការវាយប្រហារដោយយោធា។ប្រសិនបើមានការបញ្ជាក់ ការវាយប្រហារនេះនឹងបង្ហាញពីការបញ្ចប់ដ៏គួរឱ្យតក់ស្លុតចំពោះយន្តហោះដែលបានបម្រើការជាង៣០ ឆ្នាំ មកហើយពោល គឺមានអាយុកាលតាំងពីសម័យសហភាពសូវៀតមកម្ល៉េះ៕