ប្រធានាធិបតីស្វីស លោក Ignazio Cassis បាននិយាយកាលពីថ្ងៃអាទិត្យថា វាពិតជារឿងគួរតែធ្វើ ដែលប្រទេសស្វីស នឹងធ្វើតាមសហភាពអឺរ៉ុប (EU) នៅថ្ងៃចន្ទ ក្នុងការដាក់ទណ្ឌកម្មរុស្ស៊ី និងបង្កកទ្រព្យសម្បត្តិរុស្ស៊ី នៅក្នុងប្រទេសអាល់ផែន។
លោក Cassis បានសម្ភាសន៍នៅលើទូរទស្សន៍សាធារណៈ Swiss ជាភាសាបារាំងលើស្ថានីយ RTS ដោយនិយាយថា ក្រុមប្រឹក្សាសហព័ន្ធ ដែលមានសមាជិក៧រូបនឹងជួបប្រជុំគ្នានៅថ្ងៃចន្ទ ហើយពិនិត្យមើលអនុសាសន៍របស់នាយកដ្ឋានហិរញ្ញវត្ថុ និងសេដ្ឋកិច្ច។
នៅពេលសួរថា តើប្រទេសស្វ៊ីស ដែលជាមជ្ឈមណ្ឌលហិរញ្ញវត្ថុដ៏សំខាន់ និងជាមជ្ឈមណ្ឌលពាណិជ្ជកម្មទំនិញ នឹងដើរតាមវិធានEU ក្នុងការបង្កកទ្រព្យសម្បត្តិរបស់រុស្ស៊ី ឬ អត់នោះ លោកបាននិយាយថា៖ «វាប្រហែលទំនងជាអ៊ិអញ្ចឹងដែរ ដោយសាររដ្ឋាភិបាលនឹងសម្រេចចិត្តធ្វើដូច្នេះនៅថ្ងៃស្អែក ប៉ុន្តែខ្ញុំមិនអាចគិតទុកជាមុនអំពីការសម្រេចចិត្តមិនទាន់បានធ្វើឡើងនៅឡើយទេ»។
លោក Cassis បាននិយាយថា អព្យាក្រឹតភាពរបស់ប្រទេសស្វ៊ីសត្រូវតែរក្សា ហើយខ្លួនបានត្រៀមខ្លួនរួចជាស្រេចក្នុងការផ្តល់ការិយាល័យដ៏ល្អរបស់ខ្លួនសម្រាប់ការទូត ប្រសិនបើកិច្ចពិភាក្សារវាងមន្ត្រីអ៊ុយក្រែន និងរុស្ស៊ីនៅព្រំដែនបេឡារុស្សមិនជោគជ័យ ឧទាហរណ៍ដូចជាមិនបានឈានដល់បទឈប់បាញ់ជាដើម។
គួរបញ្ជាក់ផងដែរថា ប្រទេសស្វីសបានដើរលើខ្សែបន្ទាត់ដ៏ច្របូកច្របល់រវាងការបង្ហាញសាមគ្គីភាពជាមួយលោកខាងលិច និងការរក្សានូវអព្យាក្រឹតភាពប្រពៃណីរបស់ខ្លួន ដែលរដ្ឋាភិបាលនិយាយថា អាចធ្វើឱ្យវាក្លាយជាអ្នកសម្រុះសម្រួលដ៏មានសក្តានុពល។
រដ្ឋាភិបាលស្វីសកាលពីសប្តាហ៍មុនបានធ្វើវិសោធនកម្មបញ្ជីតាមដានរបស់ខ្លួនដើម្បីរួមបញ្ចូលបុគ្គលចំនួន ៣៦៣ នាក់ និងក្រុមហ៊ុនចំនួន ៤ ដែលសហភាពអឺរ៉ុប បានដាក់ក្នុងបញ្ជីដាក់ទណ្ឌកម្មរបស់ខ្លួនដើម្បីដាក់ទណ្ឌកម្មលើទីក្រុងម៉ូស្គូ។
គួររម្លឹកដែរថា ប្រជាជនរុស្ស៊ីកាន់កាប់ទឹកប្រាក់ជិត ១០,៤ ពាន់លានហ្វ្រង់ស្វ៊ីស (ឬ ១១,២៤ ពាន់លានដុល្លារ) នៅក្នុងប្រទេសស្វីសក្នុងឆ្នាំ ២០២០។ នេះបើតាមឱ្យដឹងពីទិន្នន័យរបស់ធនាគារជាតិស្វ៊ីស៕