សហរដ្ឋអាមេរិកចក្រភពអង់គ្លេស និងសហភាពអឺរ៉ុប បានអនុម័តទណ្ឌកម្មដែលមានបំណងបង្កកទ្រព្យសម្បត្តិប្រធានាធិបតីរុស្ស៊ី លោក វ្ល៉ាឌីមៀរ ពូទីន និងរដ្ឋមន្ត្រីការបរទេសរបស់គាត់ គឺលោក Sergei Lavrov ជាការឆ្លើយតបទៅនឹងសង្គ្រាមនៅអ៊ុយក្រែន។
ប្រទេសដដែលទាំងនេះ ក៏មានគម្រោងដាក់ទណ្ឌកម្មលើធនាគារកណ្តាលរុស្ស៊ី និងដកអ្នកផ្តល់ប្រាក់កម្ចីរបស់ប្រទេសមួយចំនួនចេញពីប្រព័ន្ធទូទាត់សកល Swift បន្ថែមពីលើទណ្ឌកម្មសេដ្ឋកិច្ចផ្សេងទៀត។ សម្ព័ន្ធមិត្តផ្សេងទៀត រួមទាំងប្រទេសជប៉ុន កាណាដា អូស្ត្រាលី និងកូរ៉េខាងត្បូង ក៏បានអនុម័តទណ្ឌកម្មផងដែរ។
ទ្រព្យសម្បត្តិដែលកាន់កាប់ដោយបរទេសរបស់ប្រធានាធិបតី វ្ល៉ាឌីមៀរ ពូទីន នៅក្នុងសហភាពអឺរ៉ុប សហរដ្ឋអាមេរិក និងចក្រភពអង់គ្លេស ត្រូវបានបង្កក ប៉ុន្តែលោកក៏នៅតែត្រូវ បានគេអនុញ្ញាតឱ្យធ្វើដំណើរទៅកាន់ដែនសមត្ថកិច្ចទាំងនោះ។
បើយោងតាមអត្ថបទច្បាប់របស់សហភាពអឺរ៉ុបដែលបានចេញផ្សាយកាលពីថ្ងៃសុក្រ ហេតុផលនៃការបង្កកទ្រព្យសម្បត្តិនេះ គឺដោយសាររុស្ស៊ីបញ្ជាឱ្យកងកម្លាំងប្រដាប់អាវុធចូលទៅក្នុងតំបន់ Donetsk និង Luhansk ដើម្បីលុកលុយអ៊ុយក្រែនពេញលេញ។
រដ្ឋមន្ត្រីការបរទេសរុស្ស៊ី លោក Sergei Lavrov ក៏ត្រូវរងការបង្កក ទ្រព្យសកម្ម ដោយសហភាពអឺរ៉ុប ចក្រភពអង់គ្លេស និងសហរដ្ឋអាមេរិកផងដែរ សម្រាប់ការ «ទទួលខុសត្រូវ និងគាំទ្រយ៉ាងសកម្មសកម្មភាពដែលបំផ្លាញបូរណភាពទឹកដី អធិបតេយ្យភាព និងឯករាជភាពរបស់អ៊ុយក្រែន ក៏ដូចជាស្ថិរភាព និងសន្តិសុខនៅអ៊ុយក្រែន។ ទោះយ៉ាងណា លោកក៏នៅតែត្រូវបានគេអនុញ្ញាតឱ្យធ្វើដំណើរ។
លោក Sergei Shoigu រដ្ឋមន្ត្រីការពារជាតិរុស្ស៊ី និងលោក Aleksandr Bortnikov ប្រធានសេវាសន្តិសុខរុស្ស៊ី (FSB) ទាំងនៅក្នុងសហភាពអឺរ៉ុប និងសហរដ្ឋអាមេរិក ត្រូវបានគេហាមឃាត់ការធ្វើដំណើរ និងការបង្កកទ្រព្យសម្បត្តិផងដែរ។
លោក Valery Gerasimov ប្រធានកងកម្លាំងប្រដាប់អាវុធរុស្ស៊ី ពេលនេះស្ថិតនៅក្នុងបញ្ជីហាមឃាត់ការធ្វើដំណើររបស់ចក្រភពអង់គ្លេស និងសហរដ្ឋអាមេរិក និងបញ្ជីបង្កកទ្រព្យសម្បត្តិ។ គាត់ត្រូវបានសហភាពអឺរ៉ុបដាក់ក្នុងបញ្ជីខ្មៅរួចហើយក្នុងឆ្នាំ ២០១៤។
បន្ថែមពីនេះ សមាជិកសភាឌូម៉ារបស់រុស្ស៊ី ៣៥១ នាក់ ក៏ត្រូវបានសហភាពអឺរ៉ុបដាក់ទណ្ឌកម្មផងដែរ ដោយពួកគេត្រូវបានដាក់ចូលក្នុងបញ្ជីហាមឃាត់ការធ្វើដំណើរ និងបញ្ជីបង្កកទ្រព្យសម្បត្តិ ខណៈដែលចក្រភពអង់គ្លេស បានចាត់វិធានការនោះចំពោះតែសមាជិកនៃសភាឌូម៉ា និងក្រុមប្រឹក្សាសហព័ន្ធ ដែលបានបោះឆ្នោតទទួលស្គាល់ឯករាជភាពរបស់តំបន់ Donetsk និង Luhansk។ គួរបញ្ជាក់ផងដែរថា អាមេរិកក៏ធ្លាប់បានដាក់ទណ្ឌកម្មលើប្រមុខឌូម៉ាផងដែរ។
ទន្ទឹមនឹងនេះ សមាជិកក្រុមប្រឹក្សាសន្តិសុខរុស្ស៊ី ក៏ស្ថិតនៅក្នុងការហាមឃាត់ការធ្វើដំណើររបស់សហភាពអឺរ៉ុប និងសហរដ្ឋអាមេរិក និងបញ្ជីបង្កកទ្រព្យសម្បត្តិផងដែរ។
មិនត្រឹមតែប៉ុណ្ណោះ សហភាពអឺរ៉ុប និងសហរដ្ឋអាមេរិក ក៏បានដាក់មន្ត្រីយោធា រដ្ឋាភិបាល និងមន្ត្រីព្រំដែនមកពីប្រទេសបេឡារុសក្នុងបញ្ជីរឹបអូសទ្រព្យសម្បត្តិ និងហាមឃាត់ការធ្វើដំណើររបស់ពួកគេ សម្រាប់ការជួយរៀបចំផែនការ និងគាំទ្រយ៉ាងសកម្មចំពោះការវាយលុករបស់យោធារុស្ស៊ីប្រឆាំងនឹងអ៊ុយក្រែនផងដែរ។
លោក Kirill Shamalov ដែលជាមហាសេដ្ឋីវ័យក្មេងបំផុតរបស់រុស្ស៊ី និងធ្លាប់បានរៀបការជាមួយកូនស្រីរបស់លោក ពូទីន Katarina ត្រូវបានហាមឃាត់មិនឱ្យធ្វើដំណើរទៅចក្រភពអង់គ្លេស និងត្រូវបានអង់គ្លេសបង្កកទ្រព្យសម្បត្តិដែរ។
លោក Petr Fradkov ប្រធានក្រុមហ៊ុន Promsvyazbank និងជាកូនប្រុសរបស់អតីតប្រធានផ្នែកចារកម្មបរទេសរបស់រុស្ស៊ីក៏ស្ថិតក្នុងបញ្ជីរឹបអូសទ្រព្យសម្បត្តិរបស់ចក្រភពអង់គ្លេស រួមទាំងការហាមឃាត់ការធ្វើដំណើរដូចគ្នាដែរ។
លោក Denis Bortnikov អនុប្រធានក្រុមហ៊ុនផ្តល់ប្រាក់កម្ចីធំជាងគេទី២ របស់រុស្ស៊ីធនាគារ VTB និងជាកូនប្រុសរបស់ប្រធានសេវាសន្តិសុខសហព័ន្ធ (FSB) ត្រូវបានដាក់ក្នុងបញ្ជីខ្មៅនៅក្នុងចក្រភពអង់គ្លេស សហភាពអឺរ៉ុប និងសហរដ្ឋអាមេរិក។
លោក Yury Slyusar នាយកក្រុមហ៊ុន United Aircraft Corp និងលោកស្រី Elena Georgieva ប្រធានក្រុមប្រឹក្សាភិបាលនៃធនាគារ Novikombank ដែលជាក្រុមហ៊ុនការពារជាតិគ្រប់គ្រងដោយរដ្ឋត្រូវបានហាមឃាត់ពីចក្រភពអង់គ្លេស។
លោក Gennady Timchenko ដែលជាមហាសេដ្ឋីមានបំផុតទី៦ របស់រុស្ស៊ី គ្រប់គ្រងក្រុមហ៊ុនវិនិយោគឯកជន Volga Group លើវិស័យថាមពល ការដឹកជញ្ជូន និងសំណង់ ស្ថិតក្នុងបញ្ជីហាមឃាត់ការធ្វើដំណើរ និងបង្កកទ្រព្យសម្បត្តិរបស់ចក្រភពអង់គ្លេស។
លោក Boris Rotenberg ដែលជាមហាសេដ្ឋីជនជាតិរុស្ស៊ី និងជាសហម្ចាស់ក្រុមហ៊ុនសំណង់ដ៏ធំបំផុតសម្រាប់បំពង់បង្ហូរឧស្ម័ននៅក្នុងប្រទេសរុស្ស៊ី SMP Group ស្ថិតនៅក្រោមការដាក់ទណ្ឌកម្មរបស់ចក្រភពអង់គ្លេស ព្រមជាមួយនឹងក្មួយប្រុសរបស់លោក គឺលោក Igor Rotenberg ដែលជាម្ចាស់ភាគហ៊ុនភាគច្រើននៅក្នុងក្រុមហ៊ុន Gazprom Drilling។
អ្នកស្រី Violetta និងអ្នកស្រី Lyubov Prigozhina ដែលជាម្តាយ និងភរិយារបស់លោក Yevgeny Prigozhin ដែលសហភាពអឺរ៉ុបនិយាយថា នឹងទទួលខុសត្រូវចំពោះការបញ្ជូនទាហានស៊ីឈ្នួលWagner Group ទៅកាន់អ៊ុយក្រែន ត្រូវបានហាមឃាត់ពីសហភាពអឺរ៉ុបហើយនឹងត្រូវបង្កកទ្រព្យសម្បត្តិដូចគ្នា។
លោក Sergei Ivanov មន្ត្រីជាន់ខ្ពស់ និងអ្នកនយោបាយរុស្ស៊ីដែលធ្លាប់បម្រើការនៅក្នុងភ្នាក់ងាររដ្ឋ KGB និងកូនប្រុសរបស់គាត់គឺលោក Sergei នាយកប្រតិបត្តិនៃក្រុមហ៊ុនរុករករ៉ែពេជ្ររបស់រដ្ឋរុស្ស៊ី Alrosa និងសមាជិកក្រុមប្រឹក្សាភិបាលរបស់ Gazprombank អ្នកទាំង ២ ស្ថិតក្នុងបញ្ជីទណ្ឌកម្មរបស់សហរដ្ឋអាមេរិក។ ដោយឡែក លោក Nikolai Patrushev លេខាធិការក្រុមប្រឹក្សាសន្តិសុខរបស់រុស្ស៊ី កូនប្រុសរបស់គាត់គឺ Andrey អតីតនាយកប្រតិបត្តិក្រុមហ៊ុន Gazprom Neft ឧកញ៉ា Igor Sechin និងកូនប្រុសរបស់គាត់ Ivan ដែលជាអនុប្រធាននាយកដ្ឋាននៅ Rosneft ក៏ទទួលរងទណ្ឌកម្មដូចគ្នា។
នាយកប្រតិបត្តិជាន់ខ្ពស់នៅធនាគាររបស់រដ្ឋរួមមាន លោក Alexander Vedyakhin នៃធនាគារ Sberbank លោក Andrey Puchkov និង Yuriy Soloviev នៃធនាគារ VTB ក៏ដូចជាភរិយារបស់ លោក Soloviev គឺអ្នកស្រី Galina Olegovna Ulyutina ក៏ត្រូវបានបញ្ចូលទៅក្នុងបញ្ជីទណ្ឌកម្មរបស់សហរដ្ឋអាមេរិកផងដែរ។
លើពីនេះទៅទៀត ស្ថាប័នធនាគារ និងសេវាហរិញ្ញវត្ថុ ដែលត្រូវរងទណ្ឌកម្មដែរនោះ រួមមាន ធនាគារកណ្តាលរបស់រុស្ស៊ី ស្ថាប័នសម្រាប់ទូរគមនាគមន៍ហិរញ្ញវត្ថុអន្តរធនាគារពិភពលោក ឬហៅកាត់ Swift ធនាគារ Sberbank ធនាគារ VTB ធនាគារ Alfa-Bank និង Bank Otkritie ធនាគារ Rossyia និង Promsvyazbank ធនាគារ Sovcombank និង Novikombank និងដាក់កំហិតលើបំណុល និងភាគហ៊ុនថ្មីលើធនាគារកសិកម្មរុស្ស៊ី ធនាគារ Credit Bank of Moscow និង Gazprombank ធនាគារ Genbank និង Black Sea Bank ស្ថាប័នអភិវឌ្ឍន៍ហិរញ្ញវត្ថុដ៏សំខាន់ និងជាប្រភពចំណូលដ៏សំខាន់សម្រាប់រដ្ឋាភិបាលរុស្ស៊ី គឺ VEB.RF ធនាគារបេឡារុស ធនាគាររដ្ឋ ២ គឺ Belinvestbank និង Bank Dabrabyt និងក្រុមហ៊ុន ដែលមានមូលដ្ឋាននៅទីក្រុង Minsk ចំនួន ២ គឺក្រុមអចលនទ្រព្យ Belinvest-Engineering និងក្រុមហ៊ុនជួលហិរញ្ញវត្ថុ CJSC Belbizneslizing ផងដែរ។
ក្រៅពីនេះ មានក្រុមហ៊ុនអាកាសចរណ៍រុស្ស៊ី Aeroflot នឹងត្រូវហាមឃាត់ពីដែនអាកាសរបស់ចក្រភពអង់គ្លេស ក្រុមហ៊ុនការពារជាតិធំបំផុតរបស់រុស្ស៊ី Rostec ក្រុមហ៊ុនផលិតរថក្រោះធំបំផុតរបស់ពិភពលោក Uralvagonzavod ក្រុមហ៊ុនផ្គត់ផ្គង់ដ៏ធំនៃមីស៊ីលផ្លោងខ្យល់ និងសមុទ្រ គឺសាជីវកម្មមីស៊ីល Tactical ក្រុមហ៊ុនកាន់កាប់របស់រុស្ស៊ីដែល ផ្គត់ផ្គង់យន្តហោះយោធា និងរួមបញ្ចូលក្រុមហ៊ុនផលិតយន្តហោះរុស្ស៊ីធំៗទាំងអស់ United Aircraft Corporation ក្រុមហ៊ុនសាងសង់កប៉ាល់ធំជាងគេនៅប្រទេសរុស្ស៊ី ដែលបានសាងសង់នាវាចម្បាំងរុស្ស៊ីសំខាន់ៗ United Shipbuilding Corporation។
ដោយឡែក សម្រាប់សហភាពអឺរ៉ុបក្រុមហ៊ុនដែលមានមូលដ្ឋាននៅទីនោះ ត្រូវបានហាមឃាត់មិនឱ្យនាំចេញបច្ចេកវិទ្យាទៅកាន់ក្រុមហ៊ុនផលិតអាវុធរុស្ស៊ី JSC Kalashnikov ក្នុងចំណោមក្រុមហ៊ុនដទៃទៀត ក៏ដូចជាក្រុមហ៊ុនឱសថ អង្គភាពទំនាក់ទំនងយោធា និងកន្លែងផលិតកប៉ាល់។
ក្រុមហ៊ុននៅសហភាពអឺរ៉ុប ត្រូវបានហាមឃាត់មិនឱ្យធ្វើអាជីវកម្មជាមួយក្រុមហ៊ុនរដ្ឋដូចខាងក្រោមរួមមាន ក្រុមហ៊ុនផលិតសព្វាវុធ Almaz-Antey ក្រុមហ៊ុនផលិតរថយន្ត Kamaz ក្រុមហ៊ុន Novorossiysk Commercial Sea Port ក្រុមហ៊ុនការពារ Rostec ក្រុមហ៊ុនផ្លូវដែករុស្ស៊ី ក្រុមហ៊ុនផលិតនាវាមុជទឹកនុយក្លេអ៊ែរ Sevmash ក្រុមហ៊ុនដឹកជញ្ជូនអ៊ីដ្រូកាបូន Sovcomflot និងក្រុមហ៊ុនសាងសង់កប៉ាល់ធំបំផុតរបស់ប្រទេស United Shipbuilding Corporation។
ទីភ្នាក់ងារស្រាវជ្រាវអុីនធឺណិត ដែលជាក្រុមហ៊ុនគាំទ្រដោយវិមានក្រឹមឡាំង ដែលនៅពីក្រោយយុទ្ធនាការផ្សព្វផ្សាយព័ត៌មានមិនពិតពីអ៊ុយក្រែន និងផ្តល់ហិរញ្ញប្បទានដោយលោក Yevgeny Prigozhin ក៏ត្រូវបានហាមឃាត់ផងដែរ។
ចំណែកឯនៅសហរដ្ឋអាមេរិក ក៏បានកំណត់គោលដៅស្ថាប័នហិរញ្ញវត្ថុធំៗរបស់រុស្ស៊ីសហរដ្ឋអាមេរិកបានដាក់កម្រិតយ៉ាងខ្លាំងដល់ក្រុមហ៊ុនដែលសំខាន់ចំពោះសេដ្ឋកិច្ចរបស់ប្រទេសពីការរៃអង្គាសប្រាក់តាមរយៈទីផ្សារសហរដ្ឋអាមេរិកទាំងនេះ រួមបញ្ចូលទាំងក្រុមហ៊ុនឧស្ម័នធម្មជាតិដ៏ធំបំផុតរបស់ពិភពលោក Gazprom ក្រុមហ៊ុនបំពង់បង្ហូរប្រេង Transneft និងក្រុមហ៊ុនថាមពលធំបំផុតរបស់រុស្ស៊ី RusHydro។
ក្រុមហ៊ុនដឹកជញ្ជូនទំនិញតាមសមុទ្រ និងជាក្រុមហ៊ុនដឹកជញ្ជូនធំបំផុតរបស់រុស្ស៊ី Sovcomflot និងក្រុមហ៊ុនផ្លូវដែកដ៏ធំបំផុតមួយរបស់ពិភពលោក និងប្រតិបត្តិករទំនាក់ទំនងដ៏ធំបំផុតរបស់ប្រទេស Rostelecom និងក្រុមហ៊ុនរុករករ៉ែពេជ្រដ៏ធំបំផុតរបស់ពិភពលោក Alrosa ក៏ត្រូវហាមឃាត់ដែរ៕