កាលពីថ្ងៃចន្ទ ទី ២៨ កុម្ភៈ កងកម្លាំងរុស្ស៊ី បានធ្វើការបាញ់ផ្លោងគ្រាប់រ៉ុក្កែទៅលើតំបន់លំនៅឋាននៅក្រុងកាកៀវនៅភាគខាងកើតប្រទេសអ៊ុយក្រែន ហើយសំឡេងនៃការផ្ទុះធំៗជាច្រើនត្រូវបានគេឮនៅរដ្ឋធានីកៀវ ខណៈពេលដែលការចរចាដំបូងរវាងភាគីទាំង ២ នៅព្រំដែនបេឡារុសត្រូវបានបញ្ចប់។
អភិបាលក្រុងកាកៀវ លោក អ៊ីហូរ តេរេកូវ បាននិយាយថា ការវាយប្រហារកាលពីថ្ងៃចន្ទ បានសម្លាប់មនុស្ស ៩ នាក់ ក្នុងនោះមានកុមារ ៣ នាក់ ហើយធ្វើឱ្យមនុស្សយ៉ាងហោចណាស់ ៣៧ នាក់រងរបួស។ រុស្សីនៅមិនទាន់ធ្វើការអត្ថាធិប្បាយលើការលើកឡើងនេះទេ។
វីដេអូនៅលើបណ្ដាញសង្គមបានបង្ហាញថា គ្រាប់រ៉ុក្កែតជាច្រើនគ្រាប់ផ្ទុះជិតៗគ្នានៅក្នុងតំបន់លំនៅឋាននៃសង្កាត់សាល់ធីវីកានៅផ្នែកភាគខាងជើងនៃក្រុងកាកៀវ។
ខណៈពេលដែលការចរចារវាងភាគីទាំង ២ នៅព្រំដែនបេឡារុសត្រូវបានបញ្ចប់នៅល្ងាចថ្ងៃចន្ទ មានការរាយការណ៍អំពី សំឡេងនៃការផ្ទុះធំៗជាច្រើននៅក្រុងកៀវ រួមជាមួយការបន្លឺសំឡេងស៊ីរ៉ែន ។
លោក មីខាអ៊ីឡូ ប៉ូដូលីយ៉ាក ទីប្រឹក្សារបស់ប្រធានាធិបតីអ៊ុយក្រែន បាននិយាយថាភាគីទាំង ២ បានពិភាក្សាអំពី «បទឈប់បាញ់ និងការបញ្ចប់សកម្មភាពប្រយុទ្ធនៅលើទឹកដីអ៊ុយក្រែន»។ ដោយមិនបានបញ្ជាក់អំពីព័ត៌មានលម្អិត លោក ប៉ូដូលីយ៉ាក បាននិយាយថាភាគីទាំង ២ បានត្រឡប់ទៅរដ្ឋធានីរៀងៗខ្លួន ដើម្បីពិគ្រោះយោបល់ថាតើគួរអនុវត្ត «ការសម្រេច» មួយចំនួនឬទេ? លោកនិយាយថា ភាគីទាំងអស់បានពិភាក្សាអំពីការចរចា១ជុំទៀតដើម្បីបន្តអភិវឌ្ឍការសម្រេចទាំងនេះ។
យោធារុស្ស៊ី គឺធំជាង និងទំនើបជាងយោធាអ៊ុយក្រែន ប៉ុន្តែប្រឈមនឹងការលំបាកជាច្រើនដោយការតដៃមិនព្រមចុះចាញ់ដោយកងកម្លាំងអ៊ុយក្រែន។ បណ្ដាប្រទេសលោកខាងលិចបានបន្តការផ្គត់ផ្គង់អាវុធទៅឱ្យអ៊ុយក្រែនដើម្បីជួយទប់ទល់នឹងការវាយប្រហាររបស់រុស្ស៊ី៕