.jpg)
ប្រធានាធិបតីបេឡារុស លោក អាឡិចសាន់ឌ័រ លូកាសិនកូ។ រូបថត AFP
កាលពីថ្ងៃអង្គារ ទី ១ មីនា ប្រធានាធិបតីបេឡារុស លោក អាឡិចសាន់ឌ័រ លូកាសិនកូ ដែលជាសម្ព័ន្ធមិត្តដ៏ជិតស្និទ្ធរបស់រុស្ស៊ី បានធ្វើបទបង្ហាញអំពីផែនទីសមរភូមិនៅអ៊ុយក្រែនទៅកាន់ក្រុមប្រឹក្សាសន្តិសុខរបស់លោក ដោយនៅលើផែនទីនោះមានតម្រុយអំពីផែនការធ្វើការឈ្លានពានចូលប្រទេសម៉ុលដាវី ដែលជាអតីតសមាជិកសហភាពសូវៀត និងជាប្រទេសជាប់ព្រំដែនជាមួយអ៊ុយក្រែន។
ផែនទីនេះបានបង្ហាញពីផែនការចលនាទ័ពរុស្ស៊ី និងគោលដៅវាយប្រហារក្នុងប្រទេសអ៊ុយក្រែន ប៉ុន្តែក៏បង្ហាញអំពីចលនាទ័ពរុស្ស៊ី និងគោលដៅនៅក្នុងតំបន់ត្រង់នីស្ទ្រា ដែលជាតំបន់ផ្ដាច់ខ្លួនពីប្រទេសម៉ុលដាវី។
រហូតមកដល់ពេលនេះ ផែនការចលនាទ័ពរុស្សីមួយចំនួននៅលើផែនទីខាងលើ គឺត្រូវបានអនុវត្ត ខណៈផែនការខ្លះនៅមិនទាន់អនុវត្តនៅឡើយ ដែលរួមទាំងផែនការចលនាទ័ពចូលទឹកដីរបស់ប្រទេសម៉ុលដាវី។
ប្រទេសបេឡារុស បានអនុញ្ញាតឱ្យកងកម្លាំងរុស្សីប្រើប្រាស់ទឹកដីរបស់ខ្លួន ដើម្បីធ្វើការវាយប្រហារក្រុងកៀវតាមផ្លូវជិតបំផុត បន្ទាប់ពីធ្វើការអះអាងថា កងកម្លាំងរុស្ស៊ីនៅក្នុងទឹកដីរបស់ខ្លួន គឺគ្រាន់តែមកធ្វើសមយុទ្ធប៉ុណ្ណោះ។ មានការរាយការណ៍ថា នៅសប្ដាហ៍នេះ កងទ័ពបេឡារុសកំពុងត្រៀមខ្លួនឆ្លងចូលប្រទេសអ៊ុយក្រែន ដើម្បីគាំទ្រការឈ្លានពានរបស់ប្រទេសរុស្សុី។
បើតាមការរាយការណ៍របស់ព័ត៌មានរដ្ឋបេឡារុស លោក លូកាសិនកូ បាននិយាយថា បេឡារុសនៅមិនទាន់បញ្ជូនទ័ពចូលអ៊ុយក្រែននៅឡើយទេ ប៉ុន្តែអាចចល័តក្នុងរយៈពេល ២ ទៅ ៣ ថ្ងៃប្រសិនបើចាំបាច់។
កាលពីថ្ងៃចន្ទ សហភាពអឺរ៉ុបបានប្រកាសរៀបចំដាក់ទណ្ឌកម្មបន្ថែមទៀតលើបេឡារុស ជុំវិញការពាក់ព័ន្ធនឹងការលុកលុយរបស់រុស្សុី៕
វីដេអូ៖
