ក្នុងការថ្លែងសុន្ទរកថាទៅកាន់សភាអាល្លឺម៉ង់ លោកអធិការបតី Olaf Scholz បានធ្វើការប្រកាសជាប្រវត្តិសាស្ត្រមួយថា លោកនឹងបង្កើនការចំណាយចំនួន ១០០ ពាន់លានអឺរ៉ូ (ឬស្មើនឹង១១៣ ពាន់លានដុល្លារ) ភ្លាមៗ ដើម្បីពង្រឹងកងកម្លាំងប្រដាប់អាវុធរបស់ប្រទេស រួមជាមួយការចំណាយបន្ថែមទៀត ដើម្បីអភិវឌ្ឍលើវិស័យការពារជាតិក្នុងរយៈពេលប៉ុន្មានឆ្នាំខាងមុខនេះ ក្នុងការផ្លាស់ប្ដូរជំហរដ៏ធំមួយ បន្ទាប់ពីរុស្ស៊ីវាយប្រហារអុ៊យក្រែន។
លោក Scholz បាននិយាយថា បន្ទាន់នៃវិបត្តិអ៊ុយក្រែន បានបង្ខំឱ្យអាល្លឺម៉ង់សម្រេច ធ្វើការវិនិយោគលើវិស័យយោធា បែបនេះដោយប្រាប់សម័យប្រជុំអាសន្ននៃសភា Bundestag ថា៖ «វាច្បាស់ណាស់ថា យើងត្រូវវិនិយោគបន្ថែមទៀតទៅលើសន្តិសុខនៃប្រទេសរបស់យើង ដើម្បីការពារសេរីភាព និងលទ្ធិប្រជាធិបតេយ្យយើង»។
ជំហាននេះ បានធ្វើឡើងបន្ទាប់ពីរដ្ឋាភិបាល បានធ្វើសេចក្ដីប្រកាសដ៏គួរឱ្យភ្ញាក់ផ្អើលកាលពីថ្ងៃសៅរ៍ថា ខ្លួននឹងបញ្ជូនអាវុធទៅកាន់ប្រទេសអ៊ុយក្រែន រួមទាំងមីស៊ីលប្រឆាំងរថក្រោះ Javelin ចំនួន ១ ០០០ ដើម កាំជ្រួចប្រឆាំងយន្តហោះ Stinger ចំនួន ៥០០ ដើម និងប្រេងឥន្ធនៈរាប់ពាន់ហ្គាឡុង។
ការសម្រេចចិត្តជាប្រវត្តិសាស្ត្រនេះ គឺបង្ហាញពីការផ្លាស់ប្ដូរជំហរដ៏ធំមួយសម្រាប់ប្រទេសអាល្លឺម៉ង់ ចេញពីការសន្យាក្រោយសង្គ្រាមលោកលើកទី២ របស់ប្រទេសថា ខ្លួននឹងមិននាំចេញអាវុធទៅកាន់តំបន់មានជម្លោះ។
ព្រឹត្តិការណ៍កាលពីសប្ដាហ៍មុន បានធ្វើឱ្យប្រទេសនានាមានការភ្ញាក់ផ្អើលទាំងប្រទេសមានសន្តិភាពនិយម ក៏ដូចជាប្រទេសដែលមានទំនាក់ទំនងយ៉ាងជិតស្និទ្ធជាមួយរុស្ស៊ី។ លោក Viktor Orban នាយករដ្ឋមន្ត្រីស្ដាំនិយមរបស់ប្រទេសហុងគ្រី ដែលគាំទ្រប្រទេសរុស្ស៊ី ហើយរិះគន់ទណ្ឌកម្មប្រឆាំងនឹងប្រទេសនេះកាលពីប៉ុន្មានសប្ដាហ៍មុន ឥឡូវបានផ្លាស់ប្ដូរជំហររបស់គាត់។ ចំណែកជប៉ុនដែលមានការស្ទាក់ស្ទើរក្នុងការដាក់ទណ្ឌកម្មលើរុស្ស៊ីក្នុងឆ្នាំ ២០១៤ បានថ្កោលទោសយ៉ាងខ្លាំងចំពោះការលុកលុយកាលពីសប្ដាហ៍មុន ហើយបានសម្រេចដាក់ទណ្ឌកម្ម។
នៅប្រទេសអាល្លឺម៉ង់ ការថ្លែងសុន្ទរកថារបស់អធិការបតី បានបង្ហាញឱ្យឃើញថា ប្រទេសនេះបោះបង់ចោលការព្យាយាមរក្សាតុល្យភាពរវាងសម្ព័ន្ធភាពលោកខាងលិចរបស់ខ្លួន និងទំនាក់ទំនងសេដ្ឋកិច្ចដ៏រឹងមាំជាមួយរុស្ស៊ីអស់រយៈពេល ៣០ ឆ្នាំកន្លងមក។
ចាប់ផ្ដើមជាមួយនឹងការសម្រេចចិត្តកាលពីថ្ងៃអង្គារសប្ដាហ៍មុន ដើម្បីលុបចោលបំពង់បង្ហូរឧស្ម័នធម្មជាតិ Nord Stream ២ ជំហានរបស់រដ្ឋាភិបាលអាល្លឺម៉ង់ចាប់តាំងពីពេលនោះមកត្រូវបានជំរុញ ដោយភាពភ័យរន្ធត់នៃការវាយប្រហាររបស់រុស្ស៊ីទៅលើពលរដ្ឋនៃប្រទេសអឺរ៉ុប។
លោកស្រី Daniela Schwarzer នាយិកាប្រតិបត្តិអង្គការ Open Society Foundations ប្រចាំអឺរ៉ុប និងអឺរ៉ាស៊ីបាននិយាយអំពីសុន្ទរកថារបស់លោក Scholz ថា៖ «គាត់ទើបតែដាក់ទីតាំងប្រទេសអាល្លឺម៉ង់ ឡើងវិញជាយុទ្ធសាស្ត្រ»។
ប្រទេសអាល្លឺម៉ង់ និងជាពិសេសគណបក្សសង្គមប្រជាធិបតេយ្យរបស់លោក Scholz បានចៀសវាងជាយូរយារមកហើយនូវវិធីសាស្ត្ររួមមួយ ដើម្បីទប់ទល់នឹងប្រទេសរុស្ស៊ី ដោយលើកឡើងអំពីគ្រោះថ្នាក់នៃការកាត់ផ្ដាច់ក្រុងម៉ូស្គូពីទីផ្សារអឺរ៉ុប។ ប៉ុន្តែរូបភាពរបស់ជនជាតិអ៊ុយក្រែនដែលរត់គេចពីការលុកលុយបានរំឭកនូវការចងចាំរបស់ជនជាតិអាល្លឺម៉ង់វ័យចំណាស់អំពីការភៀសខ្លួនពីកងទ័ពក្រហមនៃសហភាពសូវៀតក្នុងអំឡុងសង្គ្រាមលោកលើកទី២ ហើយបានបង្កឱ្យមានការខឹងសម្បាក្នុងចំណោមមនុស្សជំនាន់ក្រោយ ដែលបានសន្យារក្សាសន្តិភាព និងការបង្រួបបង្រួមអឺរ៉ុប។
កាលពីថ្ងៃអាទិត្យ ជនជាតិអាល្លឺម៉ង់រាប់សែននាក់បានដើរកណ្ដាលទីក្រុងប៊ែរឡាំង ក្នុងការបង្ហាញការគាំទ្រដល់អ៊ុយក្រែនដោយលើកសញ្ញា ដែលសរសេរថា «បញ្ឈប់ពូទីន» និង «គ្មានសង្គ្រាម»។
ជាការបង្ហាញការប្តេជ្ញាចិត្តរបស់អាល្លឺម៉ង់ចំពោះការរួបរួមអឺរ៉ុបទំនាក់ទំនងវប្បធម៌ និងសេដ្ឋកិច្ចដ៏ស៊ីជម្រៅ លោក Scholz បានស្ដីបន្ទោសលោក ពូទីន ចំពោះការឈ្លានពានរបស់រុស្ស៊ីមិនមែនប្រជាជនរុស្ស៊ីនោះទេ។ ប៉ុន្តែលោកបានទុកការសង្ស័យថា អាល្លឺម៉ង់នឹងលែងអង្គុយពឹងលើប្រទេសដទៃទៀតក្នុងការផ្ដល់ឧស្ម័នធម្មជាតិ ឬសន្តិសុខយោធារបស់ខ្លួនទៀតហើយ។
ការបដិសេធយ៉ាងម៉ឺងម៉ាត់របស់ប្រទេសនេះចំពោះអតីតកាលរបស់ណាស៊ីដ៏គួរឱ្យរន្ធត់របស់ខ្លួនមានន័យថា ប្រទេសនេះបានប្រកាន់យកនយោបាយការទូត និងការរារាំងបរទេសជាយូរមកហើយ។ប៉ុន្តែចាប់តាំងពីការឈ្លានពានរបស់រុស្ស៊ីមកសម្ព័ន្ធមិត្តជាច្រើនរបស់អាល្លឺម៉ង់ បានចោទប្រកាន់ថា ពួកគេមិនបានពង្រឹងខ្លួន និងធានាសន្តិភាពនៅក្នុងអឺរ៉ុប បានគ្រប់គ្រាន់នោះទេ។
ទោះយ៉ាងណា លោក Scholz បាននិយាយថា លោកបានប្ដេជ្ញាបន្តកិច្ចខិតខំប្រឹងប្រែងការទូតដោយខិតខំពង្រឹងឱ្យកាន់តែខ្លាំងតាមតែអាចធ្វើទៅបាន ដោយបានបន្ថែមថា អាល្លឺម៉ង់នឹងមិនបដិសេធមិនធ្វើកិច្ចចរចាជាមួយរុស្ស៊ីនោះទេ។ លោកបានបន្តថា៖ «ទោះបីស្ថិតក្នុងស្ថានភាពធ្ងន់ធ្ងរនេះវាជាការងារផ្នែកការទូត ដើម្បីរក្សាបណ្ដាញ ឬទំនាក់ទំនងបើកចំហ»៕