សហរដ្ឋអាមេរិក និងរដ្ឋជាសមាជិកផ្សេងទៀតនៃទីភ្នាក់ងារថាមពលអន្តរជាតិ (IEA) កាលពីថ្ងៃអង្គារបានព្រមព្រៀងគ្នាក្នុងការបញ្ចេញស្តុកប្រេងចំនួន ៦០ លានបារ៉ែល ដើម្បីទប់ទល់នឹងការរំខានការផ្គត់ផ្គង់ប្រេង បន្ទាប់ពីការលុកលុយរបស់រុស្ស៊ីលើអ៊ុយក្រែន។
វិស័យប្រេងរបស់រុស្ស៊ី កំពុងស្ថិតក្នុងភាពច្របូកច្របល់ បន្ទាប់ពីប្រទេសជាច្រើនបានដាក់ទណ្ឌកម្មលើក្រុមហ៊ុនធនាគារ និងបុគ្គលរបស់រុស្ស៊ីជាច្រើន។ វិស័យថាមពលរុស្ស៊ីត្រូវបានលើកលែងពីទណ្ឌកម្ម ប៉ុន្តែអ្នកទិញនៅតែព្រួយបារម្ភអំពីការបំពានទណ្ឌកម្មហើយកំពុងគេចចេញពីការទិញប្រេងរុស្ស៊ី។
ដំណឹងចេញពី IEA មិនបានធ្វើអ្វី ដើម្បីបញ្ឈប់ការឡើងថ្លៃនៅលើទីផ្សារប្រេងទេ ខណៈដែលវិនិយោគិននិងអ្នកជួញដូរបានបង្កើនតម្លៃ បន្ទាប់ពីមានការរំខានដល់ការផ្គត់ផ្គង់។ ប្រេងឆៅ Brent បានកើនឡើង ៧ ដុល្លារ ក្នុង ១ បារ៉ែល កើនមកតម្លៃជាង ១០៥ ដុល្លារ ដែលជាតម្លៃខ្ពស់បំផុតចាប់តាំងពីឆ្នាំ ២០១៤។
អ្នកនាំពាក្យសេតវិមានលោកស្រី Jen Psaki បាននិយាយនៅក្នុងសេចក្ដីថ្លែងការណ៍បន្ទាប់ពីកិច្ចប្រជុំ IEA ថា៖ «យើងប្រើគ្រប់ឧបករណ៍ដែលមានសម្រាប់ទប់ទល់នឹងការរំខានដល់ការផ្គត់ផ្គង់ថាមពលសកលដែលជាលទ្ធផលនៃសកម្មភាពរបស់ប្រធានាធិបតី Putin»។
នាយកប្រតិបត្តិ IEA លោក Fatih Birol បាននិយាយថា៖ «ស្ថានភាពបច្ចុប្បន្ននៅក្នុងទីផ្សារថាមពល គឺធ្ងន់ធ្ងរណាស់ហើយទាមទារការយកចិត្តទុកដាក់ពេញលេញរបស់យើង»។
ទីភ្នាក់ងារ IEA បាននិយាយថា ប្រេង ៦០ លានបារ៉ែល គឺស្មើនឹង ៤ ភាគរយនៃស្តុកបម្រុងប្រេង ១,៥ ពាន់លានបារ៉ែលរបស់សមាជិក IEA ហើយនឹងបញ្ចេញ ២ លានបារ៉ែល ក្នុង ១ ថ្ងៃ សម្រាប់រយៈពេល ៣០ ថ្ងៃ៕