រុស្ស៊ី បានបង្កើនការបាញ់ប្រហារលើទីក្រុងធំៗរបស់អ៊ុយក្រែន ដោយរួមមានការបាញ់មីស៊ីលចូលតំបន់លំនៅឋាន ខណៈពេលដែលកងកម្លាំងរុស្សីប្រើប្រាស់យុទ្ធសាស្ត្រសាហាវជាងមុនដើម្បីស្ដារសន្ទុះនៅថ្ងៃទី ៦ នៃការឈ្លានពានចូលប្រទេសជិតខាង។ មីស៊ីល ១ គ្រាប់ បានបាញ់ចំអង់តែនទូរទស្សន៍មួយនៅក្រុងកៀវ ធ្វើឱ្យការកាត់ផ្ដាច់ការផ្សព្វផ្សាយជាបណ្ដោះអាសន្ន។
កាលពីថ្ងៃអង្គារ មានការវាយប្រហារដោយគ្រាប់រ៉ុក្កែតទៅលើអគាររដ្ឋបាលក្រុងកាកៀវ ដែលបានធ្វើឱ្យអគារនេះឆាបឆេះយ៉ាងខ្លាំង។ វីដេអូនៅលើបណ្ដាញសង្គមបានបង្ហាញការបែកបាក់យ៉ាងខ្លាំងនៃអគារនេះ និងទីលានខាងមុខនោះ ខណៈអគារនៅជិតនោះជាច្រើនក៏បានរងការខូចខាតផងដែរ។
ក្នុងវីដេអូមួយប្រធានាធិបតីអ៊ុយក្រែនលោកវ៉ុឡូឌីមៀរ ហ្សេលេនស្គី បាននិយាយថា ការវាយប្រហារនេះគឺ «ភេរវកម្មដោយមិនលាក់»។ «បន្ទាប់នេះ រុស្ស៊ី គឺជារដ្ឋភេរវកម្ម» លោកនិយាយបែបនេះហើយបន្តទៀតថា៖ «គ្មាននរណាម្នាក់នឹងអត់ទោសទេ។ គ្មាននរណាម្នាក់នឹងបំភ្លេចឡើយ»។
លោកហ្សេលេនស្គីបានចោទប្រកាន់រុស្ស៊ីថា បានរំលោភច្បាប់សង្គ្រាមដោយធ្វើការវាយប្រហារមិនរើសមុខ ហើយលោក បានបន្ថែមទៀតថារហូតមកដល់ពេលនេះអ៊ុយក្រែនបានរងការវាយប្រហារចំនួន ៥៦ ករណី ដោយរុស្ស៊ី បានបាញ់មីស៊ីលចំនួន ១១៣ គ្រាប់។
ក្រសួងការពារជាតិអាមេរិក បាននិយាយថាជាង ៨០ ភាគរយនៃកងកម្លាំងរុស្ស៊ី ដែលប្រមូលផ្ដុំព្រំដែនអ៊ុយក្រែន បានឆ្លងចូលដែនដីអ៊ុយក្រែនរួចទៅហើយ ប៉ុន្តែបញ្ហាខ្សែសង្វាក់ផ្គត់ផ្គង់ទ័ពជួរមុខ និងការតដៃយ៉ាងខ្លាំងពីកងកម្លាំងអ៊ុយក្រែន បានធ្វើឱ្យពួកគេបាត់បង់សម្ទុះនៃការវាយប្រហារ។
យោធាអង់គ្លេសបាននិយាយថា ក្បួនរថពាសដែកដ៏ធំមួយបានធ្វើដំណើរដល់ចំណុច ៣០ គីឡូម៉ែត្រពីក្រុងកៀវ ធ្វើឱ្យក្រុងនេះអាចរងការវាយប្រហារពីប្រព័ន្ធរ៉ុក្កែត BM-21៕