បណ្ដាប្រទេសក្នុងសម្ព័ន្ធភាពយោធាណាតូរួមមានហូឡង់ អេស្តូនី សាធារណរដ្ឋឆែក ប៉ូឡូញ និងសូម្បីតែប្រទេសមិនមែនជាសមាជិកដូចជាស៊ុយអែត ហ្វាំងឡង់ កំពុងសម្រុកបញ្ជូនអាវុធចូលប្រទេសអ៊ុយក្រែន ខណៈពេលដែលសកម្មភាពបែបនេះអាចប្រឈមនឹងការប្រថុយនឹងការបង្កជម្លោះជាមួយរុស្ស៊ី។
ប្រទេសហូឡង់ កំពុងបញ្ជូនគ្រាប់រ៉ុក្កែតសម្រាប់ការពារដែនអាកាស រីឯអេស្តូនី កំពុងបញ្ជូនប្រព័ន្ធមីស៊ីលប្រឆាំងរថក្រោះ Javelin ខណៈប៉ូឡូញនិងឡេតូនី កំពុងបញ្ជូនមីស៊ីលបាញ់យន្តហោះ Stinger ហើយឆែកកំពុងបញ្ជូនកាំភ្លើងយន្ត កាំភ្លើងវែង កាំភ្លើងខ្លីនិងគ្រាប់រំសេវជាដើម។
រីឯប្រទេសមិនមែនសមាជិកស៊ុយអែត និងហ្វាំងឡង់ ក៏កំពុងបញ្ជូនអាវុធទៅដូចគេដែរ ហើយអាល្លឺម៉ង់ដែលបន្ទាប់សង្គ្រាមលោកលើកទី២ បានប្ដេជ្ញាមិនបញ្ជូនទៅតំបន់មានជម្លោះ ក៏កំពុងបញ្ជូនមីស៊ីលបាញ់យន្តហោះធុន Stinger ក៏ដូចជាមីស៊ីលប្រភេទផ្សេងទៀតដែរ។
សរុបមកប្រទេសប្រហែល ២០ ដែលជាសមាជិកភាគច្រើននៃអង្គការណាតូឬសហភាពអឺរ៉ុប ឬទាំង២គឺកំពុងរៀបចំដឹកជញ្ជូនអាវុធចូលទៅក្នុងអ៊ុយក្រែន ដើម្បីជួយប្រទេសនេះក្នុងការប្រយុទ្ធប្រឆាំងនឹងការឈ្លានពានរបស់រុស្ស៊ីឬការទប់ទល់នឹងការកាន់កាប់របស់រុស្ស៊ី ប្រសិនសង្គ្រាមនេះ ដើរដល់ដំណាក់កាលនោះ។
ក្នុងពេលជាមួយគ្នានោះអង្គការណាតូ កំពុងចល័តឧបករណ៍យោធានិងទាហានចំនួន ២២ ០០០ នាក់បន្ថែមទៀតចូលទៅក្នុងរដ្ឋជាសមាជិកដែលមានព្រំប្រទល់ជាប់នឹងប្រទេសរុស្ស៊ី និងបេឡារុស្ស ដើម្បីការពារកុំឱ្យមានការហៀរហូរពីសង្គ្រាមនៅប្រទេសអ៊ុយក្រែន។
ការឈ្លានពានរបស់រុស្ស៊ីលើអ៊ុយក្រែន បានធ្វើឱ្យបណ្ដាប្រទេសអឺរ៉ុបរួមគ្នាចិត្តប្រមូលផ្ដុំមកផ្ដោតលើការគំរាមកំហែងកាន់តែធំចំពោះសន្តិសុខអឺរ៉ុបដែលបង្ហាញ ដោយរុស្ស៊ីរបស់លោកប្រធានាធិបតី វ្ល៉ាឌីមៀ ពូទីន។
លោកស្រី Ursula von der Leyen ប្រធានគណៈកម្មការអឺរ៉ុបបានអះអាងនៅក្នុងសុន្ទរកថា ទៅកាន់សភាអឺរ៉ុបកាលពីថ្ងៃអង្គារថា៖ «សន្តិសុខនិងការការពារអឺរ៉ុបបានវិវឌ្ឍន៍កាន់តែច្រើនក្នុងរយៈពេល ៥ ថ្ងៃចុងក្រោយនេះនៅក្នុងរយៈពេលពីរទសវត្សរ៍ចុងក្រោយ»។
ទីក្រុងប្រ៊ុចសែល បាន «អឺរ៉ុបកម្ម ឬ Europeanize» ទៅលើកិច្ចខិតខំប្រឹងប្រែងរបស់រដ្ឋជាសមាជិកនីមួយៗក្នុងការផ្ដល់ជំនួយទៅកាន់អ៊ុយក្រែនជានឹងអាវុធ និងប្រាក់ហើយបានធ្វើឱ្យសហភាពអឺរ៉ុបក្លាយជាតួអង្គយោធាដ៏សំខាន់មួយ។
ប៉ុន្តែសំណួរថា តើសព្វាវុធអឺរ៉ុបនឹងបន្តដឹកជញ្ជូនទៅដល់សមរភូមិអ៊ុយក្រែនទាន់ពេលវេលានោះ គឺស្ថិតក្នុងភាពមិនប្រាកដប្រជានៅឡើយ។ ទោះបីជាយ៉ាងនេះក៏ដោយទីក្រុងប្រ៊ុចសែល មានមោទនភាពចំពោះការខិតខំប្រឹងប្រែងរបស់ខ្លួន។ វា គឺជាយុទ្ធសាស្ត្រដែលប្រថុយនឹងការជំរុញឱ្យមានសង្រ្គាមកាន់តែទូលំទូលាយ និងការសងសឹក ដែលអាចកើតមានពីលោក ពូទីន។ ការប្រញាប់ប្រញាល់បញ្ជូនជំនួយយោធាដ៍សន្ធឹកសន្ធាប់ចូលទៅក្នុងប្រទេសអ៊ុយក្រែន ពីតាមរយៈប្រទេសប៉ូឡូញ ដែលជាសមាជិកនៃអង្គការណាតូ គឺមានគោលបំណងសម្លាប់ទាហានរុស្ស៊ី។
លោក ពូទីន មើលឃើញរួចហើយថា អង្គការណាតូ បានប្ដេជ្ញាគំរាមកំហែងឬបំផ្លាញរុស្ស៊ីតាមរយៈការគាំទ្ររបស់ខ្លួនចំពោះអ៊ុយក្រែនដូចដែលលោក បាននិយាយម្ដងហើយម្ដងទៀតនៅក្នុងសុន្ទរកថានាពេលថ្មីៗនេះ ដោយលោកក៏បានលើកឡើងពីការព្រមាននុយក្លេអ៊ែររបស់កងកម្លាំងផ្ទាល់ខ្លួន ដើម្បីព្រមានអឺរ៉ុប និងសហរដ្ឋអាមេរិកឱ្យចៀសវាងកុំឱ្យមានការជ្រៀតជ្រែក។
សង្គ្រាមពិភពលោកបានចាប់ផ្ដើមឡើងដោយសារជម្លោះតូចតាច ហើយភាពជិតស្និទ្ធនៃសង្រ្គាមជាមួយសម្ព័ន្ធមិត្តណាតូនាំមកនូវគ្រោះថ្នាក់ ដែលវាអាចទាក់ទាញភាគីផ្សេងទៀតតាមរបៀបដែលមិននឹកស្មានដល់។
លោក Jens Stoltenberg អគ្គលេខាធិការអង្គការណាតូបានបញ្ជាក់ជំហររបស់លោកម្ដងទៀតកាលពីថ្ងៃអង្គារ ខណៈដែលលោកបានទៅទស្សនាមូលដ្ឋានទ័ពអាកាសប៉ូឡូញ។ លោកបាននិយាយថា៖ «សង្គ្រាមរបស់ ពូទីន ប៉ះពាល់ដល់យើងទាំងអស់គ្នាហើយសម្ព័ន្ធមិត្តណាតូនឹងតែងតែឈរជាមួយគ្នា ដើម្បីការពារគ្នាទៅវិញទៅមក។ សេចក្ដីប្ដេជ្ញាចិត្តរបស់យើងចំពោះមាត្រា ៥ ចែងអំពីកិច្ចការពារសមូហភាពរបស់យើង គឺរឹងមាំដូចដែក»។
លោក Stoltenberg បាននិយាយកាលពីសប្ដាហ៍មុនថា៖ «វាត្រូវតែគ្មានកន្លែងសម្រាប់ការគណនាខុសឬការយល់ច្រឡំឡើយ។ យើងនឹងធ្វើអ្វីៗគ្រប់យ៉ាងដើម្បីការពារទឹកដីណាតូគ្រប់សង់ទីម៉ែត្រដែលមាន»។
ប៉ុន្តែសម្រាប់ពេលនេះការប្រយុទ្ធ គឺនៅអ៊ុយក្រែនហើយ ខណៈពេលដែលណាតូ និងសហភាពអឺរ៉ុបបានបញ្ជាក់យ៉ាងច្បាស់ថា ទាហានរបស់ពួកគេនឹងមិនប្រយុទ្ធជាមួយរុស្ស៊ីនៅទីនោះក៏ដោយ ក៏ពួកគេបានចូលរួមយ៉ាងសកម្មក្នុងការជួយអ៊ុយក្រែន ដើម្បីការពារខ្លួន។
សព្វាវុធរបស់លោកខាងលិចត្រូវបានបញ្ជូនចូលប្រទេសអ៊ុយក្រែន ក្នុងបរិមាណដ៏ធំ ប៉ុន្តែមិនបានបង្ហាញឱ្យដឹងរយៈពេលប៉ុន្មានថ្ងៃចុងក្រោយនេះអំពីកម្រិតនៃការដាក់ពង្រាយក្នុងល្បឿនប៉ុនណា និងមានឥទ្ធិពលប៉ុនណានោះទេ។
ខណៈពេលដែលប្រទេសចំនួន ២១ ក្នុងចំណោមប្រទេសទាំង ២៧ នៃសហភាពអឺរ៉ុបក៏ជាសមាជិករបស់អង្គការណាតូផងដែរ ជាកិច្ចខិតខំប្រឹងប្រែងដើម្បីផ្លាស់ទីឧបករណ៍ និងសព្វាវុធយ៉ាងលឿនចូលទៅក្នុងប្រទេសអ៊ុយក្រែនពីប្រទេសប៉ូឡូញ កំពុងត្រូវបានអនុវត្តដោយប្រទេសជាសមាជិកនីមួយៗហើយមិនមែនជាបេសកកម្មផ្លូវការរបស់ណាតូឬសហភាពអឺរ៉ុបនោះទេ។
បារាំងនិយាយថា បណ្ដាសេនាធិការយោធារបស់សហភាពអឺរ៉ុប កំពុងព្យាយាមសម្របសម្រួលការជំរុញនេះ។ចក្រភពអង់គ្លេស និងសហរដ្ឋអាមេរិក កំពុងធ្វើប្រតិបត្តិការដូចគ្នានេះដែរដោយបង្កើតនូវអ្វីដែលហៅថា មជ្ឈមណ្ឌលសម្របសម្រួលម្ចាស់ជំនួយអន្តរជាតិ។
យោងតាមអង្គការណាតូបែលហ្ស៊ិក កាណាដា សាធារណរដ្ឋឆែកអេស្តូនី បារាំង អាល្លឺម៉ង់ ក្រិក ឡេតូនី លីទុយអានី ហូឡង់ប៉ូឡូញ ព័រទុយហ្គាល់ រ៉ូម៉ានី ស្លូវ៉ាគី ស្លូវេនី ចក្រភពអង់គ្លេស និងសហរដ្ឋអាមេរិកបានបញ្ជូនអាវុធទៅរួចហើយ ឬកំពុងអនុម័តការចែកចាយសម្ភារៈសំខាន់ៗយោធាដល់អ៊ុយក្រែនក៏ដូចជាប្រាក់រាប់លានដុល្លារខណៈដែលប្រទេសសមាជិកផ្សេងទៀត កំពុងផ្ដល់ជំនួយមនុស្សធម៌ និងស្វាគមន៍ជនភៀសខ្លួន៕